გიგი გაჩეჩილაძე: "ბევრი "სამყარო" ვნახე, მაგრამ ეს არჩევანი გავაკეთე"

ძალიან ბევრს ნიშნავს ჩემთვის ის, რომ ბავშვი ცეკვას სწავლობს, ჯანმრთელია, სტუდიაში მოსვლა უხარია...


ახლახან გიგი გაჩეჩილაძე და ანანო ჯოხაძე მშობლები გახდნენ. პატარა მაქსიმეს დაბადებამ მათი ცხოვრება რადიკალურად შეცვალა და ახალბედა მშობლები ბედნიერებისგან "მეცხრე ცაზე" არიან.

- რა არის შენთვის ბედნიერება?
- ახლა ძალიან ბედნიერი ვარ. ხომ იცით, ახლახან პატარა შეგვეძინა და მთელი ჩემი ემოციები მას მიაქვს, ასეთი ბედნიერი არასდროს ვყოფილვარ. ბედნიერება ჩემთვის ჩემი ოჯახი და შვილია.
- ბედნიერი ადამიანი ჩუმად უნდა იყოსო, - ამბობენ. ეთანხმები ამ აზრს?
- ცხოვრებაში არის მომენტები, როცა მართლა ჩუმად უნდა იყო. თუმცა, ყოველთვის ასე ვერ იქნები: სულ ჩუმად ყოფნით არა მგონია, ბოლომდე შეინარჩუნო ის ბედნიერება, რაც გაქვს. ამით შეიძლება საკუთარ თავს უბედურებაც კი მოუტანო.
- ოდესმე წარუმატებლობა გიგემია? როგორი გემო აქვს მას?
- ჩემს ცხოვრებაში ძალიან ბევრი წარუმატებლობა ყოფილა. წარუმატებლობა ძალიან ცუდი შეგრძნებაა და ამას ბავშვობიდან შეჩვეული ვარ: როცა კონკურსებზე გამოვდიოდი, ხან ვიგებდი, ხან - ვაგებდი. წარუმატებლობის გამო ხელი არასდროს ჩამიქნევია. მარცხი ბევრ რამეს გასწავლის.
- მიუხედავად იმისა, რომ ცხოვრება ხანმოკლეა, ხშირად ვაიძულებთ თავს ვაკეთოთ ის, რაც არ მოგვწონს... როგორ ფიქრობ, ასე რატომ ვიქცევით?
- დიახ, ცხოვრება მართლაც ძალიან ხანმოკლეა და რაც უფრო გემატება ასაკი, ამას მით უფრო მეტად გრძნობ. პირადად მე, ვცდილობ, რაც არ მომწონს, არ გავაკეთო. თუმცა, ხანდახან იმის კეთებაც მიწევს, რაც არ მინდა - ისევ და ისევ იმისთვის, რომ რაც გულით მინდა, მქონდეს...
- რომ გქონდეს შანსი, შეცვალო მხოლოდ ერთი დეტალი შენს ცხოვრებაში, რას შეცვლიდი?
- ჩემს ცხოვრებაში არაფერს შევცვლიდი. რომ არ გამომევლო ის, რაც გამოვიარე, დღეს სხვანაირი ვიქნებოდი. რომც მქონდეს შანსი, რაიმეს შეცვლის, მართლა არაფერს შევცვლიდი... აი, რომ შემეძლოს, სიგარეტის მოწევას დავანებებდი თავს.
- მბრძანებლობა, მოუთმენლობა, სიზარმაცე, კრიტიკა - ჩამოთვლილთაგან, რა გახასიათებს?
- ყველა ზემოთ ჩამოთვლილი თვისება მაქვს, მაგრამ ამავდროულად, სამართლიანი ვარ!
- წარმოიდგინე, რომ ბედნიერება გახდა მსოფლიოს ვალუტა. რა ტიპის სამსახური გაგხდიდა მდიდარს?
- ალბათ, მხოლოდ ის სამსახური, რასაც დღეს ვაკეთებ. ცეკვა ჩემთვის სულ სხვა სამყაროა. ბევრი "სამყარო" ვნახე, მაგრამ ეს არჩევანი გავაკეთე იმიტომ, რომ ყველაზე მეტად მომწონდა...
- ყოველთვის გჯერა საკუთარი თავის? უსმენ ხოლმე გულის კარნახს?
- ჰოროსკოპით სასწორი ვარ და შესაბამისად, გადაწყვეტილების მიღების დროს დიდხანს ვფიქრობ, ვწონი. ყოველთვის ვცდილობ, სხვასაც ვკითხო აზრი. ირგვლივ უამრავი სანდო ადამიანი მყავს. ხშირად მაქვს განცდა, რომ დამოუკიდებლად სწორ გადაწყვეტილებას ვერ მივიღებ.
- რამდენად აკონტროლებ ყველა იმ მოვლენას, რაც შენს ცხოვრებაში ხდება?
