Victoria’s Secret-ის ანგელოზების დიეტებისა და ფიტნესის საიდუმლო

ამბობენ, მოდელად უნდა დაიბადოო. თუმცა პოდიუმების ვარსკვლავები გულხელდაკრეფილები არ სხედან და ფორმის შესანარჩუნებლად უამრავ ხერხს მიმართავენ.

დილიდან დაღამებამდე ვარჯიშობენ სპორტდარბაზებში, იმაზე რომ აღარაფერი ვთქვათ, მამაცურად უძლებენ გაუთავებელ დიეტებს. ცუდი არ იქნებოდა, ანგელოზების ნაცადი ხერხებისა და ეშმაკობებისგან ჩვენც მიგვეღო მაგალითი.

დაუტცენ კრეზი

27 წლის ჰოლანდიელი ლამაზმანი თვლის, რომ კარგ ფორმაში ყოფნა - მისი სამუშაოა. მიეჩვია იმას, რომ უწევს წაქცევამდე ვარჯიში, თუმცა საყვარელ საჭმელზე უარის თქმას - მაგალითად, კალორიულ კარტოფილ ფრიზე - დაუტცენი მაინც ვერ მიეჩვია. ამიტომაც სპორტდარბაზში შეუჩერებლად ვარჯიშობს, სახტუნაოთი ხტუნავს და ბევრს დარბის - ასეთი ფიტნეს-გასართობი აქვს კრეზს.

ციტატა: "მე ვერ შემადარებთ ქალს, რომელიც ყოველ დილით სამსახურში დადის. ეს სულ სხვა ცხოვრებაა. კარგად იმიტომ სულაც არ გამოვიყურები, რომ ყოჩაღი ვარ, არამედ იმიტომ, რომ ეს ჩემი მოვალეობაა".

ადრიანა ლიმა

ის 31 წლის არის, ჰყავს ქმარი, არაჩვეულებრივი ქალიშვილი და მეორე ბავშვსაც ელოდება. თითქოს ცხოვრება მშვენიერი და დალხენილი აქვს, მაგრამ სირთულეების გარეშე ის ამ ყველაფერს ვერ მიაღწევდა. ლიმა - ერთ-ერთი იმათგანია, ვინც გულახდილად ჰყვება, რის ფასად უჯდება მას ფორმაში ყოფნა.

იმისათვის, რომ ბრენდის ყოველწლიური შოუსთვის მზად იყოს, ის რამდენიმე თვით ადრე იწყებს ვარჯიშს პერსონალური მწვრთნელის მეთვალყურეობის ქვეშ. ჩვენებამდე 9 დღით ადრე ადრიანა წყვეტს მყარი საკვების მიღებას და მხოლოდ პროტეინის კოქტეილებსა და წყალს ჯერდება.

დეფილემდე 12 საათით ადრე ის სითხის მიღებასაც წყვეტს. თუმცა ამის გამო ლიმას "ჯანმრთელი ცხოვრების წესის" დამცველები მკაცრად აკრიტიკებენ. ამიტომაც მაინცდამაინც მას ნუ მიბაძავთ. უბრალოდ, დაისახეთ მიზნად, რომ იყოთ მშვენიერი.

ციტატა: "როცა სმასაც წყვეტთ, ორგანიზმი თითქოს გამოშრობას იწყებს და 4 კილოგრამამდე უცებ იკლებ".

კენდის სვეინპოლი

სამხრეთაფრიკელი ლამაზმანი ნამდვილად ანგელოზის გარეგნობისაა. ბუნებით მინიჭებულ სილამაზეს ის იოგითა და კრივით (ვინ იფიქრებდა, რომ ნაზი ანგელოზები სპორტის ასეთ მკაცრ სახეობას მიმართავდნენ) ინარჩუნებს. ჩვეულებრივი გოგონა კვირაში ორჯერ ვარჯიშობს, მაგრამ Victoria’s Secret-ის მთავარ ჩვენებამდე სპორტდარბაზს ყოველდღე სტუმრობს.

ჭამს, რასაც უნდა, მაგრამ ნორმის ფარგლებში. კენდისის რაციონი, ძირითადად, შედგება ბოსტნეულისგან, წყლისა და ხორცის სტეიკებისგან - იმისათვის, რომ კუნთოვანი სისტემა განვითარდეს.

