ანა მარგველაშვილი სტერეოტიპებსა და ჩარჩოებს მიღმა, როგორია პრეზიდენტის ქალიშვილის ჩაცმის სტილი

თავისუფალი სულისკვეთების ადამიანია და სწორედ ეს მომწონს ანა მარგველაშვილში.

სტერეოტიპებსა და ჩარჩოებს მიღმა წარმომიდგენია პრეზიდენტის ქალიშვილი, რომელიც ხშირად ხვდება საზოგადოების ინტერესის ცენტრში, თუმცა არასდროს ცდილობს, მათი უმრავლესობის შეხედულებები დააკმაყოფილოს. მიუხედავად იმისა, რომ ბოლო დროს საზოგადოებრივ ასპარეზზე გაცილებით აქტიურია, სასაუბრო თემად მაინც სტილი ავირჩიეთ. არ მიკვირს, რომ უსმენს ჰიპ-ჰოპსა და რეპს, ხოლო სტილი, რომელიც მის სულისკვეთებას გამოხატავს – სპორტულია.

- ანა, როგორ იწყება თქვენთვის საქმიანი დღე?

- დილით ადრე ვდგები. ჯერ ბავშვს ვაჭმევ და მხოლოდ მას შემდეგ ვსაუზმობ. არც ჩვენი ძაღლისთვის მავიწყდება საჭმლის მომზადება. ამასობაში ბავშვის ძიძა მოდის და შემიძლია სამსახურში წავიდე. მანამდე კი ძაღლს ვასეირნებ.

ჩაცმის საკითხი, რა თქმა უნდა, დღის წესრიგში დგას. ჩემთვის ყველაზე კომფორტული სამოსი ჯინსი და თავისუფალი ზედაა. მაგრამ ხშირად საქმიანი შეხვედრები გვაქვს და ვცდილობ შესაბამისი კოსტიუმი შევარჩიო. მაგალითად, კლასიკური სტილის შარვალი და პერანგი. ხშირად მამასთან ერთად მიწევს შეხვედრებზე სიარული და ასეთ დროსაც ეტიკეტს ვიცავ. საერთოდ სხვადასხვა სტილის სამოსში შემიძლია თავი კომფორტულად ვიგრძნო. პრობლემას არ წარმოადგენს კლასიკური სტილის სამოსიც.

ვმუშაობ კომპანიაში Georgian Events. ძალიან შეკრული და მეგობრული გუნდი ვართ. ჩვენი კომპანია აწყობს ივენთებს, კორპორატიულ საღამოებს. ვთანამშრომლობთ ასევე თბილისის მოდის კვირეულთან. ჩემთვის საინტერესო და სახალისო საქმიანობაა. ყოველთვის სხვადასხვა დაკვეთას ვასრულებთ და მასზე მუშაობა მომწონს. საკმაოდ შრომატევადიცაა. ვერ ვიტყვი, რომ დატვირთული გრაფიკი არ მაქვს. ჯერჯერობით ეს სამუშაო მაქსიმალურად ერგება ჩემს ხასიათს. მომავალში რა საქმე გამიტაცებს, ჯერ არ ვიცი. ისე დავამთავრე. ჩემი ძირითადი პროფესიაც საინტერესო სფეროს უკავშირდება.

- რა გიქმნით სიმყუდროვეს დილით?

- დილით ნაკლებად ველტვი სიმყუდროვეს, უფრო საღამოს მჭირდება. ასეთ დროს მიყვარს შინ განმარტოება და მუსიკის მოსმენა. ვუსმენ ძირითადად ჰიპ-ჰოპსა და რეპს. არ ვუსმენ როკს.

- როგორ ირჩევთ სამოსს საქმიანი შეხვედრებისთვის; ყოველთვის ითვალისწინებთ ეტიკეტს?

- კლასიკური სტილი არ მიყვარს, თუმცა მაინც ვირგებ და ვიხდენ. შეიძლება შარვალი და პიჯაკი, ან კაბა შევარჩიო. განწყობის მიხედვით, ან შეხვედრის სპეციფიკიდან გამომდინარე. მოკლე კაბას ვერ ვიხდენ, ამიტომ გრძელ კაბას ვანიჭებ უპირატესობას. ეტიკეტის დაცვას ყოველთვის ვცდილობ, თუმცა ერთხელ სპონტანურად მამასთან ერთად რუსთაველის თეატრში აღმოვჩნდი ტყავის შარვლითა და მილითარის სტილის პერანგით. მას შემდეგ სოციალურ ქსელში, ჩემი ჩაცმულობა გახდა განხილვის საგანი. არადა, ნამდვილად ვერ წარმოვიდგენდი, ჩემი ჩაცმულობა ამგვარ ინტერესს თუ გამოიწვევდა.

- პრეზიდენტის ქალიშვილისადმი გამოხატული ზედმეტი ინტერესი გაღიზიანებთ?

- რეაქცია აღარ მაქვს ჩემ მიმართ გამოხატულ ზედმეტ ინტერესსა და ჭორებზე. ბუნებრივად ვიღებ ასეთ დამოკიდებულებას. გულსაც არ მტკენს, არც დისკუსიაში შევდივარ ვინმესთან. საზოგადოების აზრს მაინც არ ვითვალისწინებ და ვაკეთებ იმას, რაც მსურს. არ დაგიმალავთ, დასაწყის ეტაპზე უფრო მგრძნობიარე ვიყავი.

- როგორია თქვენთვის იდეალური ლუქი, იცვლებოდა თუ არა წლებთან ერთად თქვენი გემოვნება?

