მზია ორველაშვილი: "ოთარ ტატიშვილი ფაქტობრივად მამაჩემის ტოლია"

23 წლის მოცეკვავე მზია ორველაშვილი პროექტში "ცეკვავენ ვარსკვლავები" ოთარ ტატიშვილის პარტნიორად გაიცნო მაყურებელმა, მანამდე მის შესახებ ბევრმა არ იცოდა. არადა შთამომავლობით მოცეკვავეა და უკვე დიდი წარმატებები აქვს – საქართველოს და კავკასიის ჩემპიონი, საქართველოს თასის მფლობელი, აღმოსავლეთ ევროპის ვიცეჩემპიონი, ბელარუსის ვიცეჩემპიონი და სპორტის ოსტატია. მისი მეწყვილე გენადი ცინკევიჩია. წყვილი კონკურსებში ბელარუსის სახელით გამოდის. ამჟამად მსოფლიო ჩემპიონობისთვის ემზადებიან, რომელიც 17 ნოემბერს გაიმართება. გენადიმ მზიას საქართველოში ჩამოაკითხა და რეპეტიციებს ყოველდღე გადიან.
მზიასთან ინტერვიუ ოთარ ტატიშვილთან ერთად უნდა ჩაგვეწერა, მაგრამ ჟიურის ფავორიტი ჟურნალისტებს ბოლო დროს აღარ სწყალობს. პარტნიორის თხოვნის მიუხედავად, ტატიშვილმა ინტერვიუში ჩართვა არ ისურვა და მიზეზად დაასახელა, რომ მისმა ხელმძღვანელმა დათო გოგიჩაიშვილმა აუკრძალა პრესასთან ურთიერთობა მანამ, სანამ არ გაირკვევა, რომელ არხზე დაიდებს ბინას "ღამის შოუს" სტუდია.
– მზია, ბელარუსი გენადი როგორ გახდა თქვენი პარტნიორი?
– ბევრი საერთო ნაცნობი გვყავს. ჩემს ქართველ მეწყვილეს რომ დავშორდი, ერთ–ერთ მეგობარმა მითხრა, ერთი ნიჭიერი მოცეკვავე ბიჭი მყავს და, თუ გინდა, ერთად დადექითო. გენადი აქ ჩამოვიდა, მოვსინჯეთ და გადავწყვიტეთ, რომ წყვილი ვყოფილიყავით.
– ქართველ მეწყვილეს რატომ დაშორდით, ვერ გაუგეთ ერთმანეთს?
– საქართველოში ჩემი მეწყვილე როსტომ აროშვილი იყო. ბავშვური პრეტენზიები გვქონდა ერთმანეთთან და საბოლოოდ წყვილად ვერ შევდექით. სარეპეტიციო დარბაზში შევიდოდით თუ არა, მაშინვე ჩხუბს ვიწყებდით. ჩვენ ერთად აღარ ვცეკვავთ, თორემ დღემდე ვმეგობრობთ.
– სხვა ქვეყნის სახელით რატომ გადიხართ შეჯიბრზე?
– თავდაპირველად საქართველოს სახელით გამოვდიოდით, მაგრამ მერე გადავწყვიტეთ, ბელარუსის სახელით წავსულიყავით კონკურსებზე. აქ არანაირი ხელშეწყობა არ გვქონდა. ახლა ორივე კმაყოფილი ვართ. იქ სამეჯლისო ცეკვების ფედერაცია მაქსიმალურად გვიწყობს ხელს.
– თავის დროზე როგორ აღმოჩნდით სამეჯლისო ცეკვებში?
– ჩემს მშობლებს, გივი და ელენე ორველაშვილებს, სამეჯლისო ცეკვების სტუდია აქვთ. ჩემს ოჯახში აბსოლუტურად ყველა ცეკვავდა – ბებია, დედა და მამა (ისინი წყვილში ცეკვავდნენ), ორი ძმა მყავს და ისინიც ამ სფეროში არიან. ჩემი საყვარელი ძმები საქართველოს და კავკასიის ჩემპიონები და ბევრი საერთაშორისო ტურნირის გამარჯვებულები არიან. ჩემმა პატარა ლევანმაც, რომელიც ახლა 5 წლის არის, უკვე დაიწყო ცეკვა.
