30, 40, 45 წელი: როდის უნდა ავტეხოთ განგაში?

ამბობენ, რომ ყველა ქალს სამი ასაკი აქვს: მოჩვენებითი, რეალური და ის, რომელსაც ის მიიწერსო. მოდი, გავარკვიოთ, რომელი ციფრები გვაშინებს ყველაზე მეტად და რატომ.

როცა 17-ის ხარ, გგონია, რომ 30 - ეს სულაც არ არის საშიში, იმიტომ, რომ... უბრალოდ, ამდენ ხანს არ ცოცხლობენ. "გადარჩენილები" ხშირად ჩივიან, რომ ფსიქოლოგიურად ძნელია ხმამაღლა აღიარო ის, რომ ცხოვრების მეოთხედზე მეტი გავლილი გაქვს.

რა გვაშინებს: ზრდის აუცილებლობა და საკუთარ ცხოვრებაზე პასუხისმგებლობის აღება. განსაკუთრებით შეშფოთებულები არიან ისინი, რომლებიც არ შეესაბამებიან სოციუმის იმ მითიურ წარმოდგენას, რომ 30 წლის "უნდა" იყო გათხოვილი და, დაწვრილშვილებული თუ არა, ერთი შვილის მშობელი მაინც.

გასაგებია, რომ კითხვაზე "რატომ?" სრული პასუხი არ არსებობს, მაგრამ დაძაბულობა მაინც შესამჩნევია.

რა გავაკეთოთ: შეცდომაა იმოქმედო იმიტომ, რომ სხვისი იმედები გაამართლო. იფიქრეთ, რომ... ძალიან კარგია, იყო ქალი 30 წლის ასაკში. სავსებით შესაძლებელია, სწორედ ამ ასაკში იპოვო 10 წლით უფროსი ან 10 წლით უმცროსი მამაკაცი.

წარმოიდგინე, როგორი დიაპაზონია, რამხელა შესაძლებლობები! 20 წლის გოგონას სად აქვს ამის შანსი? და სერიოზულად თუ ვიტყვით, ხშირად გაუმეორეთ საკუთარ თავს, რომ პასუხისმგებლობა - ეს მედლის ერთი მხარეა და ისიც იმას გულისხმობს, რომ საშუალება გეძლევა, ის გადაწყვეტილება მიიღო, რომელსაც თავად თვლი საჭიროდ, მხოლოდ შენ ხარ საკუთარი ცხოვრების გამგებელი. რაც უნდა თქვა, ძალაუფლება და პასუხისმგებლობა - ეს ერთი და იგივეა.

3 ეტაპი, რომელიც ყველა ქალმა უნდა გაიაროს

ყველაფერი იქიდან იწყება, როცა დგები სარკის წინ და აღმოაჩენ, რომ ის იტყუება! ანარეკლი არა მარტო არ გახარებს, არამედ საერთოდ არ ემთხვევა შენს შინაგან განწყობასა და საკუთარი თავის აღქმას. შინაგანად - შენ კვლავ მშვენიერი და ახალგაზრდა ქალი ხარ, მაგრამ რატომღაც სულ სხვანაირად გამოიყურები. აი, როგორ აფასებს დაბერების პროცესს ცნობილი გერმანელი ფსიქოთერაპევტი დორის ვოლფი:

"ქალები სხვადასხვანაირად ბერდებიან, მაგრამ ის სამი ფსიქოლოგიური ეტაპი, რომელსაც ისინი გადიან, უმეტესწილად, ერთნაირია. ყველა ვერ გაივლის ამ გზას ბოლომდე. ვიღაც აუცილებლად "გაიჭედება" პირველ ორ ეტაპზე.

1 ეტაპი. მოატყუო ასაკი

ქალები, რომლებიც ცდილობენ, მოატყუონ ასაკი, იცვამენ, როგორც პატარა გოგოები; იკეთებენ ახალგაზრდულ მაკიაჟს; ისინი იყენებენ ყველანაირ კოსმეტიკურ საშუალებას, რომელსაც აწერია Anti-age; ისტერიკულად სვამენ ვიტამინებსა და ბად-ებს; სხედან ჯადოსნურ დიეტებზე; იკეთებენ ბოტოქსსა და ლიფტინგს იმ იმედით, რომ დრო გაჩერდება ან უკან დაბრუნდება.

უარს არ ამბობენ სექსუალურ თავგადასავლებზე, თუნდაც ეს იყოს არა სექსი სექსის სურვილით, არამედ თვითდამკვიდრების მცდელობა.

ასეთი ქალები კატეგორიულად არ განიხილავენ სიბერეს. დარწმუნებულები არიან, რომ თავიანთ ბიოლოგიურ ასაკთან შედარებით ბევრად ახალგაზრდად გამოიყურებიან. სიამოვნებით ისმენენ კომპლიმენტს თემაზე "რა ახალგაზრდულად გამოიყურები".

ზოგიერთი დაბადების დღესაც აღარ აღნიშნავს (ან გამუდმებით ზეიმობს 25 წელს) და მალავს თავის ასაკს (ყოველ შემთხვევაში, ვარსკვლავები სწორედ ასე იქცევიან).

2 ეტაპი. მიეცით გასაქანი გრძნობებს

ამ ასაკში ქალებს შურთ პატარა გოგოების, ვერ იტანენ საკუთარ სხეულსა და ნაოჭებს. ზოგიერთი თავის მოვლასაც ანებებს თავს.

ამის შემდეგ მოდის "შეგუების" ეტაპი, იმ ქალის როლის შესისხლხორცება, რომელმაც ყველაფერი უკან მოიტოვა. ამ პერიოდის ტიპური ემოციაა - საკუთარი თავის სიბრალული. შემდეგ ჩნდება მომავლის, სიკვდილის შიში. შემდეგ დგება დრო წუწუნის, ბრალის დადებისა და რიტორიკული შეკითხვის: "რა უაზრობაში გავლიე მთელი ცხოვრება?!"

3 ეტაპი. მოიპოვო წონასწორობა

ამ ეტაპზე ქალები აღარ მალავენ ასაკს და თვითშეფასებაც უფრო მაღალი აქვთ. მეტიც, ამ დროს უკვე დადებით მომენტებსაც პოულობენ - ცხოვრებისეული გამოცდილებისა და სიბრძნის მიღებას.

და რაც მთავარია - სინამდვილეში არანაირი მნიშვნელობა არ აქვს, პასპორტში დაბადების წელში რა რიცხვი გიწერია.

უბრალოდ, გაითვალისწინე, რომ თანდათანობით მნიშვნელობა ენიჭება არა გარეგნობას, არამედ დადებით გამოსხივებას (შეიძლება ვუწოდოთ ქარიზმა ან უფრო ეზოთერულად - შინაგანი ბრწყინვალება).

ის უფრო შესამჩნევი მაშინ ხდება, როცა ჰარმონიაში ცხოვრობ საკუთარ თავსა და შენს ასაკთან და სიამოვნებას იღებ ცხოვრებისგან ზუსტად იქ და სწორედ იმ დროს. ერთხელ playboy-ს დამაარსებელმა ჰიუ ჰეფნერმა თქვა, რომ ასაკი - ეს ციფრი კი არა, ცხოვრებისეული პოზიციააო და მას არ შეიძლება არ დაეთანხმო.

ჟურნალი "და ქალი"