დათო კენჭიაშვილი: "შეყვარებულისთვის ჯერ არც კი მიკოცნია"

ქართული ხალხური შემოქმედების მოტრფიალეს, ფოლკლორული სიმღერების შემსრულებელ დათო კენჭიაშვილს, პირველი სიყვარული ახლახან ეწვია, მაგრამ მისი რჩეული საქართველოდან შორს, პრაღაში ცხოვრობს. ამიტომ ამ ურთიერთობის მომავალი ჯერ გაურკვეველია, შეყვარებულებს ხელს მანძილი უშლის. დათო ამ გოგონამ შინაგანი ღირსებით მოხიბლა. უბრალოება, გაწონასწორებულობა, სინაზე – ეს ის მთავარი კრიტერიუმებია, რითიც ახალგაზრდა მომღერალი ქალს აფასებს, თუმცა, სამწუხაროდ, თანამედროვე ქართველ გოგონებში ამ თვისებებს ნაკლებად ხედავს.
– დათო, ქალი, რომელსაც მშვენიერს უწოდებთ, როგორია?
– ძალიან უბრალო, გაწონასწორებული და მშვიდი. გოგოს უბრალოებით უფრო მოვიხიბლები, ვიდრე სხვა რაღაცეებით. დღეს გოგოები სულ სხვა რაღაცეებზე ფიქრობენ, სხვა ადამიანები ხდებიან და ალბათ ამიტომაც არის, რომ მეორე ნახევრის არჩევა ძალიან რთულია. სამწუხაროდ, სიყვარული აღარ არსებობს.
– რატომ ფიქრობთ ასე?
– რა ვიცი, დღეს არიან და ხვალ – აღარ... თუმცა არსებობენ ერთეულებიც, რომლებსაც ნამდვილი სიყვარული შეუძლიათ.
– ნამდვილი სიყვარული თქვენთვის რას ნიშნავს?
– ნამდვილი სიყვარული ძალიან ბევრ რამეს მოიცავს. პირველ რიგში, თვალების ციმციმს და თუნდაც იმას, რომ გიხარია, როდესაც თვალს გაახელ და იმ ადამიანზე ფიქრს იწყებ, ვინც ყოველთვის გელოდება. სიყვარულს ჩვენ ვერასოდეს ამოვხსნით. ამ თემაზე რომ ვისაუბროთ და რაღაცის ჩამოყალიბება დავიწყოთ, სისულელე იქნება.
– თქვენ ყოფილხართ შეყვარებული?
– კი. მხოლოდ ერთხელ და ის ადამიანი დღესაც მიყვარს. სამწუხაროდ, დღეს ჩვენ ერთად არ ვართ და ამ თემაზე ლაპარაკი ძალიან მიჭირს, რადგან ამას კიდევ სხვა რაღაცეები მოჰყვება და თავს შევიკავებ. ჩვენ ერთმანეთს არც ისე დიდი ხნის წინ, პრაღაში შევხვდით. ვერ ვიტყვი, რომ ყველაფერს ახლა ვიწყებთ. მან ჩემი გრძნობების შესახებ იცის და არც ის არის ჩემ მიმართ გულგრილი. არ ვიცი, ეს სიყვარული რამდენად რეალურია, რადგან საფუძველი არსაიდან აქვს და არც ის ვიცი, წინ რა ელოდება. ის ჩემგან ძალიან შორს არის, იქაურობას ვერ დატოვებს და ვერც მე წავალ საქართველოდან, რადგან მე ჯერ ხალხს ვჭირდები.
– თქვენი რჩეული ისეთი გოგონაა, როგორც ზემოთ ახასიათებდით, ის თვისებები აქვს, რომლებიც ჩამოთვალეთ?
– ის გარეგნულადაც და ხასიათითაც ძალიან უბრალოა. ღირსეული გოგოა და ძალიან მიყვარს. ეს ყველაფერი იმდენად სუფთაა, თუნდაც გაქრეს, მაინც ტბილ მოგონებად დამრჩება, თუმცა დარწმუნებული ვარ, ეს სიყვარული არ გაქრება. ის ადამიანი ჩემი პირველი და ყველაზე მძაფრი სიყვარულია. იმდენად სუფთა ურთიერთობა გვაქვს, მისთვის ჯერ არც კი მიკოცნია. ძალიან ღირსეული სულის და თითით საჩვენებელი ადამიანია და ჩემგან ასე შორს არ უნდა იყოს.
