როგორ შეხვდება მაია ასათიანი ნანუკა ჟორჟოლიანს "რუსთავი 2"-ში

"თუ ვინმე გრძნობს, რომ "იმედში" არ უნდა დარჩეს, იქნებ, ჯობდეს, თვითონ წავიდეს", - პირველი, ვინც ტელეკომპანია "იმედიდან" ნანა პატარკაციშვილის ამ მოწოდებას გამოეხმაურა, ნანუკა ჟორჟოლიანი გახლდათ, რომელმაც ტელეარხი მყისიერად დატოვა.

გავრცელებული ხმებით, პატარკაციშვილების "იმედში" დაბრუნების შემდეგ საინფორმაციო სამსახურის თანამშრომლები უკლებლივ შეიკრიბნენ ამ სამსახურის უფროს მათე კირვალიძესთან და იმსჯელეს, გაეკეთებინათ თუ არა ერთობლივი განცხადება წასვლასთან დაკავშირებით. საბოლოო ჯამში კი გაიმარჯვა აზრმა, რომ მოვლენების განვითარებას დაელოდებოდნენ. "რეიტინგი" კოლეგებს დაუკავშირდა მათი გადაწყვეტილებების შესატყობად.

ლაშა ხარაზიშვილი, "ქრონიკის" წამყვანი:
- ლაშა, რჩები არხზე?
- მე შეხვედრაზე არ ვყოფილვარ, რადგან რადიოს ეთერში ვმუშაობდი, მაგრამ როგორც გადმომცეს, არანაირი პერსონიფიცირება არ ყოფილა. სიუჟეტებს ჩვეულებრივად ამზადებენ ჟურნალისტები, ჩვენ, წამყვანები, ცოტა ხანს ვუსაქმურობთ (იღიმება), თუმცა არავინ აპირებს განცხადების დაწერას. პირდაპირ უთქვამთ, რომ მუშაობა ყველას უნდა გაეგრძელებინა.

- ამბობენ, რომ მათე კირვალიძემ დატოვა საინფორმაციო სამსახურის უფროსის თანამდებობა.
- არა, მათეც აქ არის და ჩვეულებრივად მუშაობს. ტელევიზიიდან არავინ წასულა.

- კონტრაქტები გაქვთ?
- გვაქვს, ზოგს 2-წლიანი, ზოგს 3-წლიანი. მცირე დროით არ არის დადებული. რეორგანიზაციის შემდეგ გაირკვევა ყველაფერი, ისიც გავიგე, რომ შესაძლოა, ახალი ეთერი 7 ნოემბერს დაიწყოს, თუმცა დაზუსტებით ვერ გეტყვით. ველოდებით მოვლენების განვითარებას.

ლელა წიკლაური, "ქრონიკის" ჟურნალისტი:
- ჯერჯერობით არხიდან წასვლაზე საუბარი ნაადრევია, ველოდებით, ახალი მენეჯმენტი რა განცხადებებს გააკეთებს და ამის მიხედვით ვიმოქმედებთ. ჯერ არც ის ვიცით, ვინ იქნება არხის ხელმძღვანელი. თანაც 3-წლიანი კონტრაქტი მაქვს გაფორმებული. მე რიგითი ჟურნალისტი ვარ.

ნოდარ მელაძე, "ქრონიკის" წამყვანი:
- ყველანი ჩვეულებრივად ვაგრძელებთ მუშაობას. ახლაც ტელევიზიაში ვარ.

- საინფორმაციო გადაცემები რომ არ გადის?
- ეს არაფერს ნიშნავს, ჩვენ ვიღებთ ყველაფერს და ვაგროვებთ მასალას არქივისთვის.

- ანუ წასვლას არ აპირებ...
- არავინ აპირებს წასვლას. მივესალმებით ახალი მენეჯმენტის მოსვლას. ნებისმიერ ადამიანს უნდა განვითარებულ და ძლიერ ტელევიზიაში მუშაობა.

