"Art-გენი 2017" 10 ივლისს სურამში, ბაიანთხევის ტყე-პარკში რეგიონული ტურნეთი გაიხსნება

მათ, ვისაც მოსწონს ფოლკლორი, ქართული ხალხური მუსიკა, სურს ახალი მომღერლები აღმოაჩინოს, დაისვენოს სასიამოვნო გარემოში და დაესწროს უამრავ სხვა კულტურულ ღონისძიებას, ფესტივალი "Art-გენი 2017" საუკეთესო პროგრამას სთავაზობს. ფესტივალი კომპანიების: "ფარმადეპოს" "აისის" და "თიბისი ბანკის" მხარდაჭერით იმართება. Art-გენის მხარდამჭერები არიან კულტურის სამინისტრო, თბილისის მერია და Chack in Georgia.

ფესტივალი "Art-გენი 2017" 10 ივლისს სურამში ბაიანთხევის ტყე-პარკში რეგიონული ტურნეთი გაიხსნება. რეგიონული ტურნე 12 ივლისს მცხეთაში, მცხეთის ახალ ნავსადგურში გაგრძელდება, რომლის პრეზენტაციაც Art-გენზე შედგება.

Art-გენის თბილისის ტურს 17-24 ივლისს ტრადიციულად ეთნოგრაფიული მუზეუმი უმასპინძლებს. წელს ფესტივალი მაყურებელს საინტერესო სიახლეებს სთავაზობს.

"17 ივლისიდან 24 ივლისის ჩათვლით Art-გენი უმასპინძლებს თბილისის სტუმრებს, ქართველებსა და უცხოელებს. თბილისის მერია ტრადიციულად აგრძელებს ფესტივალის მხარდაჭერას. ეს არის ერთ-ერთ ყველაზე პოპულარული ფესტივალი, მათ შორის ახალგაზრდებშიც. ერთი კვირის მანძილზე ჩვენ ველოდებით ყველა ასაკისა და სხვადასხვა გემოვნების ადამიანებს და მათ ფესტივალი უამრავ სიურპრიზს სთავაზობს" - განაცხადა თბილისის მერის მოადგილემ ნინა ხატისკარმა

როგორც ცნობილია, 17 ივლისს თბილისის ტურს Sophie Villy გახსნის. 18 ივლისს Art-გენის სცენაზე პირველად წარსდგება ჯგუფი Asea sool. 19 ივლისს ფესტივალის მსმენელისთვის რობი კუხიანიძე "აუთსაიდერ" -თან ერთად იმღერებს. 20 ივლისს - ჯგუფი "რეგიონი". 21 ივლისს - ჯგუფი "ფრანი" .

22 ივლისს კი ქართველ და უცხოელ მსმენელს სიურპრიზი ელოდება, Art-გენის სცენა ნინო ქათამაძეს და "ინსაითს" დაეთმობა. 23 ივლისს კი ნიაზ დიასამიძეს და " 33ა" -ს. "Art-გენი 2017" 24 ივლისს "სუხიშვილების" კონცერტით დაიხურება.

ერთი კვირის მანძილზე დღის განმავლობაში ეთნოგრაფიულ მუზეუმში წარმოდგენილი იქნება ქართული ტრადიციული რეწვის გამოფენები. მათ შორის გამოფენა: "მე-19 საუკუნის ქართველთა თვალით დანახული ევროპა". რეგიონების ფოლკლორული კონცერტებიდა "შავფაროსნების" საჩვენებელი შოუ.

ფესტივალი "Art-გენი" 2004 წელს დაფუძნდა. წლების მანძილზე ფესტივალმა მთელი საქართველოს მასშტაბით, უნიკალური ეთნოგრაფიული მასალები მოიკვლია და დააარქივა. მათ შორის დაკარგვის პირას მყოფი ბევრი უნიკალური მასალა.

ფოლკლორის და თანამედროვე მუსიკის ერთ სივრცეში წარმოდგენით და სხვადასხვა ტიპის აქტივობებით Art-გენს ასევე მნიშვნელოვანი წვლილი მიუძღვის ახალგაზრდებში ფოლკლორის პოპულარიზაციის ხელშეწყობასა და რეგიონებში ფოლკლორული ანსამბლების განვითარების საქმეში. ერთ-ერთი პირველი ფესტივალი იყო, რომელმაც რეგიონულ ანსამბლებს თავისი შემოქმედების მთელი ქვეყნის მასშტაბით წარმოჩენის შესაძლებლობა მისცა და განვითარებისთვის მეტი მოტივაცია შეუქმნა.

ფოლკლორის, ქართული რეწვის და თანამედროვე, საავტორო ცოცხალი მუსიკის პოპულარიზაციის გარდა, განსაკუთრებულ მნიშვნელობას ანიჭებს რეგიონულ განვითარებასა და ქვეყნისთვის ისტორიულ-კულტურული, თუ ტურისტული თვალსაზრისით მნიშვნელოვანი ადგილების პოპულარიზაციას.
წყარო: ambebi.ge