• ქართველი ქალბატონები, რომლებსაც მასშტაბურ პროექტებში მოხვედრამ წლების ოცნება აუხდინა

    ზოგჯერ ცხოვრება ოცნებაში გადის იქამდე, რომ ადამიანს ხელიც კი ჩაქნეული აქვს, სანატრელი სურვილის ახდენის იმედს კარგავს, მაგრამ მოულოდნელად ხდება ის, რისიც თავადაც არ სჯერა... დიახ, ნატვრა სრულდება და ამის დასტური იმ რამდენიმე ქალბატონის მაგალითია, რომელთა ცხოვრებაშიც, მიმდინარე წელს მათთვის დაუჯერებელი რამ მოხდა...
    ისინი ცოტა ხნის წინ, თავიანთი ნიჭიერებით ფართო საზოგადოებამ ტელეეკრანის (მასშტაბური პროექტები) საშუალებით გაიცნო და ძალიან მალე შეიყვარა...

    ნანუკა გულუა
    პოპულარული სერიალის "ჩემი ცოლის დაქალების" ერთ-ერთი პერსონაჟის - დოჩი ალიშბაიას როლის შემსრულებელი - ნანუკა გულუა ახდენილი ოცნებით ისეთი გახარებული და იქვე დაბნეულია, რომ ხანდახან არც კი სჯერა იმის, რაც, მის ცხოვრებაში მოხდა: "აქამდე არ მიცხოვრია! ბედნიერიც თურმე არასოდეს ვყოფილვარ... მადლობა ღმერთს, რომ ეს ყველაფერი განვიცადე! სწორ დროს სწორ ადგილას აღმოვჩნდი... მთელი სული, გული და მონდომება ჩავდე, ყველა შიში დავძლიე და თუ გამომივიდა, ე.ი. გავუმართლე იმედი ჩემს აღმომჩენს და მიზანიც ეგ იყო! მიყვარხართ და გასკდა გული ამდენი ემოციისგან!".

    ზუგდიდელი ნანუკა უკვე 16 წელია, თბილისში ცხოვრობს, სამსახიობო განათლება არასდროს მიუღია, თუმცა შინაგანად მსახიობია, ამასთან, მუდმივად ვიღაცის პაროდიას აკეთებდა. სამუშაო გამოცდილება სუპერმარკეტების ქსელში კადრების განყოფილებაში აქვს მიღებული, შემდეგ საკუთარი სამკერვალო ატელიეც გახსნა, კლიენტებს დიზაინის შერჩევაში ეხმარებოდა, საიდანაც პირდაპირ "დაქალებში" აღმოჩნდა. მისი მონაცემები საბოლოოდ შეუმჩნეველი არ დარჩა, რამაც მისი ცხოვრება პრაქტიკულად, მთლიანად შეცვალა.

    ამბობს, რომ ბავშვობიდან რაც უნდა ეკეთებინა, მსახიობობაზე სულ ფიქრობდა, თან, ამ პროფესიას ბევრი უწინასწარმეტყველებდა, მაგრამ საბოლოოდ სამსახიობო ფაკულტეტზე ჩაბარება მამამ არ მოუწონა. რჩევა გაითვალისწინა...

    "როცა გავიგე, როლზე ვიყავი დამტკიცებული და მსახიობებთან ერთად უნდა მეთამაშა, გადაღების წინ, ორი ღამე არ მძინებია. ძალიან ვნერვიულობდი, ვერ ვხვდებოდი, როგორ უნდა შევსულიყავი კონტაქტში მათთან, ერთად უნდა წაგვეკითხა სცენარი თუ ცალ-ცალკე, - არაფერი ვიცოდი... პირველი სცენა ბატონ ზურაბთან (კვაზი) მქონდა. ისე თბილად შემხვდა, რომ პირველივე სცენა გამიადვილდა და დაძაბულობა მომეხსნა," - აღნიშნავს ნანუკა.

    მისმა შთამბეჭდავად შექმნილმა დოჩის სახემ მაყურებელი გააოცა. დღეს ნანუკას დოჩის გარეშე ცხოვრება აღარ შეუძლია.

