ვიკა კალანდიას რეჟისორისთვის მიცემული პირობა და სცენები საწოლში

გარეგნულად მარმარილოსავით ცივია, მაგრამ უჩვეულოდ ვნებიანი. მას გრძნობების დემონსტრირება არ სჩვევია, მხდალ და სუსტ მამაკაცებს არ სწყა­ლობს. მარტივად უყვარდება, მაგრამ ძნელია მოანდომო ოჯახის შექმნა. ზოგჯერ ფიცხი და უტაქტოა. იმდენად ფლობს ემოციებს, სახეზე ვერაფერს შეატყობთ", - ასე ახასიათებენ ასტროლოგები დრაკონის წელში დაბადებულ მორიელს, ეს კი მსახიობ ვიკა კალანდიას ზოდიაქოს ნიშანია. ვიკას შემოქმედებით საქმიანობაში სიახლეებია. ერთ ფილმში უკვე გადაიღეს და იმავე რეჟისორისგან მეორე შეთავაზებაც მიიღო, გადაღებები ნიუ-იორკსა და კვიპროსშია დაგეგმილი.

- "მას შეუძლია იყოს ულმობელი, საშიში, სასტიკი - ყველაფერი კონკრეტულ სიტუაციაზეა დამოკიდებული".
- რომელ სისასტიკეზეა ლაპარაკი, როცა წყენაც ადვილად მავიწყდება.
- არადა, ასტროლოგები ამბობენ, რომ მორიელი წყენას და გაწეულ სიკეთეს არასდროს ივიწყებს.
- როგორც ჩანს, ჯერ ჩემთვის ასე არავის უწყენინებია. სიკეთე, რა თქმა უნდა, სულ მახსოვს და მადლიერებას ყოველთვის გამოვხატავ.
- "ჰიპნოზირების უნარი აქვს. ხალხი მის მზერას თვალს არიდებს".
- ჩემთვის ეს ჯერ არავის უთქვამს. ყველა აღნიშნავს, რომ პოზიტიური, მხიარული, ლაღი ვარ. თავად ძალიან მიყვარს, როცა დიალოგის დროს ადამიანს თვალებში ვუყურებ.
- "იმდენად ფლობს ემოციებს, სახეზე ვერაფერს შეატყობთ".
- რომ ვკვდებოდე, ამ დროსაც კი შემიძლია, გარშემო მყოფებს თავი ისე მოვაჩვენო, თითქოს ყველაზე კარგად ვარ, ეს ნამდვილად შემიძლია.
- სიხარულის დაფარვაც ასეთივე წარმატებით შეგიძლია?
- ასეთი შემთხვევა ჯერ არ მქონია, ეს არ დამჭირვებია.
- "მას მტერი და მოყვარე თანაბარი რაოდენობით ჰყავს, მტერიც კი პატივისცემით ეპყრობა".
- მტრები მყავს? იმედია, იმდენივე მტერი არ მყავს, რამდენი მოყვარეც. თეატრალურ წრეში ხშირია ინტრიგები, ფეხის დადებები... მე ამ ყველაფრისგან შორს ვარ. შურის მომენტი შეიძლება, კიდევ უფრო გასაგები იყოს, როლი ყველა მსახიობს უნდა. მე მყავს რამდენიმე ისეთი მეგობარი (მათ შორის ერთ-ერთი ანა გიუნტერია), ჩემი წარმატება იმავენაირად რომ უხარიათ, როგორც მე და შეიძლება, უფრო მეტადაც კი.
- "მორიელი არათუ სხვებისთვის, საკუთარი თავისთვისაც საფრთხეს წარმოადგენს. თუ გარშემო დასაგესლი ვერავინ ნახა, შეუძლია, მომაკვდინებელი ნესტარი საკუთარ თავზე გამოცადოს".
- ვერ დავეთანხმები. მე 25 ოქტომბერს ვარ დაბადებული და შეიძლება, კლასიკური მორიელი არ ვარ. გესლი ჩემთვის უცხო რამ არის.
- "ის გულმოდგინედ გეგმავს, როგორ იყაროს ჯავრი მტერზე. მოწინააღმდეგეს ისეთ დარტყმებს აყენებს, სამუდამოდ უკარგავს მასთან ქიშპობის სურვილს".
- აი, ეს ყველაფერი ჩემგან შორს არის.
- "მის ამქვეყნად მოვლინებას თითქმის ყოველთვის თან უსწრებს ოჯახის წევრის ან ნათესავის გარდაცვალება".
- ასეთი რამ არ მომხდარა.
- საკუთარი თავის ერთი სიტყვით დახასიათება რომ გთხოვო, რომელ სიტყვას იტყვი?