- ვცდილობ, მაქსიმალურად გავაკონტროლო მოვლენები, რომელიც ჩემს ცხოვრებაში ხდება. თუმცა, ცხადია, ადამიანი ყველაფრის გაკონტროლებას ვერ შეძლებს. ბევრი რამ დამოკიდებულია ირგვლივ მყოფებზე.
- ცხოვრებისეული წინააღმდეგო­ბების წინაშე ფარ-ხმალს იოლად ყრი?
- როცა პატარა ვიყავი, პრობლემების წინაშე მდგარი, ადვილად ვყრიდი ფარ-ხმალს. დღეს კი, ჩემ გარშემო იმდენი ხალხია, რომც მოვინდომო, არ მომცემენ ამის საშულებას. ისინი ყოველთვის და ყველანაირ სიტუაციაში მხარში მიდგანან, ისევე, როგორც მე - მათ.
- როგორ ფიქრობ, საკუთარი საქმიანობით ადამიანებისთვის სიკეთე მოგაქვს?
- ვფიქრობ, რომ ჩვენ, მოცეკვავეებს ხალხისთვის სიკეთე მოგვაქვს. ძალიან ბევრს ნიშნავს ჩემთვის ის, რომ ბავშვი ცეკვას სწავლობს, ჯანმრთელია, სტუდიაში მოსვლა უხარია... როცა ისინი საკუთარი შრომით წარმატებას აღწევენ და ამ წარმატებაში შენც მიგიძღვის წვლილი, ეს გაბედნიერებს.
- დაწყებული საქმე ყოველთვის ბოლომდე მიგყავს თუ ხშირად, შუა გზაზეც ტოვებ?
- საბედნიერედ, ეს კარგი თვისება მაქვს: დაწყებული საქმე ყოველთვის ბოლომდე მიმყავს. თუ მივხვდი, რომ რაღაც წამგებიანია ან ისე არ გამოდის, როგორც საჭიროა, თავის დანებებაც ადვილად შემიძლია.
- გაიხსენე ის, რაზეც ოდესღაც ოცნებობდი და არ გაგიკეთებია.
- ჩემი ცხოვრების დიდი ნაწილი ოცნებაა. ჯერ არის ოცნება, მერე ისახავ მიზანს და ცდილობ მის მიღწევას. ბევრი ოცნებაა, რომელიც ჯერ არ ამსრულებია... ჩემი ბავშვობის ოცნება იყო, გამომძიებელი ვყოფილიყავი. თუმცა, ახლა ეს ყველაფერი ჩემგან ძალიან შორსა...
- რომ შემოგთავაზონ სამუდამოდ სხვა ქვეყანაში წასვლა, სად წახვიდოდი?
- ერთადერთი ქვეყანა, სადაც საცხოვრებლად წავიდოდი, ამერიკაა. იქ გავატარე ჩემი ცხოვრების ყველაზე დიდი დრო. ამერიკაში თავს ძალიან კარგად ვგრძნობ. თუმცა, ბედნიერი ვარ, რომ საქართველოში ვცხოვრობ.
- შეიძლება, ვიღაცას შენგან გან­­სხვავებული შეხედულებები ჰქონდეს, მაგრამ მასთან შეხვედრა მაინც სასიამოვნო იყოს შენთვის?
- რა თქმა უნდა, სასიამოვნოა ისეთ ადამიანთან ურთიერთობა, ვისაც ჩემგან განსხვავებული აზრები აქვს. მომხრე ვარ განსხვავებული აზ­როვნების და ყოველთვის ვცდილობ, ასეთი ადამიანებისგან რაღაც ვისწავლო.
- რომელს ისურვებდი იყო: უბედური გენიოსი, თუ ბედნიერი სულელი?
- ყველა შენ მიერ დასმულმა კითხვამ დამაფიქრა, ამ კითხვაზე კი ნამდვილად, დაუფიქრებლად გიპასუხებ: მირჩევნია, უბედური გენიოსი ვიყო, ვიდრე ბედნიერი სულელი... ყოველთვის ვცდილობ, ინტელექტი ავიმაღლო თუნდაც ელემენტარულით. ნამდვილად არ მინდა ვიყო სულელი და უვიცი, მაგრამ ბედნიერი.
- ისურვებდი ისეთივე მეგობარს, როგორიც თავად ხარ?
- დიახ, ვისურვებდი, მაგრამ ერთმანეთს ვერ გავუგებდით, ალბათ (იცინის). მგონი, კარგი მეგობარი ვარ.
- ხშირად გიჩნდება სურვილი რაღაც ახლის შესწავლის?
- დიახ, ხშირად მიჩნდება ასეთი სურვილი. თუმცა, ხშირადვე, სურვილი სურვილად რჩება. ძალიან მინდა ბევრი უცხო ენა ვიწავლო, რადგან პროფესიიდან გამომდინარე, უცხოელებთან მიწევს ხშირი ურთიერთობა. ბოლო დროს მინდოდა, ბოქსზეც მევლო...