    ქეთი ხუციშვილი
    ქეთი ხუციშვილიც არა არის მსახიობი და არც კამერასთან მუშაობის გამოცდილება ჰქონდა მანამდე, სანამ "ჩემი ცოლის დაქალები" არ გადაიღეს. პროფესიით იურისტია, მაგრამ არც ამ მიმართულებით უმუშავია. როცა სერიალში, მისმა პერსონაჟმა, კასპელმა მთვარისამ (თბილისში ლუნა დაირქვა), პირველად ქართლურად დაილაპარაკა, გადამღები ჯგუფი სიცილისგან გაიგუდა და მერე კი მისი ეკრანზე ხილვის შემდეგ იგივე მაყურებელს დაემართა. როგორც ქეთი ამბობს, "ფესვებმა თავისი ქნა, წარმოშობით კასპიდან ვარ"... ქეთიც, ისევე როგორც ნანუკა, პაროდიისა და არტისტული უნარებით ბავშვობიდან არის დაჯილდოებული, თავისი კუთხის ხალხის იმიტაცია კი განსაკუთრებით გამოსდის. ამასთან, ბავშვობიდან მღერის, რაც სერიაშიც გამოავლინა.

    მოკლედ, ამ როლით მას ნაოცნებარი აუხდა, - საკუთარი მონაცემების დემონსტრირება საჯაროდ მოახდინა. პოპულარობით გახარებული, თუმცა სერიოზულად დაბნეულია...

    ნანა კუხალეიშვილი
    მსახიობია, მაგრამ თეატრალური ინსტიტუტის დამთავრების შემდეგ, პროფესიით მარჯანიშვილის თეატრში მხოლოდ სამი წელი იმუშავა. შემდეგ დაოჯახდა და 20 წლის განმავლობაში თეატრისკენ არც გაუხედავს, რაც ძალიან აწუხებდა.

    "ბავშვობიდან სცენაზე გავიზარდე და არავის ეგონა, თუ თეატრს ჩამოვშორდებოდი, მაგრამ ასე მოხდა, რასაც თავის მიზეზები აქვს: ბავშვებს დამოუკიდებლად ვზრდიდი და დამხმარე არავინ მყავდა, მერე მშობლები და ერთადერთი და დავკარგე... ბევრი ტკივილი გადავიტანე," - ამბობს ქალბატონი ნანა.

    წლების განმავლობაში, პერიოდულად თურმე ერთი და იგივე სიზმარი ესიზმრებოდა: "ვიდექი სცენაზე და იმ როლს ვთამაშობდი, რომელიც ჩემს პედაგოგთან, ლილი იოსელიანთან მქონდა, მაგრამ უეცრად როლი მავიწყდებოდა და კულისებისკენ ვიხედებოდი, საიდანაც გაბრაზებული ქალბატონი ლილი მიყურებდა თავისი აწეული წარბით და ამის შემდეგ გაღვიძებაც კი კოშმარი იყო, - განვიცდიდი იმას, რომ პედაგოგს იმედები ვერ გავუმართლე"...

    თუმცა ყველაფერი ისე აეწყო, რომ მსახიობი "ჩემი ცოლის დაქალები" კრიმხილდა კაკაჩიას როლზე დაამტკიცეს. ნამდვილი მეგრელი ქალის სახასიათო სახე შექმნა...
    პირველი სცენაც წარმატებული აღმოჩნდა და გადამღებმა ჯგუფმა აპლოდისმენტებით დააჯილდოვა. როლმა 20 წლის შემდეგ, მსახიობს პოპულარობა და მაყურებლის სიყვარული მოუტანა.

    მატილდა კატალია
    მატილდა კატალიამ (ფსევდონიმი, რეალურად, ლელა ჯავახია) "X ფაქტორში" საოცარი ტრანსფორმაციით ფილარმონიაში მაყურებელი აატირა...
    დიახ, მატილდა ამ პროექტით გაიცნეს. ორი შვილის დედამ, 44 წლის ქალბატონმა საკუთარი ძალები დიდ სცენაზე მოსინჯა, როგორც ამბობს, სამზარეულოდან პირდაპირ ფილარმონიაში მივიდა. გამოსვლას ფურორი მოჰყვა - კონკურსანტმა, როგორც უკვე აღვნიშნეთ, საოცარი ტრანსფორმაციით, ჟიური და მაყურებელი აღაფრთოვანა.