– რა შეგიძლიათ გააკეთოთ საყვარელი ქალისთვის, რომ თქვენი სიყვარული დაუმტკიცოთ?
– რაც ჩავიფიქრე, აუცილებლად შევასრულებ. შეიძლება ეს მისთვის ვერ გავაკეთო, მაგრამ ჩემს ცხოვრებაში თუ გამოჩნდა ადამიანი, რომელიც შემდგომში ჩემი მეუღლე გახდება, დიდ სიურპრიზს მოვუწყობ. მის სახლთან სცენას ისე ავაწყობ, რომ მას არაფერი ეცოდინება. ყველაფერი ძალიან კარგად იქნება ორგანიზებული და ჩემს მეგობრებთან ერთად კონცერტს გავმართავ. ეს ჩემი ოცნება კი არა, ის არის, რასაც აუცილებლად გავაკეთებ.
– პრაღაში ამის გაკეთება არ სცადეთ?
– უბრალოდ ვერ შევძელი. თბილისში რომ დავბრუნდი, სიყვარულშიც მაშინ გამოვუტყდი. როცა მიყვარს, სხვა ქალების მიმართ ინტერესი აღარ მაქვს. სიტყვა "ქალი" ჩემთვის ძალიან მნიშვნელოვანია.
– როგორია იდეალური ქალი?
– ოთარაანთ ქვრივი სამაგალითო ქალია. მინდა, რომ ყველა ქალი ასეთი იყოს. ქალისთვის ერთგულება მთავარი ღირსებაა. ადამიანი, რომელიც ჩემ გვერდით იქნება, ჩემს სახელზე უნდა ფიქრობდეს. კარგია, როცა ქალი მეტისმეტად ჭკვიანია. ხანდახან მამაკაცზე ჭკვიანიც უნდა იყოს. ეს იმიტომ, რომ კაცი ხშირ შემთხვევაში გადაწყვეტილებას ძალიან მალე იღებს და საქმეს აფუჭებს. ქალს კი ამის დაბალანსება შეუძლია. როცა ცოლი მეყოლება, ჩემს ოჯახში პატრიარქატს არ დავუშვებ.
ქალის შეფასებისას პირველ ადგილზე მის ხასიათს ვაყენებ და სულ არ მაინტერესებს, რა მანქანით დადის. ეს იმიტომ, რომ არასოდეს განვიცდი რაიმეს დეფიციტს. ქალს სილამაზესთან ერთად ცოტაოდენი ინტელექტიც უნდა ჰქონდეს, მაგრამ მთავარი მაინც სულიერი სილამაზეა, რასაც ძალიან ბევრი ნიუანსი განსაზღვრავს – სინაზე, კაცთმოყვარეობა... იცით, როდინდელ ქალზე ვლაპარაკობ? ძალიან ადრე რომ იყვნენ. რატომღაც ძალიან მინდა, რომ ასეთი ქალები დღესაც არსებობდნენ. თუ ასე იქნება, მარტო არ დავრჩები.
– მარტო დარჩენის გეშინიათ?
– არა, მარტო დარჩენის მართლა არ მეშინია. დღემდე როგორც ვიცხოვრე, მომავალშიც ისე გავაგრძელებ ცხოვრებას. მარტოც რომ დავრჩე, ჩემი ხელოვნება მანუგეშებს.
– გოგონების დღევანდელი ჩაცმულობა მოგწონთ?
– იცით, როდის არის ქალი ყველაზე სასიამოვნო შესახედი? როდესაც გრძელი და შავი დაშვებული კაბა აცვია. ამითიც შეიძლება მოვიხიბლო. ქალს კაბა უფრო მეტ ქალურობას სძენს. ყელამდე შემოსილი უღირსი ქალიც ბევრი შემხვედრია. გამომწვევად ჩაცმული ქალი არც მაღიზიანებს და არც ყურადღებას ვაქცევ. მართალია, ცუდი და კარგი ყოველთვის იყო, მაგრამ ეს ყველაფერი ახლა გაცილებით მეტი დოზით იგრძნობა. ადრე ქუჩაში რომ გაგევლოთ, სად ნახავდით გოგოს და ბიჭს, რომლებიც ერთმანეთს კოცნიდნენ? ახლა ასეთი რაღაც ყოველ მეორე კუთხეში ხდება და ეს ჩემთვის მიუღებელია. ვინც უნდა მიმტკიცოს, რომ დღეს 21–ე საუკუნეა და ეს ყველაფერი "მოსულა", აზრს ვერავინ შემაცვლევინებს. ბევრისთვის ეს "მოსულა", მაგრამ ჩემთვის "არ მოსულა".
