ცამეტი პერსონაჟი და ცამეტივე მკვლელი... - "თოლია" ანტონ ჩეხოვისა და ბორის აკუნინის მიხედვით, ახმეტელის თეატრის სცენაზე

ახმეტელის თეატრში სეზონის ბოლო პრემიერა გაიმართა. "თოლია" ანტონ ჩეხოვისა და ბორის აკუნინის მიხედვით ბელორუსმა რეჟისორმა, მინსკის თანამედროვე სამხატვრო თეატრის სამხატვრო ხელმძღვანელმა - ვლადიმერ უსაკოვმა ახმეტელის თეატრის მსახიობებთან ერთად განახორციელა.

ირაკლი გოგოიამ, ახმეტელის თეატრის სამხატვრო ხელმძღვანელმა, რეჟისორი უსაკოვი რამდემიმე წლის წინ, თეატრალურ ფესტივალზე გაიცნო. შემდეგ თეატრი გასტროლებზე მინსკში გაემგზავრა და თანამედროვე სამხატვრო თეატრში სპექტაკლები გამართა. "ჩვენი თეატრი გახსნილია არა მარტო ბელორუსის ბევრი ქვეყნის დასთან სათანამშრომლოდ, რისი დასტურიცაა ის, რომ ბევრი კოპროდუქცია განვახორციელეთ".

ხოლო თუ რატომ გადაწყვიტა ბელორუსმა რეჟისორმა ახმეტელის თეატრის დასთან "თოლიაზე" მუშაობა და როგორი იყო მისი მიდგომა ამ პიესის მიმართ, თავად უსაკოვი გვეუბნება, რომ "ახმეტელის თეატრში გასაოცარი ახალგაზრდული დასია, თავისებური სულისკვეთების, ცეცხლის, მიმართულების, - სერიოზული სამსახიობო რესურსი თავმოყრილია, ბევრი ნიჭიერი მსახიობი ჰყავთ. გარდა ამისა, "თოლიას" დადგმას თითქმის ყველა თეატრი ცდილობს და მრავალი თეატრისთვის სავიზიტო ბარათია.

"ქართულ თოლია" ვიფიქრე, საინტერესო უნდა გამოსულიყო, რადგანაც აქ ჩეხოვი და აკუნინია შეჯერებული. აკუნინი ხომ გრიგორი ჩხარტიშვილია, ქართველი წარმომავლობის ადამიანი, რომელიც ვფიქრობ, ახლოს არის საქართველოსთან, რომელიც თავისებურად აგრძელებს აკუნინს და წამოწევს, ვერსიას, რომ კოსტია თვითმკვლელი კი არ არის, არამედ შესაძლებელია საქმე მის მკვლელობასთან გვქონდეს. რის გარკვევასაც დოქტორი იწყებს.

ჩეხოვ-აკუნინისეული ვერსიები ერთმანეთს აგრძელებს, თუმცა მოვიფიქრეთ მესამეც, ჩვენეული გაგრძელება, რომ თანამედროვე თეატრის მაყურებელი აღელვებულიყო, გასჩენოდა კითხვები. მნიშვნელოვნია, რომ სპექტაკლი სიტუაციის, პიესის ჩვენეულ, თავისებურ აღქმას წარმოადგენდეს. ასეთი მიდგომა არამარტო აქ, მსოფლიოს ყველა ქალაქში უნდა აინტერესებდეთ".

სპექტაკლში დაკავებულია 13 მსახიობი, რომლებიც რეჟისორმა თავად აირჩია და ჯგუფთან მუშაობით კმაყოფილია. სამუშაოს დაწყების წინ გულდასმით შეისწავლა ქართული თეატრის ისტორია, ჩვენი თეატრების პოტენციალი, მიაჩნია, რომ საკმაოდ მაღალია დღეს ამ თეატრების თამასა. საინტერესო წარმოდგენები აქვთ. ამიტომ, ამ ყველაფრისთვის გულდასმით მოემზადა.

მოკლედ, ცამეტი პერსონაჟი და ცამეტივე მკვლელი,

ყველას ტრეპლევის მოკვლის საკუთარი მიზეზი აქვს. ანტონ ჩეხოვის ერთ-ერთი ყველაზე ცნობილი პიესის "თოლია" ინტერპრეტაცია თანამედროვე მწერლის ბორის აკუნინის თვალით და დეტექტიური პასაჟებითაა დანახული, რომელსაც მსახიობები - სოფია სებისკვერაძე, გიორგი ცხადაძე, ნუგზარ ყურაშვილი, გიგი მიგრიაული, ვერონიკა კალანდარიშვილი, მამუკა მაზავრიშვილი, თამარ ბეჟუაშვილი, მაიკო ვაწაძე, ანდრია გველესიანი, ოთო ჩიქობავა ასახიერებენ.

ანდრია გველესიანი:
- ძალიან საინტერესო სამუშაო იყო, ამას აორმაგებდა უცხოელ (ბელორუს) რეჟისორთან მუშაობა. მადლობა მას და ჩემს მეგობარ მსახიობებს, რომლებმაც ეს ყველაფერი შეძლეს. გაერთიანებულია აკუნინისა და ჩეხოვის "თოლია," ვფიქრობ, საინტერესო ვერსიაა, და მგონი, ასე თუ ისე, ყველამ გავართვით თავი და იმედი მაქვს, მაყურებლამდე სწორად მივიდა.

- ერთ მოქმედებად რატომ გადაწყდა, ვფიქრობ, რომ ცოტა ხანგრძლივი იყო...
- მე რაც მეტხანს დამტოვებენ სცენაზე, უკეთესია... რეალურად კი, ასე რეჟისორმა გადაწყვიტა. იყო ერთი დიდი მთლიანი, რომლის შესახებაც ზოგი ასე ფიქრობს და ზოგი - ისე. მთავარი ის არის, რომ ორივე პიესა მან ასე გააერთიანა. რთული სამუშაო იყო, მაგრამ მადლობა ღმერთს, თავი გავართვით... 

სოფია სებისკვერაძე:
- ეს ყველაფერი რეალურად შავი კომედია გამოვიდა, რადგანაც ორი ავტორი იყო გაერთიანებული. არადა, რეალურად "თოლია" ტრაგედიაა, მაგრამ აქ აკუნინმა მოიტანა ის, რომ იყო იუმორიც იმის ფონზე, რომ ყველა პერსონაჟი სიკვდილს იბრალებს. ტრაგედიიდან კომედიაში გადავდიოდით და ყველაფერს სიმბოლური დატვირთვა ჰქონდა. მნიშვნელოვანია ისიც, რომ 3 კვირაში დავდგით... ენერგია არ დაგვიზოგავს...