სოციალური ქსელები ქალებს გახდომის სტიმულს აძლევს

სპეციალურად მათთვის, ვინც ვერა და ვერ გადაწყვიტა დიეტის დაწყება, სოციოლოგებმა გადაწყვიტეს გაერკვიათ, რა მოტივაციით ისარგებლეს მათ, ვინც შეძლო და გამოეთხოვა ზედმეტ კილოგრამებს. მეცნიერებს, მგონი, არც გაკვირვებიათ, როცა დაადგინეს, რომ ამ საკითხში მთავარ როლს სოციალური ქსელები თამაშობს.

თუ ადრე გოგონების უმეტესობა გახდომაზე მხოლოდ მაშინ დაფიქრებულა, როცა პლაჟზე გადაღებულ შარშანდელი ფოტოსთვის შეუდარებია წლევანდელი, ახლა მათ გახდომა იმიტომ გადაწყვიტეს, რომ სოციალური ქსელის პირად გვერდზე ბიკინიში გადაღებული ლამაზი ფოტოები ატვირთონ.

პრინციპში, განსხვავება არაფერშია: ჩვენ ისევ ფოტოებს ვუყურებთ. მაგრამ ახლა მეტი რისკია, რომ კადრებს, რომლებზეც მუცელზე ნაკეცები და თეძოებზე ცელულიტი გვაქვს, მარტო ჩვენ კი არა, მთელი ფრიენდ–ლისტი ნახავს!

იმედგაცრუების ასეთი საშიშროება შექმნა ფეისბუქმა, რაც გახდა მიზეზი, სასწრაფოდ მოვიშოროთ ზედმეტი კილოგრამები. ამ "შიშს" დადებითი მხარეც აქვს: გამოკითხვის ყოველმა მეხუთე მონაწილემ აღიარა, რომ facebook–მა დააფიქრა ის საკუთარ გარეგნობაზე და ამასთან, ჯანმრთელობაზეც.

თუმცა ყოველი მესამე რესპონდენტი გამოტყდა, რომ ჯერაც ვერ გაუბედავს ატვირთოს საკუთარი ფოტო სოციალური გვერდის პირად გვერდზე, ან თუ ატვირთავს, არ მიუთითებს, რომ ფოტოზე თვითონ არის გამოსახული.

გახდომის სხვა მიზეზებს შორის დასახელდა ექიმის რჩევაც. როგორც გამოკითხვამ აჩვენა, ექიმის რჩევა გაითვალისწინა გამოკითხულთა მხოლოდ 14%–მა. როგორც ჩანს, ჯულიან ასანჟმა ტყუილად არ უწოდა facebook–ს "შპიონაჟის უდიდესი მანქანა": ყველა უფრთხის, რომ სოციალური ქსელი მის საიდუმლოს გასცემს და ყველა ნაკლს გამოააშკარავებს.