- ნოდარ, ბევრს ლაპარაკობენ ჟურნალისტებზე ზეწოლაზე. საინტერესოა, თუ შეგიძლია გაიხსენო, მუშაობის პერიოდში რაიმე ზეწოლის ფაქტი შენზე?
- რა კითხვას მისვამთ?!. ვინ რას და როგორ აშუქებდა, ამისი ფაქტი საინფორმაციო გამოშვებაა, რომელიც ეთერში გადიოდა. რომელი საინფორმაციოს ჟურნალისტი გეტყვით, რომ მასზე ზეწოლა ხდებოდა?!. როგორ ფიქრობთ, ჟურნალისტებთან ვინმე რეკავდა?!.

თამაზ არეშიძე, არხის რეჟისორი:
- მიხარია, რომ "იმედი" კანონიერ მფლობელებს დაუბრუნდა. პირადად მე ძალიან გახარებული ვარ და ბევრი თანამშრომელია გახარებული. "ფეისბუქზე" ტაშისმკვრელები რომ გვიწოდეს, იმას გამოვეხმაურები და ვიტყვი, რომ იქ ტაშს ვინც უკრავდა, რეალურად უხაროდათ ეს ამბავი. არ გამოვრიცხავ, რომ მათ შორის ერთი-ორი ფარისეველიც იყო, მაგრამ ამას დიდი მნიშვნელობა არ აქვს. ძირითადად მაინც გულწრფელი იყო ეს ტაში. რაც შეეხება არხის მომავალს, გვითხრეს, რომ აღდგება საინფორმაციო გადაცემები, ასევე იქნება გასართობი გადაცემებიც და "იმედი" ისეთივე დაბალანსებული გახდება, როგორიც ადრე იყო.

ნიკა დვალიძე, "ცეკვავენ ვარსკვლავების" რედაქტორი:
- ნიკა, თქვენს პროექტს ახალი მენეჯმენტის პირობებში რა ბედი ელის?
- ჩვენ ჩვეულებრივად ვაგრძელებთ მუშაობას. ჩვენთვის არავის არაფერი უთქვამს და ეს საკითხი არ განუხილავთ. არა მგონია, ცვლილებები ამ გადაცემას შეეხოს.

- ნანუკა ჟორჟოლიანმა "იმედი" რომ დატოვა, "ცეკვავენ ვარსკვლავების" ჟიურიში მაინც იქნება?
- არც ამის შესახებ მაქვს ინფორმაცია. მგონია, რომ იქნება.

მას შემდეგ, რაც "იმედის" ჟურნალისტების ამბები შევიტყვეთ, ყოფილ "იმედელებს" დავუკავშირდით.

ირაკლი კაკაბაძე, "ღამის შოუს სტუდია":
- ირაკლი, "იმედის" ახალ მენეჯმენტს თქვენს გადაცემებს ხომ არ შესთავაზებთ?
- ჩვენ ყველა არხს ველაპარაკებით. რადგან "იმედის" მენეჯმენტი ახალი შეცვლილია და გაწამაწიაა, ჯერჯერობით მოვიცდით. არც კი ვიცით, ვის უნდა შევხვდეთ. თუკი სურვილს გამოთქვამენ, აუცილებლად დავილაპარაკებთ.

- თქვენ არ გამოიჩენთ ინიციატივას?
- ამას რა მნიშვნელობა აქვს. ამ არხთან თანამშრომლობის სურვილი გვაქვს. თანაც, ჩვენ ტერიტორიულად ისევ "იმედში" ვართ, ჩვენი აპარატურის დიდი ნაწილი ჯერ კიდევ აქ არის.