– ანუ თავისუფალი ურთიერთობების წინააღმდეგი ხართ?
– რა თქმა უნდა. ეს დიდი უაზრობაა! აუცილებელია ქორწინებამდე სექსი? გოგო შეიძლება ცხოვრებაში უნებურად შეცდა, მაგრამ ეს უკვე სხვა საკითხია და, მიუხედავად იმისა, რომ ტრადიციულ ოჯახში გავიზარდე, ამას დიდ მნიშვნელობას არ ვანიჭებ. თავისუფალი ურთიერთობების კი მეშინია. 21–ე საუკუნეში ვცხოვრობთ, მაგრამ რამდენი საუკუნეც უნდა გავიდეს, ამ საუკუნეებს უფალი ქმნის და ის არ უნდა განვარისხოთ! მთელი გულით და არსებით ვეცდები, ასე არასოდეს ვიცხოვრო.
– როგორია თანამედროვე ქართველი ქალი?
– პრინციპული და დღეს უკვე ვითომ უკარება, მაგრამ ამას ყველა ქალზე ვერ ვიტყვი. დღევანდელი ქალების ცხოვრება, სტილი და ხასიათი მე თვითონაც აღარ ვიცი, რას ნიშნავს. დღითიდღე იცვლებიან და ბევრმა თვითონაც არ იცის, რა უნდა. გაიცნობენ ბიჭს, სოციალურ ქსელში წერილს გაუგზავნიან, მერე შეხვდებიან და აღმოაჩენენ, რომ რბილი ლ–თი ლაპარაკობს და ხელს ჩაიქნევენ, ურთიერთობას აზრი არ აქვსო. ეს ყველაფერი რას ნიშნავს? ქართველი ქალების უმრავლესობას უაზრო ხასიათი გაუხდა. მაღიზიანებს ქალი, რომელსაც საკუთარ თავზე დიდი წარმოდგენა აქვს. ბაქიბუქა გოგოები ძალიან მეცოდებიან. ცხოვრებაში გასაქანი არ აქვთ და სხვა გზას რომ ვერ ნახულობენ, იმიჯი უნდა შეიქმნან და ამის ძებნაში და პოვნაში საერთოდ სხვა რაღაც გამოსდით.
– როგორც მივხვდი, აქტიური ქალები მაინცდამაინც არ მოგწონთ. რატომ არის ცუდი, თუ ქალი იჩენს ინიციატივას კაცთან ურთიერთობაში?
– ამ საკითხში დიდი გამოცდილება მაქვს და გეტყვით, რომ ამ დროს ქალის მიმართ ინტერესს ვკარგავ. როცა ვცდილობ, ქალთან სხვადასხვა გზით რაღაცას მივაღწიო და ვხვდები, რომ ამდენი შრომა არ მჭირდება, ის უკვე აღარ მხიბლავს. აქაოდა, ევროპელები ვართო, რას აღარ კადრულობენ.
– ანუ უცხოელებს ბაძავენ?
– კი. უცხოელი ქალები უკომპლექსოები არიან, მაგრამ ისინი სხვა გარემოში, სხვა მენტალიტეტით აღიზარდნენ. რაც გენსა და სისხლში გაქვს, ის უნდა გაამართლო. ქართველი ქალები ამდენი უაზრო სერიალის ყურებამ სულ გამოალენჩა. სტილი და მანერა გადმოიღეს და იმას ვერ ხვდებიან, რომ ეს ყველაფერი ზედმეტად არაბუნებრიობაში გადასდით. ასეთი ქალების ხანდახან მრცხვენია.
– მოუტყუებიხართ ქალს?
– კი არ მოვუტყუებივარ, ქალისგან მე თვითონ მიგრძვნია თავი მოტყუებულად. ასეთი შემთხვევა ერთადერთხელ მქონდა. მეგონა, მიყვარდა, მაგრამ ასე არ ყოფილა. ძალიან მატერიალისტი ადამიანი აღმოჩნდა და თავი შეურაცხყოფილად ვიგრძენი, მაგრამ მივუტევე, ვაპატიე და თავის გზაზე გავუშვი. ამ ამბავმა ძალიან დიდი გამოცდილება მომცა და ქალი ვეღარ მომატყუებს.
– ქართველ ქალებს რას უსურვებდით?
– ისე ეცხოვროთ, როგორც საქართველოს შეეფერება! მეტს ვერაფერს ვიტყვი.
სოფიო ბოჭორიძე