ციტატა: "როცა მოზარდი ვიყავი, ყურადღებას ვაქცევდი, რას ვჭამდი, იმიტომ, რომ ყველაფერი სახის კანზე მესახებოდა. თუ ზედმეტს შევჭამდი, მაშინვე მაყრიდა. ახლა, როცა ამ ყველაფერმა გამიარა, ვჭამ ყველაფერს, რაც მინდა. უბრალოდ, პორციების რაოდენობას ვაკონტროლებ".

მირანდა კერი

იოგა - ფორმის შენარჩუნების მისი საყვარელი საშუალებაა. ის ასანებს ლამის მშობიარობის დაწყებამდე აკეთებდა. სწორედ ეს დაეხმარა მას მშობიარობის მერე ფორმაში ჩადგომაში. 29 წლის ავსტრალიელი ლამაზმანი იცავს დიეტას სისხლის ჯგუფის მიხედვით (მას მეორე ჯგუფის სისხლი აქვს). ხორცს არ ჭამს და არჩევანს ბოსტნეულზე აკეთებს. სვამს განუსაზღვრელი რაოდენობით წყალს.

ციტატა: "დარწმუნებული ვარ, საკვების ხარისხს დიდი ყურადღება უნდა ექცეოდეს იმისათვის, რომ სხეული ძლიერი და ჯანმრთელი იყოს".

ალესანდრა ამბროსიო

ალესანდრას ფორმის შენარჩუნების განსაკუთრებული საიდუმლოებები არ გააჩნია. კვირაში სამი დღე ის იოგითა და პილატესით არის დაკავებული. დროდადრო ამბროსიო ათდღიან ვარჯიშებს აკეთებს სიმკვრივისა და კუნთების გასამაგრებლად.

მოდელისთვის ეს პროგრამა მისმა პირადმა მწვრთნელმა შეიმუშავა. სხვათა შორის, ვარჯიშების კურსს ჰქვია - "ბრაზილიური უკანალი".

ციტატა: "ახლა ბევრად უკეთ გამოვიყურები, ვიდრე 10 წლის წინ. თუმცა, ვაღიარებ, ახლა უფრო რთულია ფორმის შენარჩუნება, მაგრამ იმასაც ვიტყვი, რომ ამის გაკეთება შეუძლებელი არ არის".

კარლი კლოსი

ეს 19 წლის ლამაზმანი ერთ-ერთი ყველაზე მოთხოვნადი მოდელია. მისთვის ცხოვრება მოძრაობაა. გოგონა ბავშვობიდან სხვადასხვა სპორტის სახეობით იყო დაკავებული და დღემდე დარბის, ცურავს, ცეკვავს და დადის ველოსიპედით.

ასევე, ის დიდი ხნის მანძილზე ცეკვავდა ბალეტს, მაგრამ ურჩიეს, დაენებებინა თავი, ვინაიდან ასეთი სიმაღლით მოცეკვავის კარიერას ვერ აიწყობდა.

ციტატა: "ალბათ, მსოფლიოში სპორტის ყველა სახეობით ვიყავი დაკავებული. დამისახელეთ ნებისმიერი და გეტყვით, რომ თუნდაც უმნიშვნელო წვლილი იქ დატოვებული მაქვს!"

ლინდსი ელინგსონი

ძალოსნური ვარჯიშები, ვინიასა-იოგა და ჰიპ-ჰოპ ცეკვები - მოხდენილობის ამ პროგრამას მოსაწყენს ნამდვილად ვერ დავარქმევთ. 27 წლის ლინდსი ამბობს, რომ ვარჯიშებისადმი ზედმეტად სერიოზულობით მიდგომა არ ღირს - მისგან სიამოვნება უნდა მიიღო და გამხიარულდე.

რაც შეეხება კვებას, ლინდსი თავს არაფერში იზღუდავს (ყოველ შემთხვევაში, მოდელის საზომებით).

ჭამს ყველაფერს, შემდეგ კი მიდის სპორტდარბაზში და წვავს ყველა ზედმეტ კალორიას.

ციტატა: "ვგიჟდები ჩიზბურგერებზე, ვაშლის კრისპებსა და შავ შოკოლადზე. მას შემდეგ, რაც შევჭამ, სპორტდარბაზში მივდივარ და რამდენიმე საათს დამატებით ვვარჯიშობ".