ნინო გაჩეჩილაძე ცხვირის ოპერაციას და ტუჩის გადიდებას აპირებს

მსახიობი ნინო გაჩეჩილაძე გარეგნობას და ზოგადად თავის მოვლას დიდ მნიშვნელობას ანიჭებს. დაწვრილებით აქვს შესწავლილი ამა თუ იმ კრემის შემადგენელი კომპონენტები, მათი ავკარგიანობა, ყოველთვიურად ეცნობა უცხოურ გლამურულ ჟურნალებს, რათა მოდის ახალი ტენდენციები არ გამორჩეს. სილამაზისთვის ყველა რადიკალური ნაბიჯის მომხრეა, მათ შორის პლასტიკური ქირურგიის გამოყენებისაც. თავად ამ გზით ჯერჯერობით არაფერი შეუცვლია გარეგნობაში, მაგრამ აპირებს. უმცროს დას, მომღერალ თაკო გაჩეჩილაძეს, მაკიაჟის გაკეთებას ხშირად ანდობს, რადგან ამ საქმის პროფესიონალად მიიჩნევს.
სიტყვამ მოიტანა და, ნინო პროექტის "ცეკვავენ ვარსკვლავები" ჟიურიზე განაწყენებულია, რადგან თვლის, რომ მისი დის მიმართ სუბიექტურობა და უსამართლობა იქნა გამოჩენილი. ამ ყველაფრის შესახებ ქვემოთ დაწვრილებით ვისაუბრებთ.
– ნინო, ქალისთვის მაკიაჟი მნიშვნელოვანი დეტალია მისი სილამაზის ხაზგასასმელად. თქვენ როგორ იყენებთ მას?
– საერთოდ, რაც თეატრში დავიწყე მუშაობა, გრიმს მე თვითონ ვიკეთებ. თეატრალური გრიმი ჯერჯერობით არ დამჭირვებია, მძაფრი ხასიათის მქონე პერსონაჟი ჯერ არ მითამაშია და იმიტომ. იმ აუცილებელ მაკიაჟს კი, რაც მსახიობს უნდა ჰქონდეს, თავად ვიკეთებ. მაკიაჟის წესი ასეთია – თუ თვალები ძალიან მკვეთრად გაქვს დახატული, ტუჩები ფერმკრთალი უნდა იყოს, მაგრამ თუ აქცენტი ტუჩებზე კეთდება, მაშინ თვალები მინიმალურად უნდა შეიღებო. პროფესიის გამო იმდენად ხშირად მიწევს მაკიაჟის გამოყენება, რომ თავისუფალ დღეებში ვცდილობ, საერთოდ არ გავიკეთო, რადგან კანს არ უხდება და აბერებს.
საერთოდ ძალიან მიყვარს გრიმის და ვიზაჟის ხელოვნება. მინდა, რომ სპეციალური კურსები გავიარო. გადმოცემით ვიცი, რომ ლენა ყიფშიძე არაჩვეულებრივ გრიმს იკეთებდა და ამის დიდი ოსტატი იყო. ვიზაჟის აუცილებელი კანონები ვიცი. ჩემმა დამაც, თაკომაც კარგად იცის.
– თაკო თქვენც გეხმარებათ მაკიაჟის გაკეთებაში?
– მაკიაჟთან დაკავშირებით ხშირად ვეკითხები რჩევებს. თაკოს ძალიან კარგი ხედვა აქვს, თან ჩვენ ყოველთვიურად ვყიდულობთ ჟურნალებს "ვოგს", "ელლს" და ა.შ. მოდურ ტენდენციებს ვეცნობით. რაც ყველაზე მეტად მოგვეწონება, საკუთარ თავზე ვცდით. თაკოს მაკიაჟი კარგად გამოსდის. არაერთხელ გაუკეთებია ჩემთვისაც, როცა გადაღება მქონდა. ვიზაჟისტ მაკა შავერდაშვილსაც კი უთქვამს ჩემთვის, თაკო ისე კარგად აკეთებს მაკიაჟს, ჩემი დამხარება აღარ გჭირდებაო. და მაინც, როცა სადმე ვარ წასასვლელი, მირჩევნია, მაკიაჟი პროფესიონალმა გამიკეთოს.
