ვარჯიში სამუშაო ადგილზე

ყველამ იცის, რომ ვარჯიში სასარგებლოა, მაგრამ ამას ცოტა აკეთებს. თუმცა მოგიწევთ!
კომპიუტერთან მუშაობის გამო თავი ხშირად გტკივათ, კისერი გიშეშდებათ, ზურგი იღლება. დღისით თვლემა გერევათ და ხელის თითები მუდამ გადაღლილია? ეს საგანგაშო სიგნალია და ვარჯიშის გვერდის ავლა არ გამოვა. უმჯობესია დღეში 5 წუთი გამოყოთ, ვიდრე შემდეგ მასაჟისტთან, ნევროლოგთან ან ოკულისტთან დრო და ფული ხარჯოთ. გთავაზობთ ყველაზე მარტივ სავარჯიშოებს.
კისრისთვის. ფეხზე დადექით, ზურგში გასწორდით, ხელები ჩამოუშვით, მხრები და კისერი მოადუნეთ. თავი საათის ისრის მიმართულებით, შემდეგ საწინააღმდეგო მხარეს 5–ჯერ ნელა მიაბრუნეთ. შემდეგ თავი წინ, უკან, მარჯვნივ, მარცხნივ 5–ჯერ დახარეთ.
მხრებისთვის. იმავე პოზაში იდექით, მხრებით წრიული მოძრაობები წინ და უკან 20 წამი გააკეთეთ. შემდეგ მხრები 10 წამი აიჩეჩეთ.
ხელებისთვის. მუშტი უეცრად და ძლიერ 7–ჯერ შეკარით და გაშალეთ. თითოეული თითი ჯერ ერთი, შემდეგ საწინააღმდეგო მიმართულებით მიაბრუნეთ. ხელის მტევნები მაჯებში 10 წამი წრიულად ატრიალეთ (ხელისგულები ხან ზევით, ხან ქვევით).
ფეხებისთვის. მარცხენა ფეხი ასწიეთ, მუხლში მოხარეთ და ქანქარასავით 8–ჯერ გააქანეთ. იგივე გაიმეორეთ მარჯვენა ფეხით.