ჯულიანა ბარ–გნარი: "პირველ ორ ტურში ჯაბა ნერვებს მიშლიდა"

მხიარული, აქტიური ჯაბა კილაძე და მისი მომხიბვლელი პარტნიორი, ჩუმი და მორიდებული ჯულიანა ბარ–გნარი, პროექტში "ცეკვავენ ვარსკვლავები" ერთმანეთს ავსებენ, თუმცა ხანდახან ისეც ხდება, რომ ჯაბა მეწყვილეს არ უჯერებს და აბრაზებს. "სარკესთან" თვითონვე გამოტყდა, რომ თავიდან კონკურსს სერიოზულად არ უდგებოდა, მერე და მერე შევიდა აზარტში და სურს, მაყურებლებს იმედი არ გაუცრუოს. ჯულიანა უფროა განცდებში. პროფესიონალმა მოცეკვავემ ერთხელ უკვე გამოსცადა იმედგაცრუება, როცა პროექტის პირველ სეზონზე პირველივე ტურიდან აჩიკო მეფარიძესთან ერთად გავარდა. ახლა, როცა შედეგების გამოცხადებისას, ასო "ჯ" ესმის, ემოციებისგან გული ლამის საგულედან ამოუვარდეს.
როცა "სარკე" ჯულიანას და ჯაბას ინტერვიუსთვის ეწვია, ისინი სარეპეტიციო დარბაზში მეოთხე ტურისთვის ემზადებოდნენ. როგორც აღმოჩნდა, მათი გრაფიკი ძალიან დამღლელი და რთულია.
ჯულიანა: დღეში ორჯერ ორ–ორ საათს ვვარჯიშობთ. აქ დილით და გვიან საღამოს მოვდივართ.
ჯაბა: ეს რეჟიმი ძალიან რთულია და ამიტომაც გასული სამი ტური ისეთი ვერ ვიყავი, როგორიც საჭირო იყო. ამ ყველაფერს ნაკლებ დროს ვუთმობდი. ახლა კი ძალიან მოვინდომე და მინდა, კარგი ცეკვები გამოგვივიდეს. ვიღაცას შეიძლება შეუძლია, ცეკვა ერთ საათში ისწავლოს, მე კი ცოტა მეტი დრო მჭირდება, ამიტომ ინტენსიური ვარჯიში მიწევს. ეს კი დამღლელია, მაგრამ, მეორე მხრივ, კარგია, ფორმაში ჩავდექი, გავხდი. მსუქანი არასდროს ვყოფილვარ, თუმცა ახლა, დილით რომ ვდგები, ვხვდები, რომ უკეთესად ვარ.
– თეატრალურშიც ხომ სწავლობდით თავის დროზე ცეკვას?
ჯაბა: თეატრალურ უნივერსიტეტში სასწავლო პროგრამაში რამდენიმე ცეკვის სწავლა შედიოდა. ამისთვის კვირაში ერთი თუ ორი საათი იყო დათმობილი და ისიც დილის 8 საათზე. დიდი ყურადღებით არ ვეკიდებოდი, მხოლოდ საგამოცდოდ ვემზადებოდი. არასდროს მქონია სურვილი ან პრეტენზია, რომ ცეკვებში მონაწილეობა მიმეღო.
– ამ პროექტში მონაწილეობას როგორ დათანხმდით?
ჯაბა: მოგატყუებთ, რომ გითხრათ, ეს თავიდანვე ძალიან მინდოდა–მეთქი. დროც არ მქონდა, არ მეცალა, ვიცოდი, რომ ჩემი პროფესიის გამო სექტემბერ–ოქტომბერი დატვირთული ვიქნებოდი. თან ფესტივალზე წასვლა მიწევდა და ვიყავი კიდეც. ამ ყველაფრის გათვალისწინებით, ვთქვი, რომ პროექტში მონაწილეობას ვერ მივიღებდი. ერთ–ერთი პროდიუსერი ჩემი მეგობარია, რომელმაც ძალიან იაქტიურა და დამპირდა, რომ თუ მონაწილეობას მივიღებდი, ყველანაირად შემიწყობდა ხელს. იდეა მეც მომეწონა და დავთანხმდი.