– სუნამო ქალის სილამაზისთვის დამატებითი შტრიხია, ბევრისთვის გადამწყვეტი მნიშვნელობაც აქვს ურთიერთობებში. თქვენ როგორ სურნელს ანიჭებთ უპირატესობას?
– სურნელს ძალიან დიდი მნიშვნელობა აქვს. ერთხელ ერთ გოგოს ისეთი საშინელი სუნამო ესხა, მიუხედავად იმისა, რომ ის სუნამო საკმაოდ ძვირადღირებული იყო, ფიზიკურად ცუდად გავხდი. სუნამოს შეუძლია მოახდინოს როგორც დადებითი, ასევე უარყოფითი ეფექტი. სურნელი განწყობაზე ძალიან დიდ გავლენას ახდენს. ამ მხრივ, ცოტა მრავალფეროვანი გემოვნება მაქვს, მაგრამ არასოდეს მომწონდა მკვეთრად ტკბილი სურნელი. სუნამოს მძაფრი არომატი მაწუხებს. მირჩევნია, სურნელი ისეთი იყოს, თითქოს სიომ მოიტანა. ძალიან მიყვარს "დიორ ედიქტის" პირველი გამოშვება, რომელიც საკმაოდ ტკბილია, მაგრამ ოდნავ რომ გასდის სურნელი, საოცარ არომატს ტოვებს. ეს სუნამო ერთ–ერთ აფროდიზიაკად ითვლება, ანუ მამაკაცის გამაღიზიანებელ საშუალებად.
– თქვენი ხვეული თმა როგორი მოსავლელია?
– ძალიან დაუმორჩილებელი თმა მაქვს. თუ ვხედავ, რომ არაფერი შველის, უბრალოდ ავიწევ და ასე გადატკეცილი ვარცხნილობით გამოვდივარ სახლიდან. ქალისთვის ეს სახის კანზე არანაკლებად მნიშვნელოვანია. თმას და ვარცხნილობას გარეგნობის რადიკალურად შეცვლა შეუძლია.
– თმაზე ექსპერიმენტები ჩაგიტარებიათ?
– პირველი კურსიდან მოყოლებული ექსპერიმენტებს მუდმივად ვიტარებ. ერთადერთი, წითლად და შავად არ შემიღებავს. შოკოლადისფრიდან დაწყებული, ძალიან ღია ქერად შეღებილიც ვყოფილვარ. ხან ვისწორებდი თმას, ხან "ჩოლკას" ვიჭრიდი და ა.შ. მაინც ყველა მეუბნება, რომ თმა ორნაირად მიხდება: ან აწეული, ან ბუნებრივად ხვეული და გაშლილი.
– რა დრო გჭირდებათ სარკესთან სახლიდან გასვლის წინ?
– დილაობით სარკის წინ დგომას დროს ვერ ვუთმობ, რადგან ყოველთვის მეჩქარება. დღის კრემს, ტუშს და ტუჩის უფერო საცხს ვისვამ და სახლიდან გავდივარ. ზოგადად მიყვარს სარკე. ქალი ამის გარეშე წარმოუდგენელია. ახალ სახლში, რომელშიც ცოტა ხანში გადავალ, სპეციალურად შევუკვეთე, რომ სარკეს ირგვლივ ნათურები ჰქონოდა, როგორც ეს საგრიმიოროს სარკეებს აქვს. ძალიან მომწონს ამგვარი სარკე.
– სარკეში ყურებისას ქალები ხშირად გარეგნობის შეცვლაზე ვფიქრობთ. თქვენ რისი შეცვლა გინდათ ხოლმე?
