გერმანულმა ჟურნალმა რომის პაპი გააშარჟა

გერმანული ჟურნალის Titanic-ის გარეკანზე რომის პაპის ბენედიქტ XVI პროვოკაციული ფოტო დაიბეჭდა. ფოტოზე პაპის შესამოსელს ქალის ტუჩებისა და ხელის გულების კვალი ეტყობა, თავად პაპს კი ხელები წითლად აქვს შეღებილი.

ეს პირველი შემთხვევა არ არის, როდესაც სატირული ჟანრის ჟურნალი Titanic რომის პაპის შეურაცხმყოფელ ფოტოებს აქვეყნებს. ამის გამო ივლისის ნომერი გაყიდვიდან მთლიანად ამოიღეს.

"არ არსებობს ჩივილის საფუძველი: რომის პაპი სუფთაა!", - ასეთი წარწერით გამოვიდა ჟურნალის აგვისტოს ნომერი. Titanic-ის მთავარი რედაქტორი, ლეო ფიშერი არ გამორიცხავს, რომ აგვისტოს ნომერსაც, სხვა ნომრების მსგავსად სასამართლო პროცესი ელოდება.

"ჩვენ მადლობას ვუხდით წმინდა მამას, ჩვენი ჟურნალისადმი ინტერესის გამოჩენისთვის და კვლავ ვითხოვთ მის კურთხევას", - განაცხადა ლეო ფიშერმა და იმაზე მიუთითა, რომ ვატიკანის უარყოფითი რეაქცია ჟურნალის პოპულარობას დღითიდღე ზრდის.

ივლისის ნომრის გარეკანზე, რომის პაპის სამოსზე ყვითელი და ყავისფერი ლაქები იყო დატანილი, ფოტოს კი ასეთი წარწერა ჰქონდა დართული: "ალილუია: ვატიკანში გაჟონვის ადგილი აღმოჩენილია!".
მომზადებულია news.am-ის მიხედვით.