- (ფიქრობს) მხიარული.
- ასტროლოგები თვლიან, რომ შენ "უძლეველი" ხარ.
- აბა, რა (იცინის)!
- "მისი დათრგუნვა შეუძლებელია, ნებისმიერი ბრძოლიდან გამარჯვებული გამოდის".
- ცუდი ემოციებისთვის, ერთგვარი ბარიერი მაქვს. სამყაროში დადებით ენერგეტიკას ვუშვებ. სულ ვიმეორებ სიტყვებს: "მე ყველაფერში მიმართლებს, ყველაფერში მიმართლებს, ყველაფერში მიმართლებს..." ეს მიდგომა ბევრ რამეში მეხმარება და სამყაროსგან იგივე ენერგია ორმაგად მიბრუნდება... საკუთარ თავს ვუვლი, ცხოვრების ჯანსაღ წესს მივდევ. სწორად ვიკვებები, არ ვეწევი, ალკოჰოლს არ ვიღებ. ერთი ცუდი თვისება მაქვს: საჭის მართვისას სისწრაფე მიყვარს.
- "ძალიან მგრძნობიარეა, უყვარს ფუფუნება და ყველაფერი გადაჭარბებული".
- სულ პატარა დეტალი მაბედნიერებს და ცოტა მწყინს. გააჩნია, ფუფუნებაში რა იგულისხმება. მოოქრული მანქანა არ მინდა, მაგრამ კომფორტი მიყვარს.
- "მას გრძნობების დემონსტრირება არ სჩვევია".
- რა საჭიროა? ჩემს გრძნობებს ჩემთვის ვინახავ, ასე უფრო მეძვირფასება.
- "მეგობრებს დიდი ყურადღებით არჩევს. ვისაც არ ენდობა, ახლოს არ გაიკარებს".
- რა თქმა უნდა, ე.წ. პონტის მეგობრები არასდროს მყოლია და ზუსტად ვიცი, არც მომავალში მეყოლება.
- "მორიელი ქალი მომხიბვლელი, თავდაჯერებული და ამაყია, მაგრამ ერთი საიდუმლო სურვილი აქვს, მამაკაცობა უნდა".
- ტყუილია, მსგავსი სურვილი არასდროს მქონია. ქალად დაბადება არ ჯობია? ხელისგულზე გატარებენ.
- "მან კარგად იცის საკუთარი თავის ფასი. არასდროს გაიქცევა, რომ სასურველ მამაკაცს კისერზე ჩამოეკიდოს".
- რა თქმა უნდა, ასეა. ჯერ საკუთარი თავი უნდა გიყვარდეს და მერე სხვა დანარჩენი. მაქვს ხოლმე სურვილი, "შევაჯანჯღარო" მეგობრები, რომლებიც გადამეტებულად არიან გრძნობებში შეჭრილი. ვინმეს არ ვუნდოდე და მე ვეხვეწებოდე? ეს ჩემთვის წარმოუდგენელია.
- შეყვარებული ხარ?
- მხოლოდ საკუთარ თავზე.
- ნარცისიზმი...
- ...(მაწყვეტინებს) მთლად ეგრეც არ არის საქმე, თავს ვაკონტროლებ.
- "მორიელი ქალები ნაწილობრივ ჯადოქრები არიან. მეექვსე გრძნობის წყალობით, ცხოვრების პარტნიორს დანახვისთანავე ცნობენ".
- მე სულ ორჯერ მქონდა მომენტი, როცა ვთქვი, "ის არის". მორიელები ხანდახან ცდებიან. არადა, ახლაც მჯერა, რომ იმ მომენტში "ის იყო".
- "მხდალ და სუსტ მამაკაცებს არ სწყალობს".
- რა თქმა უნდა! კაცი ჩემზე ძლიერი, გონიერი უნდა იყოს. ისეთი არ მინდა, რომლის თრევაც მე მომიწევს.
- "უყვარს საიდუმლოებების შენახვა".
- ეს ნიჭი ნამდვილად მაქვს.
- "ზოგჯერ ფიცხი და უტაქტოა".
- ხანდახან ძალიან ფიცხი ვარ და უტაქტობაც შეიძლება გამომივიდეს, მაგრამ ბოდიშის მოხდა შემიძლია.
- "ნაკლებად მეოჯახეა. გარეთ ყოფნა ურჩევნია შინ გაჩერებას".
- საკუთარი ოჯახი არ მყავს, მშობლებთან ერთად ვცხოვრობ. შინ მარტო გაჩერება არ შემიძლია, განმარტოების სურვილიც კი არ მიჩნდება.