– პროექტის წინა სეზონს თვალს თუ ადევნებდით და თქვენი მეწყვილის, ჯულიანას შესახებ თუ იცოდით?
ჯაბა: ვუყურებდი–მეთქი, რომ გითხრათ, მოგატყუებთ. დროის უქონლობის გამო ბევრ რამეს ვერ ვუყურებ ტელევიზორში, საკუთარ თავსაც კი. ჯულიანას შესახებაც არ ვიცოდი. "იმედში" მეწყვილის გასაცნობად რომ მივედი, ჯულიანა გამაცნეს. ყველა მეუბნებოდა, ვაიმე, რა მაგარი მეწყვილე გყავსო. მივხვდი, რომ ჯულიანა მართლა მაგარი იყო. მერე, საქმეშიც რომ ვნახე, საერთოდ ძალიან მაგარია!
– ჯულიანა, ალბათ თქვენთვის, ჯაბასგან განსხვავებით, ორმაგად მნიშვნელოვანი იქნებოდა, თუ ვინ იქნებოდა თქვენი მეწყვილე, რადგან წინა სეზონში ამ პროექტში თქვენი მონაწილეობა, სამწუხაროდ, პირველივე ტურში დამთავრდა.
ჯულიანა: რა თქმა უნდა. როცა გავიგე, რომ ჯაბასთან ვიცეკვებდი, ძალიან გამიხარდა. როგორც "სარკესთან" ადრინდელ ინტერვიუში ვთქვი, ჯაბას პირადად არ ვიცნობდი, მაგრამ მის სპექტაკლებზე დავდიოდი. ვფიქრობდი, რომ ახალგაზრდაა, თან მსახიობია და ცეკვა გამოუვიდოდა. დიდი იმედი მქონდა, რომ პირველივე ტურებიდან არ გავვარდებოდით.
– ამართლებს ჯაბა თქვენს მოლოდინს?
ჯულიანა: ახლა უფრო ამართლებს.
– თუმცა პირველ ტურებში ჟიური თქვენი მისამართით საყვედურებს და კრიტიკას არ იშურებდა.
ჯაბა: პირველ რიგში, როცა რაღაც დონეზე საყვედურს იღებ, ამაში ალბათ შენ ხარ დამნაშავე. შეიძლება ჟიურის შენიშვნა არცთუ ისე სასიამოვნო იყოს, მაგრამ მე ვთქვი კიდეც, რომ თავიდან ცეკვას რაღაცეებს ვაკლებდი. ალბათ ამ ყველაფერს სერიოზულად არ ვუდგებოდი. მოხდა ისე, რომ მე და ჯულიანა აუტსაიდერებში მოვხვდით, მაგრამ ხალხმა გადაგვარჩინა. ამან ჩემში გარკვეული როლი ითამაშა. მივხვდი, რომ ხალხს უნდოდა, ჩვენთვის ეყურებინა და მე კიდევ ამ ყველაფერს ისე არ ვუდგებოდი, როგორც საჭირო იყო. ამის შემდეგ ძალიან მოვინდომე და გასულ ტურში ოდნავ უკეთესი შედეგი ვაჩვენეთ. მინდა, რომ ეს ტემპი შევინარჩუნოთ.
ჯულიანა: აუტსაიდერებში ყოფნა ჩემთვის ძალიან რთული იყო. როგორც აღნიშნეთ, პირველ სეზონში პირველივე ტურიდან გავვარდი. აქ მეორე ტური იყო და თავს ვიმშვიდებდი, რა გინდა, ორი ტური მაინც იცეკვე–მეთქი. რატომღაც დარწმუნებული ვიყავი, რომ ჩვენ გავვარდებოდით. ნანიკო ხაზარაძე საკმაოდ ძლიერი კონკურენტი იყო. ამიტომ ვეგუებოდი იმ აზრს, რომ პროექტს დავტოვებდი. მორჩა, ჯული, დამთავრდა–მეთქი, ვფიქრობდი. გამოცხადებისას პირველი ასო "ჯ" რომ გავიგე, ეს ჩემთვის შოკი იყო. სიხარულისგან მეცხრე ცაზე ვიყავი!