გოჩა ტყეშელაშვილი, "ეტალონის" ავტორი და წამყვანი:
- პირადად მე და ყველაზე ეროვნული მედიაპროექტ "ეტალონის" შე­მ­ოქმედებითმა გუნდმა სექტემბრის დასაწყისში პროტესტის ნიშნად დავტოვეთ ტელეკომპანია "იმედი". სხვათა შორის, "იმედში" შექმნილ სიტუაციასთან დაკავშირებით ჯერ კიდევ მაშინ მომიწია ძალიან მწვავედ საუბარმა, როცა უამრავი ადამიანი გატრუნული იყო და ელოდა, თუ რა მოხდებოდა 1-ელ ოქტომბერს. როდესაც პროდიუსერმა ეს გადაწყვეტილება არხის მაშინდელ ხელმძღვანელს გააცნო, მისი მხრიდან იყო შემოთავაზება, რომ თუ "ეტალონი" დარჩებოდა "იმედზე", პროექტს ყველანაირ შეღავათს გაუწევდნენ, მათ შორის ფინანსურს, მაგრამ ეს იმ საკმაოდ მძიმე პერიოდში ჩვენი პრინციპული გადაწყვეტილება გახლდათ და "იმედი" დავტოვეთ. რაც შეეხება პატარკაციშვილების ოჯახისთვის "იმედის" დაბრუნებას, რა თქმა უნდა, ერთმნიშვნელოვნად მივესალმებით ამ ფაქტს, ამ ოჯახთან დიდი ხანია გვაკავშირებს საკმაოდ თბილი და კარგი ურთიერთობა. პროექტი "ეტალონი" კი, ახალი რეალობის გათვალისწინებით, სიამოვნებით ითანამშრომლებს "იმედთან" მას შემდეგ, რაც არხზე ყველაფერი გაირკვევა და დალაგდება.

დიანა ტრაპაიძე:
- დიანა, შეგიძლია რაიმე ურჩიო იმ ჟურნალისტებს, რომლებიც "იმედზე" მუშაობენ?
- ყველა თავის გადაწყვეტილებას ინდივიდუალურად იღებს. მე ვერაფერს ვიტყვი ამაზე. ყველამ მოვისმინეთ პატარკაციშვილების ოჯახის განცხადება, სადაც მათ მოუწოდეს ჟურნალისტებს, რომლებიც მიიჩნევენ, რომ "იმედში" მათი ადგილი არ არის, თავად დატოვონ ტელევიზია. ძნელია ამის გაკეთება, რადგან ვინც ამ მოწოდებას გამოეხმაურება და განცხადებას დაწერს, ამით პირდაპირ აღიარებს, რომ უღირსად იქცეოდა.

- დაბრუნდებოდი ამ არხზე?
- ამ ტელევიზიასთან დაკავშირებით ასეთი შეგრძნება მაქვს - მეტირებოდა, როცა პატარკაციშვილის ოჯახის წევრები მივიდნენ, ჩემთვის ეს ემოციური და ამაღელვებელი მომენტი იყო. ვფიქრობ, ბევრ ცდუნებას გავუძელი და ბევრი რამ გადავიტანე ამ ტელევიზიისთვის. ყოველდღე არჩევანის ზღვარზე ვიდექი და მგონია, რომ არჩევანი საკუთარი თავისუფლების სასარგებლოდ გავაკეთე. ჯერ იმით, რომ 2007 წლის 7 ნოემბრის შემდეგ მაინც დავრჩი "იმედში", მერე კი იმით, რომ წამოვედი, როცა "იმედმა" სახე დაკარგა. ეს ისეთი ისტორია იყო, რომელიც დამთავრდა, წრე შეიკრა და წერტილი დაესვა ამ ამბავს. დღეს საკუთარ თავს "მაესტროში" ვხედავ და კიდევ ერთხელ გამოვხატავ პატივისცემას იმ ადამიანებისადმი, რომლებმაც ასეთ რთულ წლებში შეძლეს და თავისუფალი ტელევიზია ჩამოაყალიბეს.

ზაალ წულუკიძე (ვინი):
- რა გითხრა? პატარკაციშვილების ოჯახის დაბრუნებას დიდი სიხარულით შევხვდი, თუმცა იქ არ მივსულვარ. ამ დღეებში ვაპირებ "იმედელების" მონახულებას. რაც შეეხება არხზე დაბრუნებას, ამაზე არ მიფიქრია. რადგან ოჯახმა დაიბრუნა არხი, პირველ დღეებში ხომ არ მივალ?!. 5 წელი იმის იმედი მქონდა, რომ ისინი დაიბრუნებდნენ ამ არხს, თუმცა თუკი ისევ მივალ "იმედზე", აუცილებლად ჩემი გეგმით, პროექტით.

