"მე კვლავ შევხედავ ცხოვრებას "პროფილის" თვალით"

მასზე ბევრს ჭორაობენ, ბევრს უყვარს, ბევრიც აკრიტიკებს, თუმცა საქართველოში გასართობ შოუებში მისი საავტორო გადაცემა "პროფილი" ყველაზე რეიტინგულია. მაია ასათიანმა "პროფილის" მეათე სეზონი ახალი სტილის სამოსით, ახალი იდეებითა და უამრავი სიურპრიზით გახსნა.

- სწორედ "პროფილის" ახალი სეზონის გახსნის წინ გავრცელდა ციხეებში პატიმართა წამების ამსახველი შოკის მომგვრელი ვიდეომასალა და ასეთ დროს სეზონის ზარ-ზეიმით გახსნა ჩემი მხრიდან ამორალური საქციელი იქნებოდა. მადლიერი ვარ "რუსთავი 2"-ის ხელმძღვანელობის, რომელმაც ჩემი თხოვნა გაითვალისწინა და სეზონი მოგვიანებით გავხსენით...

- მაია, შევამჩნიე, რომ ბევრი ტელეწამყვანისგან განსხვავებით, მაყურებლის ზარს პასუხობ. ეს დამღლელი არ არის?
- ჩემი პროფესია მაყურებელთან ურთიერთობაა. პირველ კურსზე სწავლის პერიოდში ჟურნალისტიკის ფაკულტეტის დეკანმა, ბატონმა ნოდარ ტაბიძემ გვითხრა: რაც შეიძლება მეტი იარეთ ქუჩაში, იმგზავრეთ მეტროპოლიტენით, იარეთ ქალაქის გარეუბნებში და იქ შეხვდებით ნამდვილ ადამიანებს, წააწყდებით ისეთ თემებს, რომლებსაც ვერასდროს დაინახავთ კომფორტული ავტომანქანების ფანჯრებიდანო. ბატონი ნოდარის სიტყვები დღემდე მეხმარება, მოვამზადო ისეთი გადაცემა, როგორიც მაყურებელს სურს. თუმცა მაქვს მთავარი პრინციპი - არ დავარღვიო მორალური ნორმები და არავის ვავნო. მათ გასაგონად კი, ვინც ხუმრობს ცრემლზე, რომელიც "პროფილში" უხვად იღვრება, ვიტყვი, რომ ეს ყველაფერი შოუსთვის არ არის მოგონილი, გულწრფელი ცრემლია. სწორედ "პროფილმა" დაამკვიდრა სატელევიზიო სივრცეში საქველმოქმედო თემატიკა, რამაც უამრავი ადამიანის ცხოვრება სასიკეთოდ შეცვალა. ამისთვის კი ნებისმიერი ლანძღვის და ტალახის სროლის ატანა ღირს.

- მაია, ახალ სეზონში ახალი სტილის სამოსით გამოგვეცხადე...
- მეამაყება, რომ ყოველთვის ერთი დიზაინერის, ავთანდილის შექმნილი სამოსი მაცვია. პირველ სეზონზე 1960-იანი წლებისთვის დამახასიათებელი სტილის სამოსი მეცვა, შემდეგ - კოქტეილის კაბები, მოგვიანებით ეს ყველაფერი ოდნავ სექსუალური გავხადეთ, წელს კი ჩემი სტილის გათანამედროვება და გაახალგაზრდავება გადავწყვიტეთ. ვერ ვიტყვი, რომ ჩემი თავით და ახალი სტილით ძალიან კმაყოფილი ვარ, მაგრამ ბედნიერებაა, რომ მაღალი ქუსლებიდან ჩამოვედი და თავისუფლად დავდივარ.

- საზოგადოება ამ ცვლილებას არაერთგვაროვნად შეხვდა...
- დიახ, იყო რჩევები, შენიშვნები, ტრადიციული ლანძღვა-გინებაც, მაგრამ არა უშავს, ხდება ხოლმე (იღიმის). ამ მხრივ ისეთი ძლიერი იმუნიტეტი გამოვიმუშავე, რომ ლანძღვა-გინებას ადვილად ვიტან და ჭიქაში ქარიშხლის ატეხით ვერავინ ვერაფერს დამაკლებს. გვირაბის ბოლოს ყოველთვის სინათლეს ვხედავ...