ჯაბა: აუტსაიდერებში რომ გამოგვაცხადეს, თავიდან არ ვნერვიულობდი, მაგრამ ბოლო ათი წამის ათვლა რომ წავიდა, ძალიან ცუდი შეგრძნება დამეუფლა. ეს რაღაცნაირი ადრენალინიცაა, მაგრამ სურვილი აღარ მაქვს, ასეთი რამ კიდევ გამოვიარო.
ჯულიანა: ბოლო ტურში ჯაბას მიდგომა ცეკვისადმი ძალიან მომეწონა. ცეკვა ჩემთვის ყველაფერია. შეიძლება სხვა პროფესიას ვეუფლები და ვსწავლობ, მაგრამ ამ ცხოვრებაში ცეკვა ჩემი სული და გულია. როცა სხვა ადამიანი ამ საქმეს ჩემთან ერთად აკეთებს და ვხედავ, რომ არასერიოზულად უდგება, მასთან ერთად მუშაობა არ შემიძლია. ტანგოს რომ ვამზადებდით, დავინახე, რომ ჯაბა ამ ყველაფერს სხვანაირად უდგებოდა. ტანგო განა მხოლოდ ვიცეკვეთ, ჩვენ ცეკვას ვგრძნობდით და სცენაზე ამ მელოდიით ვიცხოვრეთ.
– ჯაბა, როგორი მასწავლებელია ჯულიანა?
ჯაბა: ძალიან კარგი, მაგრამ ზოგჯერ რაღაცეებს ვერ ვიგებ. ალბათ იმიტომ, რომ ამათ თავიანთი ტერმინოლოგია, თვლაც სხვანაირი აქვთ. როცა ადამიანი გასწავლის, პროცესშია ჩართული, ხანდახან ითიშება და ავიწყდება, რომ საერთოდ სხვა პროფესიის ხარ. ზოგჯერ ჯულიანას ვაჩერებ – მოიცა, ახლა ჩემს ენაზე მითხარი–მეთქი.
ჯულიანა: ჯაბა როცა მონდომებულია, ადვილად ითვისებს. პირველ ორ ტურში ძალიან ზარმაცობდა, არ მისმენდა და ნერვებს მიშლიდა. საერთოდ, მოთმინების უნარი არ მაქვს. ათასჯერ რომ ვეტყვი და მაინც არ აკეთებს, ჩემი არ ესმის, მერე ვფეთქდები.
– არადა ძალიან წყნარი, მშვიდი ჩანხართ. ჯაბამ იხუმრა კიდეც, ეს ცეკვას მასწავლის, მე კი – ლაპარაკსო.
ჯულიანა: კამერების წინ საუბარი არ მიყვარს, თორემ, ჯაბა, ისე არ გელაპარაკები თუ რა?!
ჯაბა: კი, იმდენს ლაპარაკობ, სიტყვას ვერ ჩააგდებ. ჯულიანა საუბრობს, როგორ არა, მაგრამ ხომ არიან ძალიან აქტიური და ნაკლებად აქტიური ადამიანები. მე განვეკუთვნები კატეგორიას, რომელიც საშინლად აქტიურია.
ჯულიანა: აი, მე კი მის ფონზე ძალიან პასიური ვჩანვარ.
– როგორც გატყობთ, დამეგობრდით.

ჯაბა: როგორ გინდა, ჯულიანას არ დაუმეგობრდე?! ჯერ ერთი, ძალიან კარგი ადამიანია და თან დღეში 6 საათი ერთად ვართ. მეგობრები ვართ, აბა, რა ვართ!

– თავისუფალ დროსაც ერთად ხომ არ ატარებთ?
ჯაბა: ხანდახან. ამ პროქტის გამო სხვადახვა კლუბები გვთავაზობენ, საღამოს ჩვენთან მოდით, დრო გაატარეთო და ასე ერთად მივდივართ ხოლმე. ისე კი, ჯულიანასაც ბევრი საქმე აქვს, მეც. აქაც ძალიან ბევრს ვვარჯიშობთ და დრო ნაკლებად გვრჩება.