- ყოველდღიურად მიყვარს ჯინსის, თავისუფალი მაისურისა და სპორტული ფეხსაცმლის ტარება. მომწონს და ვირგებ ლეგინზებს. სასურველი სტილი ქეჟუალია. რაც შეეხება გემოვნებას, რა თქმა უნდა, შემეცვალა, თუმცა ამ

სტილის ერთგული დავრჩი. ადრეულ ასაკში ჩაცმას დიდ ყურადღებას არ ვუთმობდი.

- სტილი, რომელიც თქვენს სულისკვეთებას გამოხატავს?
- სპორტული.

- სამოსი, რომელსაც ვერ იხდენთ?
- ჩემი სიმაღლიდან გამომდინარე, 177 სმ ვარ, ვერაფრით მოვიხდინე მაღალქუსლიანი ფეხსაცმელი. ვთვლი, რომ არც მიხდება და არასდროს ვატარებ. ძირითადად დაბალქუსლიან კლასიკურ, ან სპორტულ ფეხსაცმელს ვირჩევ და ვაწყობ ლუქსაც.

- სად გიყვართ შოპინგი და რომელია თქვენი ფავორიტი ბრენდი?
- შოპინგი მიყვარს. ნაკლებად ვინტერესდები ონლაინშოპინგით. მაღაზიებში სიარული და სამოსის არჩევის პროცესი დიდ სიამოვნებას მანიჭებს. დავდივარ მეგობრებთან ერთად, რომ ეს პროცესი კიდევ უფრო სახალისო გავხადო, თან მათ აზრსაც ვითვალისწინებ. მეგობრებმა კარგად იციან ჩემი გემოვნება და არასდროს მაყიდინებენ ისეთ ნივთს, რომელიც სპონტანურად მომეწონება და მერე თაროზე შემოვდებ. ყიდვის პროცესი მაბნევს, ყველაფერი ერთმანეთში მერევა, ამიტომ ძალიან მჭირდება მათი რჩევა. საყვარელი ბრენდები არ მაქვს, მთავარია ნივთი მომეწონოს. შესაბამისად, არც ფავორიტი მარკა მაქვს.

- წვეულებაზე წასვლის წინ ისევ ჩნდება კითხვა, - რა ჩავიცვა?
- გააჩნია წვეულების მასშტაბურობასაც. არასდროს მაწვალებს ეგ კითხვა თუ საქმე წვეულებას ეხება. არ ვარ ისეთი ადამიანი, ვინც ერთი კვირით ადრე ემზადება - ყიდულობს, ან იკერავს კოსტიუმს. ჩასაცმელს წვეულების დღეს, ჩემი გარდერობიდან ვარჩევ.

- სად გიყვართ თავისუფალი დროს გატარება, სად ისვენებთ კომფორტულად?
- მიყვარს, როცა მეგობრები მსტუმრობენ, ან მათთან ერთად რომელიმე კაფეში მოკალათება. ასეთ დროს ვისვენებ კიდეც, რადგან მათი გარემოცვა მსიამოვნებს. დრო ასე უფრო ხალისიანად გადის.

- ერთი დღე ოჯახის წევრების გარემოცვაში...
- მაგალითად, დასვენების დღეს, ოჯახთან ერთად აუცილებლად მივდივარ სადმე, ბავშვისთვის კომფორტულ გარემოში. გვიყვარს ასევე კინოში სიარული. სეირნობა ყველაზე ნაკლებად მიზიდავს.

- თავს როგორ უვლით, დიეტას იცავთ?
- ბოლო პერიოდში ბევრს დავდივარ. ვვარჯიშობ, დავრბივარ. დიეტას ვერ ვიცავ. ჯანსაღი საკვებით ვიკვებები, მივირთმევ ბოსტნეულს, მოხარშულ ხორცს, წვნიანიც მიყვარს. რაც უნდა გემრიელად ამზადებდნენ რესტორნებში, შინ მომზადებული კერძები მირჩევნია. გარეთ თუ ვჭამე, მთელი დღე დისკომფორტის შეგრძნება მაქვს. ორსულობის შემდეგ, წონაში ნელა ვიკლებ. თუმცა, ისევ 64 კგ-ს ვიწონი. სულ რაღაც 2 კილოგრამი დავიკელი. მაინც მეპარება თვალი გემრიელი კერძებისკენ. მიყვარს ტკბილეული, - ნამცხვრები და შოკოლადი. მიმაჩნია, რომ 7 კგ. მაინც უნდა დავიკლო, რომ ფორმაში ჩავდგე. ამ კილოგრამებს ვებრძვი. ძირითადად სპორტით და სწორი კვებით მივიღებ შედეგს.

- თავად თუ გეხერხებათ კერძების მომზადება?
- კერძების მომზადება არ მეხერხება. ბავშვისთვის საჭმლის მომზადებაც, ძირითადად, ხილფაფებით შემოიფარგლება.

- რა პრინციპით შეარჩიეთ სამოსი ფოტოსესიისთვის?
- ფოტოსესიისთვის ლუქების მომზადებაში ჩემი მეგობარი, მოდის ბლოგერი სალი ბააზოვი დამეხმარა. შევარჩიეთ ქართველი დიზაინერების - დათუნა სულიკაშვილის, აკა ნანიტაშვილის, Mach & Mach, ანუკა ქებურიასა და მოდის სახლის "მატერიას" მოდელები. სალის გემოვნებას ვენდობი, მან კარგად იცის ჩემი სტილი და, ჩემი გემოვნებიდან გამომდინარე, სხვადასხვა სტილის სამოსი მომარგო. გაითვალისწინა საგაზაფხულო განწყობა და ფერად სამოსზე გააკეთა აქცენტი.

წყარო:    ambebi.ge