გამონაყარს ბრძოლა "შიგნიდან" სჭირდება

ქავილი, გამონაყარი, ფერიმჭამელები, ფურუნკულები, სხვადასხვა წყლული – ყველაფერი ეს კანის მრავალრიცხოვანი დაავადებების გამოვლენაა. მათგან გათავისუფლება შეიძლება მას შემდეგ, რაც დაავადების შინაგანი მიზეზი დადგინდება და კომპლექსური მკურნალობა ჩატარდება. მხოლოდ მაზებითა და კრემებით ვერაფერს გახდებით.
ეძებეთ მთავარი მიზეზი
კანის ინფექციური დაავადებები (მიკოზები, დერმატიტი და სხვა) მაშინ აღმოცენდება, როდესაც კანის საფარის მთლიანობა ირღვევა ან ჭრილობები, ნაკაწრები, გადაყვლეფილი ადგილები ანტისეპტიკური საშუალებებით არ მუშავდება. მაგრამ მთავარი ისაა, რომ ორგანიზმის იმუნიტეტი დასუსტებულია.
ფერიმჭამელები და ფურუნკულები ნივთიერებათა ცვლის (განსაკუთრებით ცხიმისა და ნახშირწყლების) დარღვევისას ჩნდება.
პიგმენტური ლაქები, მუწუკები, დერმატიტები ხშირად ორგანიზმში ჰორმონული დარღვევებისა და ჰორმონული გარდაქმნის პერიოდში (მოზარდობის ასაკი, ფეხმძიმობა) აღმოცენდება.
ნეიროდერმიტის განვითარების ძირითადი მიზეზი – ნერვულ სისტემასთან პრობლემა, ენდოკრინულ და იმუნურ დარღვევებთან შერწყმული მუდმივი სტრესებია.
სებორეა, კანის მომატებული მგრძნობელობა იმას მოწმობს, რომ ორგანიზმს ვიტამინები (განსაკუთრებით ფ, უ, ზზ და ი ჯგუფის ვიტამინები) და მიკროელემენტები აკლია.
ჭინჭრის ციება, დერმატიტები, რომლებსაც თან ახლავს ქავილი, შეიძლება გამოწვეული იყოს ალერგენების ზემოქმედებით. მათ მიეკუთვნება არამხოლოდ კოსმეტიკური საშუალებები, ასევე სამოსი, განსაკუთრებით სინთეტიკური, ლითონის სამკაულები, მცენარეთა მტვერი.
ფსორიაზის ბუნება ჯერ კიდევ სრულად ახსნილი არ არის. ამ შემთხვევაში გამოიყენება კომპლექსური მკურნალობა, რომელიც არამხოლოდ კანს, ასევე მთელ ორგანიზმს აჯანსაღებს.
რაზე მიგვანიშნებს ფერი?
თითქმის ყველამ იცის, თუ კანმა ყვითელი ფერი მიიღო, მაშასადამე ღვიძლთან ან ნაღვლის ბუშტთან დაკავშირებით პრობლემა აღმოცენდა და საჭიროა ექიმთან სასწრაფოდ ვიზიტი. მაგრამ კანის სხვა ფერის ცვლილებებს ყოველთვის ყურადღებას არ ვაქცევთ. არადა მძიმე დაავადებების გამოვლენაში ესეც გვეხმარება.
ლოყების ლურჯ–წითლად შეფერვა გულის მუშაობაში დარღვევების ნიშანია, მაგრამ, თუ მოლურჯო–მოწითალო ფერის ხდება არამხოლოდ ლოყები, ასევე შუბლის არე და ტუჩები, მაშინ გულის უკმარისობას ფილტვების პრობლემები (ემფიზემა, ბრონქული ასთმა) ემატება.
სახეზე წითელი ლაქები და შეშუპება გულის მუშაობაში სხვადასხვა უთანხმოებაზე მიუთითებს. ლოყებზე თეთრი ლაქები მყარი დაბალი წნევის დროს ჩნდება.