– ჯულიანა, თქვენი მეწყვილე მოუსვენარი, მხიარული, ენერგიულია. მის გვერდით თავს კომფორტულად გრძნობთ?
ჯულიანა: ჯაბა სულ მხიარულია, მისგან სულ პოზიტიური ენერგია მოდის, უბრალოდ ზოგჯერ აუტანლად ენერგიულია.
ჯაბა: ჯულიანა ფიზიკურადაც კარგი გოგონაა, კარგი ადამიანიცაა. მაგრად გამიმართლა, რომ ჩემი მეწყვილეა. ნიჭიერი ადამიანები მიყვარს.
– გოჩა ჩერტკოევმა უთხრა კიდეც ჯულიანას, მსოფლიოში ერთ–ერთი საუკეთესო მოცეკვავე ხარო.
ჯაბა: ძალიან მიხარია. ყველა გამორჩეულად აღნიშნავს, რა მაგარი გოგო გყავსო. კარგი გოგო უნდა მყავდეს, აბა, რა!
ჯულიანა: მე კიდევ ყველა მეუბნება, რა მხიარული ბიჭი გყავსო.
– კონკურსანტები ნელ–ნელა გაკლდებათ. კონკურენციამ ალბათ იმატა.
ჯაბა: გარკვეული დოზით კონკურენცია არის, მაგრამ ერთმანეთთან ყველანი კარგად ვართ. ეს პროექტი დამთავრდება და ჩვენ ერთმანეთს კიდევ უნდა შევხვდეთ.
– ჯაბა, თქვენი ოჯახის წევრები ამ პროექტში თქვენს შესაძლებლობებს როგორ აფასებენ?
ჯაბა: დედაჩემი ძალიან ნერვიულობს. პირველ კონცერტზე იყო და ისე განიცადა, იმის შემდეგ აღარ მოდის. ორშაბათს, კონკურსის შემდეგ, სახლში გვიან რომ მივდივარ, ემოციისგან ყველა დახოცილი მხვდება. ვუთხარი კიდეც, თუ ასე ნერვიულობთ, არ მიღირს ცეკვა, სულ წამოვალ–მეთქი.
– დარბაზში საგულშემატკივროდ ვინ ზის, კადრში ვის აჩვენებენ?
ჯაბა: ხან დეიდაჩემი და დეიდაშვილის შვილები, ხანაც – მეგობარი.
ჯულიანა: პირველ ტურში მამაჩემი იყო მოსული, დედა, სამწუხაროდ, ვერ მოვიდა. ასევე ორი უახლოესი დაქალი და, რა თქმა უნდა, ნათესავები არიან ხოლმე. ტანგო რომ ვიცეკვეთ, განსაკუთრებით ის ტური მოეწონათ.
– ჯულიანა, ვიცი, რომ სანამ ჯაბას გაიცნობდით, მის სპექტაკლებზე დადიოდით. ახლა თუ დადიხართ?
ჯულიანა: თუ დამპატიჟებს, ძალიან დიდი სიამოვნებით წავალ.
ჯაბა: როდის დაგპატიჟო? როცა აქ ვართ, რეპეტიციებს გავდივართ. როცა სპექტაკლი მაქვს, შენ ბავშვებს ამზადებ. უმეტესწილად არ გცალია. კარგი, მთლიან აბონემენტს მოგცემ!
ჯულიანა: ჯგუფი ავიყვანე, ბავშვებს ცეკვას ვასწავლი. თავიდან ვნერვიულობდი, მაგრამ პირველი გაკვეთილი ძალიან კარგად ჩავატარე. ბავშვებს დიდი სიყვარულის მოცემა შეუძლიათ, მათ სხვანაირი სიყვარული იციან. ენერგიულები, ხალისიანები არიან. ერთმა მოსწავლემ თმა ზუსტად ჩემნაირად შეიჭრა, არადა წელამდე ჰქონდა. რომ მივედი და შეჭრილი თმით დავინახე, შოკი მივიღე!