- ყველაზე მეტად, რის გამო ხარ სამყაროსადმი მადლიერი?
- იმის გამო, რომ მყავს კარგი ოჯახი. ღმერთი მწყალობს. ვფიქრობ, ყველა ცუდ მოვლენას რაღაც კარგი მოსდევს და ამისთვის მადლობა უფალს. მადლობა თუნდაც იმისთვის, რომ ქართველი ვარ და ჩამოვყალიბდი ისეთ პიროვნებად, როგორიც ვარ.
- შენი ყველაზე დიდი შიში რეალობა გამხდარა?
- არა, რეალობა არასდროს გამხდარა ჩემი შიში და იმედი მაქვს, არც არასდროს გახდება.
- ადამიანების გაცნობა და მათ­თან დაახლოება სიამოვნებას გა­ნიჭებს?
- დიახ, ადამიანების გაცნობა დიდ სიამოვნებას მანიჭებს. რამდენი ადამიანიც არის, იმდენი უნიკალური შესაძლებლობა არსებობს. მათგან უფრო ბევრს ვსწავლობ, ვიდრე თუნდაც, ნებისმიერი წიგნიდან. ადამიანებთან კონტაქტით ყალიბდები ადამიანად.
- რა არის შენი ბავშვობის დრო­ინ­დელი ყველაზე ბედნიერი მოგონება?
- ძალიან გიჟი ბავშვი ვიყავი და ბევრი კარგი მოგონება მაქვს. ჩემს ბავშვობას მხოლოდ კომპიუტერთან და წიგნებთან ერთად არ ჩაუვლია. თუმცა, კითხვაც მიყვარდა. ყოველთვის ვცდილობდი, უფრო მეტი მენახა და გამეგო... მახსოვს, ძალიან არ გამიხარდა ჩემი ძმის დაბადება. ვფიქრობდი, რომ კონკურენტი გამიჩნდა. თუმცა, შემდეგ მისი არსებობით ბედნიერი ვიყავი და ასეა დღემდე.
- თუ ჯერ კიდევ არაფრისთვის მიგიღწევია, დასაკარგი არაფერი გაქვს. ასეა?
- ადამიანებს გვაქვს ერთი ცუდი თვისება: როცა კარგად ხარ, მაშინ ამ ბედნიერებას ვერ აფასებ... რაღაც დასაკარგი ყველას გვაქვს და ამის გამო არ უნდა შეფერხდე, ბოლომდე უნდა მიაწვე იმას, რისი მიღწევაც გინდა.
- ამქვეყნად არსებობს ადამიანი, ვისაც თვალდახუჭული ენდობი?
- არა, ასეთი ადამიანი არ არსებობს... ბოლომდე ჩემს თავსაც არ ვენდობი. თუმცა, გვერდით მყავს ისეთი ადამიანები, რომელთა რჩევასაც ვითვალისწინებ და შესაბამისად, მათ ვენდობი კიდეც, მაგრამ 100 პროცენტით - ვერა, ეს რთული იქნება.
- ახლა წინ მილიონი დოლარი რომ დაგიწყონ და გითხრან, აიღე, ოღონდ ამის მერე აღარასდროს იცეკვოო, როგორ მოიქცევი?
- მილიონს ფასი დაეკარგება, თუ ასეთი არჩევანის წინაშე დამაყენებენ. მე ჩემი საქმე მაბედნიერებს.
- გაყიდდი შენი ცხოვრების 10 წელს მსოფლიო აღიარებაზე?
- ჩემი ცხოვრების არც ერთ წუთს და წამს არ გავყიდდი მსოფლიო აღიარებაზე. ჩემთვის ცხოვრება ძალიან ტკბილია. რა თქმა უნდა, მსოფლიო აღიარება კარგია და ამისთვის უნდა იმუშაო ადამიანმა, მაგრამ სიცოცხლის წლებს ნამდვილად არაფერში გავცვლი.
- თუ ჩვენ შეცდომებზე ვსწავ­ლობთ, რატომ გვეშინია მათი დაშვების?
- ჭკვიანი ადამიანი სხვის შეცდომებზე სწავლობს. შეცდომები აუცილებელია იმისთვის, რომ უკეთეს ადამიანად ჩამოყალიბდე... მე არ მეშინია შეცდომების.
- რა ან ვინ გიყვარს უფრო მეტად და ის, რაც ბოლოს გააკეთე, გამოხატავდა ამ სიყვარულს?
- ძალიან ბევრი ვიღაც და რაღაც მიყვარს... პირველ რიგში, ოჯახი და მერე - გარემოცვა... ყველა ჩემი მოქმედება სიყვარულსა და პატივისცემას გამოხატავს იმ ადამიანების მიმართ, ვინც ამას იმსახურებს.