- "სენტიმენტალურია. უყვარს ბავშვობის საყვარელი ადგილების მონახულება".
- კი, ბავშვობაში ქვიშხეთში, მწერალთა სახლში (ვიკა მწერალ ზაურ კალანდიას შვილია. - ავტ.) ხშირად ვისვენებდი და ზოგჯერ ისე მომინდება ხოლმე იქ წასვლა, ისე მომენატრება, რომ... მწერლებისა და მხატვრების გარემოცვაში ვისვენებდი, საინტერესო დღეები გვქონდა. იმედია, წელს რამდენიმე დღით ქვიშხეთში ჩასვლას მოვახერხებ.
- "მარტივად უყვარდება, მაგრამ ძალიან ძნელია მოანდომო ოჯახის შექმნა".
- ეს არის ყველაზე დიდი სიცრუე ჩემ შესახებ. მოწონებითაც რთულად მომწონს. სამწუხაროდ, ამ მხრივ მეწვრილმანე ვარ, ყველა დეტალს ყურადღებას ვაქცევ.

-"მოსფილმის" კასტინგის მენეჯერი -თამარა გოგიჩაიშვილი იყო თბილისში ჩამოსული. ის 20 წელია, მოსკოვში ცხოვრობს და ამერიკაში მოღვაწე ერთ-ერთ სომეხ რეჟისორთან ერთად, მოკლემეტრაჟიანი მხატვრული ფილმისთვის, ქართველი მსახიობებით დაინტერესდა. მე და ჩემმა კოლეგებმა ჯერ გავიცანით, მერე კი ჩვენი გამოცდილების შესახებ ინფორმაცია და სერიალებიდან ეპიზოდები გადავუგზავნეთ. ისე მოხდა, რომ მე და ბახვა ბრეგვაძე ერთად გადაგვიღეს, მასალა მოსკოვში წაიღეს. მალე ორივეს დაგვირეკეს და გვითხრეს, რომ რეჟისორი არსენ აღაჯაიანი თბილისში ჩამოდიოდა, მასთან გასაუბრება უნდა გაგვევლო. ფილმში მე და ბახვა ცოლ-ქმარი უნდა ვყოფილიყავით, ფეხმძიმე გოგოს როლი უნდა შემესრულებინა, რომელსაც უკვე ჰყავს 4 შვილი.
გასაუბრებაზე რეჟისორს მოვეწონე. მითხრა: კარგი შთაბეჭდილება დატოვე, მაგრამ გული მწყდება, რომ 4 შვილის დედას არ ჰგავხარო. ძალიან მონდომებული ვიყავი, -მართალია, შვილები არ მყავს, მაგრამ ბავშვებზე ვგიჟდები-მეთქი. რამდენიმე დავალება მომცა და შევასრულე. დავპირდი, თუ გნებავთ, წონაშიც მოვიმატებ-მეთქი. -აქვე მომეცი პირობა, რომ ასეთი კარგი გოგო მომავალში 4 შვილს აუცილებლად გააჩენო. -პირობას გაძლევთ, პირველ ვაჟს თქვენს სახელს დავარქმევ-მეთქი. გარშემო ყველა იცინოდა. მართლა ძალიან მონდომებული ვიყავი. ჩემთან ერთად, ამ ფილმში ბევრი ნიჭიერი ქართველი მსახიობი მონაწილეობს. დეტალებს ჯერ ვერ გაგიმხელთ, მაგრამ გეტყვით, რომ ეს რეჟისორი გეგმავს კიდევ ერთი ფილმის გადაღებას, რომელშიც მე და ბახვა ისევ პარტნიორები ვიქნებით. ეს გაცილებით მასშტაბური პროექტია. მალე გადასაღებად ნიუ-იორკსა და კვიპროსში წავალთ. ფილმზე პროფესიონალები მუშაობენ. მონტაჟს აკეთებს პიროვნება, რომელიც კუსტურიცას ფილმების მემონტაჟეა.
-შენ და ბახვა ახლო მეგობრები ხართ. ცოლ-ქმრის როლის თამაში არ გაგიჭირდათ?
-არა.
-თამამი სცენები არ არის?
-თამამი ეპიზოდები არ ყოფილა, მიუხედავად იმისა, რომ სულ საწოლის სცენები გვქონდა, ჩვენთან ერთად იყვნენ ბავშვებიც. ბახვა არაჩვეულებრივი პარტნიორია. ფილმი რუსულენოვანია და ჩემი მეგობარი, ანა გიუნტერი მეხმარებოდა ქართული აქცენტის დაძლევაში. პრემიერის თარიღი ჯერ ცნობილი არ არის.
წყარო: ambebi.ge