თმის ძირებთან ყავისფერი ლაქები ღვიძლის დაავადებაზე მიუთითებს.
სახის კანის მუქი შეფერილობა, თვალების ქვეშ, ღაწვებზე შავი ლაქები თირკმლის ან შარდის ბუშტის ინფექციური დაავადებების ნიშანია.
კანის მომწვანო ფერი საჭმლის მომნელებელი ან სასუნთქი სისტემის მძიმე დაავადებების, აგრეთვე ნაღველკენჭოვანი დაავადების გართულების სიმპტომია.
საუკეთესო ბალახები კანისთვის
კანის დაავადებების დროს სამკურნალო მცენარეების ბაზაზე დამზადებული საშუალებები წარმატებით გამოიყენება როგორც ოფიციალურ, ასევე ხალხურ მედიცინაში.
კალენდულას ძლიერი ანტიბაქტერიული და ანთების საწინააღმდეგო თვისებები გააჩნია. პრაქტიკულად კანის ყველა დაავადების დროს გამოიყენება. ნაყენი: ყვავილებს (1 წილი) 70%–იანი სპირტი (5 წილი) დაასხით, 2 კვირა დადგით, გაწურეთ. ნაყენი დაზიანებულ ადგილზე შეიზილეთ.
ოროვანდის ფესვები შესანიშნავი საშუალებაა სებორეას, დერმატიტებისა და ეგზემის დროს. მცენარეში უხვად არსებული დუბილური ნივთიერებები ქავილსა და გამონაყარს აქრობს. ფესვების ნახარში წასასმელად და აბაზანისთვის: 1 სუფრის კოვზ დაქუცმაცებულ ნედლეულს 2 ჭიქა ადუღებული წყალი დაასხით, 30 წუთი დადგით, გააგრილეთ და გაწურეთ.
ქრისტესისხლას წვენი ძლიერი ანტიმიკრობული საშუალებაა. იყენებენ ეგზემის, დერმატიტების, ფსორიაზის, კანის ჩირქოვანი დაავადებების დროს. გახსოვდეთ, მცენარე შხამიანია. წვენის მომზადების წესი: მთლიანი მცენარე ყვავილებიანად ხორცსაკეპ მანქანაში გაატარეთ და წვენი გამოწურეთ. 2 წილ წვენზე 1 წილი არაყი ან სამედიცინო სპირტი (1 წილი 4 წილ წვენზე) დაუმატეთ. შეინახეთ გრილ ადგილას.
კანის საყვარელი პროდუქტები
სწორი კვება მეტად მნიშვნელოვანია კანის ჯანმრთელობის დასაცავად. თქვენს რაციონში აუცილებლად უნდა შედიოდეს შემდეგი პროდუქტები:
1. მარცვლეული (ხორბალი, შვრია, წიწიბურა). მათში შემავალი რუტინი კანის ანთებით დაავადებებს აბრკოლებს.
2. თხილეული (ნუში, თხილი, ნიგოზი) ბევრ უ ვიტამინს შეიცავს, რომელიც დაბერების პროცესის დამაჩქარებელ მავნე თავისუფალ რადიკალებს ებრძვის.
3. რძის მჟავე პროდუქტები (იოგურტი, კეფირი, მაწონი).
4. თევზი და ზღვის სხვა პროდუქტები (მათში არსებული ცხიმმჟავები კაპილარებს ამაგრებს და კანს კვებავს).
5. წითელი და მწვანე ბოსტნეული (კოლაგენის წარმოქმნას ეხმარება).
6. მწვანე ჩაი (ორგანიზმიდან ტოქსინები გამოაქვს).
7. ზეითუნისა და სელის ზეთები ცხიმმჟავა ომეგა–3–ის, ფ და უ ვიტამინის წყაროა. მათი ნაკლებობა კანის სიმშრალეს, დერმატიტებსა და ეგზემას იწვევს.