კინოთეატრ „ამირანში“ თანამედროვე უკრაინული კინოფილმების ჩვენება იმართება

27-30 აპრილს კინოთეატრ „ამირანში“თანამედროვე უკრაინული კინოფილმების ჩვენება იმართება. ფესტივალი „უკრაინა ფოკუსში“ რეჟისორის ტარას ტკაჩენკოს ფილმის „გვრიტის ბუდის“ (2016) ჩვენებით გაიხსნა. 28-30 აპრილს ფესტივალის ფარგლებში წარმოდგენილი იქნება შემდეგი კინოფილმები: „ბებიაჩემი ფანი კაპლანი“ (მხატვრული ფილმი, რეჟისორი ოლენა დემიანენკო, 2016 წელი), “#SELFIEPARTY” (მხატვრული ფილმი, რეჟისორი ლიუბომირ ლევიცკი, 2016 წელი), „უკრაინელი შერიფები“ (დოკუმენტური ფულმი, რეჟისორი რომან ბონდარჩუკი, 2016 წელი), „რიდნი“ (მშობლიურები) (დოკუმენტური ფილმი, რეჟისორი ვიტალი მანსკი, 2016 წელი), „ხალხის მსახური 2“ (მხატვრული ფილმი, რეჟისორი ოლექსი კირიუშჩენკო, 2016 წელი). დასწრება სეანსზე ყველა სტუმრისთვის უფასოა.

როგორც „ინტერპრესნიუსს“ ღონისძიების ორგანიზატორებმა აცნობეს, ფესტივალმა „უკრაინა ფოკუსში“ კინემატოგრაფიის მოყვარულთათვის ცალკე სიურპრიზი მოამზადა - 29 აპრილს, 20:00 საათზე, ამ ჟანრის მოყვარულებს შეეძლებათ იხილონ მოკლემეტრაჟიანი ფილმების - ოდესის საერთაშორისო კინოფესტივალის გამარჯვებული ნამუშევრები, კერძოდ, „მოშორებით“ (რეჟისორი კატია გორნოსტაი, 2015 წელი), „ლურსმანი“ (რეჟისორი ფილიპ სოტნიჩენკო, 2016 წელი), „კაცური სამუშაო“ (რეჟისორი მარინა სტეპანსკა, 2015 წელი), „მანჩესტერში წვიმდა“ (რეჟისორი ანტონიო ლუკიჩი, 2016 წელი).

ბავშვთა აუდიტორიისთის ფესტივალის ფარგლებში ორგანიზებული იქნება თანამედროვე ანიმაციური ფილმის „დრაკონის მოჯადოება“ (რეჟისორი მანუკ დეპოიანი) ჩვენება. მულტფილმი გამოვიდა 2016 წელს და მსოფლიო გაქირავებაში უკვე დაახლოებით 165 000-მა მაყურებელმა მოასწრო მისი ნახვა და შეყვარება. თბილისში ანიმაციური ფილმი „დრაკონის მოჯადოება“ პირველად იქნება წარმოდგენილი და ორიგინალ ენაზე, უკრაინულად გავა.

გარდა კინო-ჩვენებებისა, მსურველებს ასევე შეეძლებათ დაესწრონ შეხვედრებს უკრაინელ კინემატოგრაფებთან მასტერკლასების ფარგლებში, რომელიც გაიმართება 28 აპრილს დღის განმავლობაში RadioCafe-ში (თბილისი, დოლიძის ქუჩა 2). კინო-ოპერატორი იაროსლავ პილუნსკი წარმოადგენს პროექტ „ყვითელი ავტობუსს“, რომელიც მიზნად ისახავს კულტურულ–საგანმანათლებლო კომუნიკაციას ბავშვებთან, კინოთეატრ „ჟოვტენის“ დირექტორი ლუდმილა გორდელაძე ისაუბრებს კინემატოგრაფიაში თავისი გამოცდილების შესახებ, ასევე ეროვნული და არტ-ჰაუსური კინოს გაქირავებაზე კინოთეატრ „ჟოვტენის“ მაგალითზე; შემოქმედებით შეხვედრას გაუძღვება კინოსა და თეატრის მსახიობი, მთავარი როლის შემსრულებელი ფილმში „გვრიტის ბუდე“ რიმა ზიუბინა, ხოლო იმის შესახებ, თუ როგორ უნდა ავაგოთ საფესტივალე სტრატეგია ფილმისთვის, ოდესის საერთაშორისო კინოფესტივალის გენერალური პროდიუსერი იულია სინკევიჩი ისაუბრებს. რეჟისორი რომან ბონდარჩუკი მასტერკლასების დროს ისაუბრებს ოსკარის კამპანიის წყალქვეშა ქვებზე თავისი ფილმის „უკრაინელი შერიფების“ მაგალითზე; სექციას დაასრულებს „კინო-ინდუსტრია“ - დისკუსია უკრაინელი პროდიუსერებისა და კინოს საკითხებში უკრაინის სახელმწიფო სააგენტოს თავმჯდომარის ფილიპ ილენკოს მონაწილეობით.

„უკრაინული კინოს ფესტივალი უკვე მესამედ იმართება თბილისში და ყოველ ჯერზე ამ არაორდინარულ მოვლენას სხვადასხვა ასაკისა და ეროვნების კინომოყვარულები სტუმრობენ. წელს ფესტივალის პროგრამაში შევიდა სხვადასხვა ჟანრის თანამედროვე კინოფილმები და იმედს გამოვთქვამთ, რომ თითოეული მაყურებელი შეძლებს მისთვის საინტერესო ჩვენების ნახვას, შეაღწევს უკრაინული კინოს სამყაროში და ფესტივალიდან წაიღებს რაღაც განსაკუთრებულს“, - განაცხადა ღონისძიების ორგანიზატორმა მარია მოსკალენკომ.
წყარო: ambebi.ge