– საკმაოდ პატარა ასაკში გათხოვილხართ, თუ უკვე 5 წლის შვილი გყავთ.
– 17 წლისა გავთხოვდი, ოღონდ არა – ჩემი სურვილით, მომიტაცეს.
– თქვენი ქმარიც მოცეკვავეა?
– სამწუხაროდ, მას უკვე მეხუთე წელია, დავშორდი. ქორწინებიდან ძალიან მალე გავიყარეთ. მიზეზი ის იყო, რომ ხასიათით ვერაფრით შევეწყვეთ ერთმანეთს.
– ურთიერთობებში მომთხოვნი ხართ, ბევრს ითხოვთ ადამიანებისგან?
– არა, პირიქით, ძალიან რბილი ვარ, კონფლიქტები არ მიყვარს. ჩემი შვილი ყველაფერია ჩემთვის – საჭმელი, ჰაერი. აქ მისით ვსუნთქავ და იმ ენერგიით ვივსები, რომელიც უცხოეთში ცეკვის დროს მჭირდება.
– კონკურსზე ქართველი წყვილის კონკურენტი თუ გამხდარხართ?
– კი, როგორ არა! შევჯიბრებივარ და მომიგია კიდეც. ამ დროს იმაზე ვფიქრობ, რომ ქართველებს ჩემს შესაძლებლობებს ვუმტკიცებ. როცა აქ ვცეკვავდი, ჩემი დამფასებელი არავინ იყო. ჩემი გამარჯვებით მათ ვუმტკიცებ, რომ კარგად ცეკვა შემიძლია და მათ ჩემი სახით ბევრი რამ დაკარგეს. ძალიან მინდოდა, ყველა კონკურსზე საქართველოს სახელით მეცეკვა, მაგრამ არ გამოვიდა.

– მშობლები თქვენთვის მკაცრი მასწავლებლები იყვნენ?
– ისინი ისევე მექცეოდნენ, როგორც დანარჩენ მოსწავლეებს. მათთვის ერთი ჩვეულებრივი მოსწავლე ვიყავი. კონკურსებზე რომ გამოვდივარ, სახლში მათ ყოველთვის ვეკითხები, რა გავაკეთე სწორად და რაში შევცდი. ერთად ვმსჯელობთ და შეცდომებს მასწორებინებენ. ახლაც ყოველ ორშაბათს, კონკურსის შემდეგ სახლში მისულს მეუბნებიან, რა მოეწონათ, რა – არა.
– თეატრში მოდიან საგულშემატკივროდ?
– კი და მათთან ერთად ჩვენი სტუდიის ბავშვებიც გვქომაგობენ. დედამ პირველი შოუს შემდეგ თქვა, იქ ჯდომა აღარ მინდა, მირჩევნია, სახლში მშვიდად ვუყუროო. ძალიან ინერვიულა.
– ცეკვა არის თქვენი მთავარი საქმე, სხვა სერიოზული ინტერესები არ გქონიათ?
– 7 წლიდან 16 წლამდე ვმღეროდი. რამდენიმე სიმღერა ჩავწერე. ნანა ჟღერიასთან დავდიოდი სტუდიაში. მინდოდა, პროფესიონალურ დონეზე დავუფლებოდი სიმღერას, კლიპები გადამეღო, მაგრამ, სამწუხაროდ, ცეკვების გამო არ გამოვიდა. ცეკვას კი ვერაფრის გამო დავთმობდი. ესაა ჩემი საქმე და ვოცნებობ, ბევრს მივაღწიო.

– პროექტში "ცეკვავენ ვარსკვლავები" როგორ მოხვდით?