    იცოდა, რომ სიმღერა შეეძლო, მაგრამ ასეთ შეფასებასა და შედეგს არ ელოდა. იმ დღემდე, საკუთარი ნამღერით, ფართო აუდიტორიის წინაშე არ გამოსულა. თუმცა, სცენაზე სიმღერა ყოველთვის უნდოდა. სცადა მაშინ, როცა ეს საჭიროდ ჩათვალა... რთული ცხოვრება ჰქონია გავლილი, სიმღერისთვის არასდროს ეცალა. ჯერ სწავლობდა, მერე გავთხოვდა... ერთი შვილი დაეღუპა, რაც მისთვის შოკი და უდიდესი ტრაგედია იყო. შემდეგი შვილის დაბადების მერე ერთი წელი სიარული არ შეეძლო... მიუხედავად იმისა, რომ ის კონკურსს ადრე გამოეთიშა, ოცნება ნამდვილად აუხდა...

    ანა ჩირაძე
    "ჩემი ცოლის დაქალებში" წელს კიდევ ერთი სახასიათო პერსონაჟი - ჩიკა გამოჩნდა, რომელსაც პროფესიით მსახიობი ანი ჩირაძე ასახიერებს. ჩიკა ცხოვრებისგან განებივრებული ქალბატონია, ბიზნესმენის მეუღლე, რომელიც ექსცენტიკულობით გამოირჩევა.

    ანი ჩირაძე მსახიობია, მაგრამ პროფესიით არასდროს უმუშავია. ამ სერიალით კი, მგონი, ყველანაირი დანაკლისი აინაზღაურა... ინტერვიუები არ უყვარს და ჯერ ჟურნალისთან საჯაროდ არც უსაუბრია. თუმცა ანიზე გარკვეული ინფორმაცია მისმა მეგობარმა სერიალსა და ცხოვრებაში ზუზუმ, იგივე ნინო ნოდიამ მოგვაწოდა.

    "ანი მეგობარია, ოჯახებითაც ვმეგობრობთ, მისი ყოფილი მეუღლე ზეზვა ცისკარიშვილი ჩემი ბავშვობის მეგობარია. მთელი ბავშვობა მე და ზეზვას ერთად გვაქვს გატარებული. ანი და მე მეზობლები ვართ, ჩვენი შვილები მეგობრობენ და ბევრი საერთო გვაქვს... მიუხედავად იმისა, რომ დიდი ხანია ვიცნობ, არ ვიცოდი, თუ მსახიობი იყო. თეატრალური ინსტიტუტი აქვს დამთავრებული, გიზო ჟორდანიას ჯგუფი, თავის პროფესიით არ უმუშავია, მუდმივად სხვადასხვა სამსახური ჰქონდა ხოლმე... ჰყავს ერთი შვილი, შესანიშნავი ნიცა ცისკარიშვილი.

    სერიალში ჩიკას დაქალი ვარ. მისი პერსონაჟი ძალიან დეპრესიულია, ხოლო პუსკუნა, ჩემი გმირი ასეთ ადამიანებს ვერ ეგუება. მას ზედმეტად კარგი ცხოვრებისგან დეპრესია სჭირს და ამისგან ცოტას ბოდავს კიდეც... საერთოდ, ასეთ ადამიანებს უნდათ, რომ ეპატაჟური საქციელით გააკვირვონ საზოგადოება და ქალაქის სალაპარაკო გახდნენ. ხშირ შემთხვევაში, ამას ძალით აკეთებენ"...
    მოკლედ, ანი ჩირაძეს, როგორც მსახიობს, მიგვაჩნია, რომ ოცნება აუხდა და მისი ეკრანული დებიუტიც წარმატებით შედგა...
    წყარო: ambebi.ge
    1 554 ნახვა
    16-08-2017, 01:31
    GOGATV

    abezara