- სოციალურ ქსელებშიც საკმაოდ მწვავედ გაკრიტიკებენ...
- წერის მანერით ვხვდები, ვინ, რატომ და რა მიზნით წერს ჩემზე ათასგვარ საშინელებას. ამიტომ, თუ ვინმეს სურს, გული მატკინოს, ვეტყვი, რომ ამაოდ ირჯება, ასეთ რამეებს უკვე შევეჩვიე. ამ კომენტარების ავტორებს კი ვეტყვი: გამარჯობა, მე თქვენ გიცნობთ და გხედავთ (იღიმის)!

- 2007 წლის 7 ნოემბერს ტელეიმედის სხვა ჟურნალისტებთან ერთად ძალადობა შენც იგემე. დღეს რა განცდა გაქვს?
- გეტყვით, რაც აქამდე არავისთვის მითქვამს. 2007 წლის 7 ნოემბრის გახსენებისას ყოველთვის დიდ ტკივილს განვიცდი. ამ დღის შემდეგ უამრავი რამ გავაცნობიერე და გადავაფასე. იმხანად საკმაოდ კრიტიკული სიუჟეტების მომზადება მიწევდა და მივხვდი, როდესაც პოლიტიკურ მედიაში მუშაობ, ძალაუნებურად რომელიმე პოლიტიკური ძალის წისქვილზე ასხამ წყალს და შენს პროფესიონალიზმს მავანი თავის სასარგებლოდ იყენებს. როცა 7-მა ნოემბერმა ჩაიარა, ჩემს თავს პირობა მივეცი, და ამ პირობის ერთგული ვიქნები სიცოცხლის ბოლომდე - არასდროს არავის წისქვილზე აღარ დავასხამ წყალს... ამ დღეს ყოველთვის ეკლესიაში მივდივარ და ღმერთს მადლობას ვწირავ, რომ გადამარჩინა ფიზიკურად და სულიერად - არავისზე გავბოროტდი, არ ავივსე ბოღმით და მომეცა საშუალება, გამეგრძელებინა ჩემი საქმე.

- მაია, "ნანუკას შოუს" დახურვის შემდეგ უკონკურენტოდ დარჩი...
- გადაცემის დახურვა გამოცდილი მაქვს და ვიცი, რა მტკივნეულიც არის... ის, რომ სატელევიზიო რეიტინგებში "პროფილი" ყველას უსწრებს, მათ შორის მაღალბიუჯეტიან გადაცემებსაც, კონკურენტების დამსახურებაა, რადგან კონკურენციის პირობებში მობილიზებული ხარ და გაქვს სტიმული, საუკეთესო იყო.

- მას შემდეგ, რაც ტელეეკრანზე ახალი სამოსით გამოჩნდი, ნანუკა ჟორჟოლიანმა შენი ფოტო სოციალურ ქსელში თავის ინტერნეტგვერდზე დადო და იქვე მიგითითა, სად შეგეძლო დახეული ჯინსის შეძენა.
- მაია ასათიანი მზად არის, აიტანოს ათასგვარი დამცირება და შეურაცხყოფა, დადგეს ამ ყველაფერზე მაღლა და მსგავს გამოხტომებს არ უპასუხოს.

- ნანუკასთან კონფლიქტი გაქვს?
- კონფლიქტი არავისთან მაქვს, რადგან ვიცი, ვისი გორისა ვარ და ჩემი წინაპრების ხსოვნას არასოდეს შევბღალავ. ამიტომ უღირს საქციელს ასეთივე ფორმით არ ვუპასუხებ. ამაზე მეტიც ამიტანია, კიდევ მეტის ატანაც შემიძლია.