- შენ თავის დროზე რატომ გაგათავისუფლეს?
- 2010 წლის 1-ელ ივნისს დილის გადაცემა დაიხურა. ჩემს დაბადების დღეზე კი, 5 ივნისს გამომიცხადეს, რომ გათავისუფლებული ვიყავი. მანამდე ბევრჯერ ცდილობდნენ, დაეშალათ ანონსების ჯგუფი, სადაც მე ვმუშაობდი. სხვათა შორის, ეს ის ხალხი იყო, რომლებიც ახლა ახალი ხელისუფლების სხვადასხვა ტელევიზიაში არიან საკმაოდ მაღალ თანამდებობებზე. მერე ისიც კი მოიფიქრეს, რომ ხელფასი სასაცილო თანხამდე შეემცირებინათ და მითხრეს, თუ გინდა, ამ ხელფასზე იმუშავე, თუ არადა, წადიო. მე მაინც დავრჩი, შემდეგ კი თავად გამათავისუფლეს.

- ზაალ, ლაპარაკობენ იმ ზეწოლაზე, რაც იქ მომუშავე ჟურნალისტებზე ხორციელდებოდა, თუმცა ნოდარ მელაძემ ჩვენთან საუბრისას ეს კატეგორიულად უარყო. შენ რისი თქმა შეგიძლია?
- ეს ერთი გუნდი იყო. არა მგონია, მასზე ზეწოლა ყოფილიყო. უბრალოდ, ამბობდა იმას, რასაც მართლა ფიქრობდა. მისი აზრი იმდროინდელი "იმედის" საინფორმაციო პოლიტიკას ემთხვეოდა. ლაშა ხარაზიშვილზე ზეწოლა არ იყო და ისე დათანხმდა მოდელირებული ქრონიკის წაყვანას?!. როდესაც "მოდელირებული ქრონიკა" გავიდა ეთერში, კონცერტზე ვიყავი და იქ შევიტყვეთ ეს ამბავი. ყველა, განურჩევლად იმისა, მიშას მომხრე იყო თუ არა, ამ ტელევიზიას აგინებდა.

წინა კვირას ქართულ პრესაში გავრცელდა ინფორმაცია, რომ შესაძლოა "ნანუკას შოუმ", არც მეტი, არც ნაკლები, "რუსთავი 2"-ის ეთერში დაივანოს. როგორც ამბობენ, ნანუკა უკვე დიდი ხანია, ამის თაობაზე კონსულტაციებს არხის ხელმძღვანელობასთან გადის, თუმცა უცნობია, როგორ ფიქრობს "რუსთავი 2"-ის ხელმძღვანელობა ერთი დელიკატური პრობლემის გადაწყვეტას, იმავე ფორმატის გადაცემა "პროფილის" სახით არხს უკვე აქვს. კომენტარისთვის მაია ასათიანს დავუკავშირდით.

- სიმართლე გითხრათ, პირველი ხართ, ვინც ეს ამბავი მითხრა. აქამდე არაფერი მსმენია ამის შესახებ. საერთოდ, კატეგორიული წინააღმდეგი ვარ გასართობი გადაცემების დახურვის. 2007 წელს თავად ვიწვნიე გადაცემის დახურვის სიმწარე, ამიტომაც ყველა ჟურნალისტს თანავუგრძნობ, ვინც ეს გამოსცადა. თუკი ნანუკას გადაცემა ჩვენთან გადმოვა, მე, როგორც მასპინძელი, მას ღირსეულად დავხვდები. როგორც მასპინძელს, დიდი პასუხისმგებლობა დამეკისრება - დავივიწყო ის შეურაცხყოფა, ტკივილი და დამცირება, რაც ჩვენი ე.წ. "კონკურენციის" სამ წელს ახლდა. დანარჩენი კი ნანუკას გადასაწყვეტია.

ნინო მურღულია

ჟურნალი "რეიტინგი"