მოსკოვში ჩებურაშკას სახლ-მუზეუმი გაიხსნება

მოსკოვში ჩებურაშკას სახლ-მუზეუმს ააშენებენ. ედუარდ უსპენსკის ზღაპრის პერსონაჟის მუზეუმი კოსინსკის პარკში განთავსდება. ამჟამად, პროექტი დამუშავების სტადიაშია და ჯერჯერობით უცნობია, როდის განხორციელდება, ან რა თანხა დაჯდება. ცნობილია, რომ 2013 წელს პარკში უსპენსკის ზღაპრების ბულვარი გაიხსნება.

ამჟამად ჩებურაშკას მუზეუმი კოჟუხოვში საბავშვო ბაღ № 2250-ში ფუნქციონირებს. მთავრობას იმედი აქვს, რომ ჩებურაშკას სახლ-მუზეუმი მოსკოვში ბევრ ტურისტს მიიზიდავს.

პროექტის რეალიზებაში მონაწილეობის მიღება თავად ედუარდ უსპენსკიმაც გადაწყვიტა. იგი მზადაა მუზეუმს რამდენიმე ექსპონატი, მათ შორის საკუთარი საბეჭდი მანქანა, სათამაშოები, ჩებურაშკასა და ზღაპრის სხვა პერსონაჟების სურათები გადასცეს.

ჩებურაშკა - ანთროპომორფული არსებაა, რომელსაც ხშირი ყავისფერი ბეწვით დაფარული დიდი ყურები აქვს. იგი გარეგნობით ყველაზე მეტად ბელს ჰგავს. ედუარდ უსპენსკის წიგნში ნათქვამი არაა, თუ რა არსებაა იგი. ცნობილია მხოლოდ, რომ იგი რაღაც ეგზოტიკური ცხოველია, რომელსაც ფორთოხლის ყუთში ჩაეძინა და დიდ ქალაქში გააგზავნეს. ქალაქში კი ზოოპარკში მომუშავე ნიანგ გენას იცნობს და უმეგობრდება.

1971 წელს ეკრანებზე რომან კაჩანოვის გადაღებული ცნობილი მულტფილმი გამოვიდა.

მომზადებულია lenta.ru-ს მიხედვით.