- ითქვა, ნანუკა ჟორჟოლიანი ტელეკომპანია "რუსთავი 2"-ზე გადადისო.
- ეს მეც შევიტყვე პრესის საშუალებით. რატომღაც ყველა მე მეკითხებოდა აზრს. არადა, ამ კითხვას ნანუკამ უნდა უპასუხოს. შემიძლია დავივიწყო ყველაფერი, რაც ახლდა ჩვენს ე.წ. კონკურენციას - დამცირება, ჩემი რეპუტაციის შელახვა... მე ნანუკას ღირსეულ მასპინძლობას გავუწევ და მოვუხსნი იმ უხერხულობას, რომელიც, შესაძლოა, მას აქ მოსვლისას ახლდეს. თუ ვინმეს ჰგონია, რომ ნანუკას ბარიერებს შევუქმნი, ვიტყვი, რომ მასზე ნაწყენი ვარ და ჩვენ ერთად ვერ ვიმუშავებთ, ცდება. ასე რომ, ნანუკას გადასაწყვეტია, მოვა თუ არა. მე თუ მკითხავთ, "ნანუკას შოუ" მართლაც კარგი გადაცემაა და ამას მაყურებლის პოზიციიდან ვამბობ. უბრალოდ, ერთი თხოვნა მაქვს იმ ადამიანებისადმი (ვგონებ, ადამიანისადმი), რომლებიც ინტერნეტგვერდზე აქტიურად მიტევენ და მემუქრებიან, ჩვენ მოვალთ და "პროფილს" დაგიხურავთო. მათ გასაგონად ვიტყვი: მე ისეთ ქარცეცხლში გამოვიარე, ლანძღვა-გინება და მით უმეტეს მუქარა ჩემზე არ მოქმედებს. ომამდე ტანკისტი ვიყავი (იცინის).

- მაია, მართლა ასე ფიქრობ?
- სხვა გამოსავალი არ მაქვს და ასე უნდა ვიფიქრო. იმიტომ, რომ მე მე ვარ, ცხოვრება უნდა განვაგრძო და არ უნდა შემრცხვეს ადამიანებისთვის თვალებში ჩახედვა. მთავარი ეს არის. მე კვლავ შევხედავ ცხოვრებას "პროფილის" თვალით!

- პირად ცხოვრებაზე არასდროს საუბრობ...
- ამჟამად ჩემი პირადი ცხოვრება ისეთი მოსაწყენია, რომ მაია ასათიანს გადაცემაში არ დავპატიჟებდი (იღიმის). თუ რაღაც შეიცვლება ჩემს ცხოვრებაში, ამას მაყურებელი თავისთავად მიხვდება. პირობას გაძლევთ, როდესაც ვინმე შემიყვარდება, არც დავმალავ და ვერც დავმალავ. შეიძლება ითქვას, რომ სიყვარულში საკმაოდ ხანგრძლივი პაუზა მაქვს. ასეც ხდება ხოლმე, რადგან ღმერთი ყველაფერს ერთბაშად არ გაძლევს. არ ვამბობ, რომ ეს კარგია ან ცუდი. უბრალოდ, ასე მოხდა, არც ვწუწუნებ. ვერ ვურთიერთობ ადამიანებთან, რომლებიც მაია ასათიანად აღმიქვამენ. ჩემი წარმატება კარიერაში, სამწუხაროდ, ჩემს პირად ცხოვრებაზე აისახა. მაკომპლექსებს ჩემი პოპულარობა და ეს არის ჩემთვის ერთგვარი ბარიერი. კლასიკური დაკომპლექსებული ქართველი ქალი ვარ. ჩემი სიყვარული იცით, როგორია? "შერეკილებში" ცათმფრენი რომ მიფრინავს და გია ყანჩელის საოცარი მუსიკის ფონზე ვარდების თაიგულს რომ ისვრიან "ეჰ თამუნია, თამუნია"... - ეგეთია ჩემი სიყვარული.

ინტერვიუ: "ეჰ, თამუნია, თამუნია... ეგეთია ჩემი სიყვარული"

ნინო მაისურაძე
ყოველკვირეული გაზეთი "ყველა სიახლე"