– მე და ჩემს მეწყვილეს 17 ნოემბერს მსოფლიო ჩემპიონატზე პირველ წყვილად გვაგზავნიან ბელარუსიდან. ამ ყველაფრისთვის დიდი მზადება მიდიოდა. ერთ დღესაც დედამ დამირეკა და მითხრა, უნდათ, კასტინგის გარეშე მიიღო მონაწილეობა პროექტში "ცეკვავენ ვარსკვლავებიო". რა თქმა უნდა, დავთანხმდი. ყოველთვის ვცეკვავდი, მაგრამ პოპულარობა ამ პროექტმა მომიტანა.
– როცა გაიგეთ, ოთარ ტატიშვილთან ერთად უნდა გეცეკვათ, რა რეაქცია გქონდათ?
– ჩვენ არ გვქონდა მეწყვილის არჩევის უფლება. რა თქმა უნდა, ვიცოდი, ვინ იყო ოთარ ტატიშვილი. როგორც მივხვდი, ფიზიკური მონაცემების მიხედვით შეირჩა წყვილები. კმაყოფილი ვარ, მასთან რომ მოვხვდი წყვილში. ფანტასტიკური ადამიანია.
– როგორი პარტნიორია, როგორ ვარჯიშობს?
– ძალიან მონდომებულია. ცეკვის დონეს ნელ–ნელა უმატებს. ჩვენი მინუსები ყველას გვაქვს, მაგრამ მე და ოთარი ვუგებთ ერთმანეთს. ის ფაქტობრივად მამაჩემის ტოლია და მამა–შვილივით ვართ. არ ყოფილა შემთხვევა, წავჩხუბებოდი ან უხეშად მეთქვა რამე. თუ წავკამათდებით, მერე ჩვენი წაკინკლავება სიცილში გადადის.
– თქვენი წყვილის შანსებს როგორ აფასებთ?
– ყველა ისეთი ძლიერია, ძნელია იმის თქმა, ვინ გაიმარჯვებს. არ ველოდით, რუმბას ცეკვით მე და ოთარი ესემეს–ების რაოდენობით მეორე ადგილას თუ დავიკავებდით. ჩვენ რომ დაგვასახელეს, გაოცებულებმა გადავხედეთ ერთმანეთს.
– ჟიურის შეფასებებით, ოთარი უფრო მსახიობობს, ვიდრე ცეკვავს.

– მგონი, თქვენ ჩემი და ოთარის ცეკვა არ მოგწონთ.
– თქვენს პროფესიონალიზმში ეჭვი არ მეპარება, მაგრამ ოთარი ზოგჯერ ისეთი გამომეტყველებით ასრულებს ცეკვას, რომ ალბათ მართლაც უფრო მსახიობობს, ვიდრე ცეკვავს.
– ჩვენ ყოველთვის ვცდილობთ, ისეთი ცეკვები დავდგათ, რომელიც ოთარს მოუხდება. ის ბევრს შრომობს, მონდომებულია.
– პირად ცხოვრებაში მარტო ხართ თუ არსებობს საყვარელი ადამიანი?
– პირად ცხოვრებაში შეიძლება რაღაცეები ხდება, მაგრამ ჯერჯერობით ყველაფერი კითხვის ნიშნის ქვეშაა. იმედი მაქვს, ოდესმე ყველაფერი დალაგდება და კითხვებზე პასუხების გაცემა შემეძლება. ჩემს ცხოვრებაში არის ადამიანი, რომელიც უზომოდ მომწონს, მაგრამ მის შესახებ ჯერ ვერაფერს ვიტყვი.
– თქვენს შვილს მამასთან აქვს ურთიერთობა?
– კი. შვილს ძალიან კარგ მამობას უწევს, არაფერს აკლებს. ძალიან კარგი მამაშვილობა აქვთ. ამის მიუხედავად, ზოგჯერ მაინც მიწევს მამის როლის შეთავსება.
ქეთი დინოშვილი