– პირველ რიგში, მინდა, ცხვირის ოპერაცია გავიკეთო. ბავშვობაში დავეცი და ძგიდე ოდნავ დავიზიანე, ამიტომ ყნოსვა ცოტა დაქვეითებული მაქვს. გარეგნულად დიდად არ მეტყობა, მაგრამ პროფილში ჩემი თავი არ მომწონს. ადრე თუ გვიან ალბათ ამ ოპერაციას გავიკეთებ. შეიძლება ზედა ტუჩიც ოდნავ გავიზარდო მოცულობაში. ამ მხრივ, ექსპერიმენტების მოყვარული დიდად არ ვარ, მაგრამ მიმაჩნია, რომ თუ ადამიანს თავი არ მოსწონს და გარეგნობაში დადებითი ცვლილებების შეტანა შეუძლია, ეს უნდა გააკეთოს. მთავარია, პროფესიონალს მიაკითხოს და ზუსტად იცოდეს, როგორი შედეგი ექნება მის ამ ნაბიჯს.
– სახე თუ სხეული? რომელს უფრო მეტ მნიშვნელობას ანიჭებთ და შესაბამისად მეტ ყურადღებას უთმობთ?
– ამ შემთხვევაში ციტატას მოვიყვან გურამ დოჩანაშვილის უკვდავი რომანიდან "სამოსელი პირველი", სადაც წერია, ქალს ორი რამ უნდა ჰქონდეს კარგი, ტან–ფეხი და სახეო. ორივე ძალიან მნიშვნელოვანია. ქალს სხეულიც ლამაზი უნდა ჰქონდეს და სახეც. ყველა მეცოდება, ვინც სარკეში იყურება და საკუთარი თავი არ მოსწონს. ამიტომ ვამბობ: თუ არის საშუალება, აუცილებლად უნდა შეიტანონ ცვლილებები გარეგნობაში.
– ცელულიტი ქალის დაუძინებელი მტერია. მას რა მეთოდებით ებრძვით?
– არ არსებობს ახალგაზრდა ქალი, ასაკოვნებზე აღარ ვლაპარაკობ, ცელულიტი რომ არ აწუხებდეს. ეს წონაზე არ არის დამოკიდებული. კანის სტრუქტურა, ჯანმრთელობა და სხვა უამრავი მიზეზი იწვევს ცელულიტს. საკმაოდ ბევრი ეფექტური საშუალებაა გამოსული ამ მხრივ. მე პირადად ცელულიტის საწინააღმდეგო კრემს და მასაჟებს ვანიჭებ უპირატესობას. მინდა, ყველა ქალს ვუსურვო, რომ ჰქონდეთ საშუალება და საკუთარი შემოსავალი იმისთვის, რომ თავს მიხედონ. სილამაზე მარადიული არ არის. როგორც ვარდი ჭკნება, ასევე ჭკნება ქალის სილამაზეც, უბრალოდ შეიძლება ცოტა უფრო დიდხანს გავაძლებინოთ.
– თუ ქალს ძვირფასი კოსმეტიკის და პროცედურების საშუალება არ აქვს, თქვენი აზრით, სახლის პირობებშიც შესაძლებელია თავის გალამაზება?
– სახლის პირობებში შეიძლება კანის და თმის ნიღბების გაკეთება, პედიკიურ–მანიკიურის გაკეთება და ზოგადად, რა თქმა უნდა, სახლის პირობებშიც შესაძლებელია თავის მოვლა. მაგრამ კატეგორიულად მინდა ვუთხრა ყველა თინეიჯერს, რომელთაც გარდატეხის ასაკში კანის პრობლემები აწუხებთ – სახლის პირობებში კანის გაწმენდა არ გაბედონ! ამან შეიძლება უმართავი პროცესები გამოიწვიოს და კანი სამუდამოდ გაიფუჭონ. კანისთვის კარგია მჭადის ფქვილი არეული მაწონში, ასევე კვერცხის ცილის და მაწვნის ნიღაბი.
– თქვენ რას იყენებთ კანისთვის?
– სახის კრემს, რომელსაც ვიყენებ, თვალის გარშემო წასასმელი კრემიც მოჰყვება, რომელიც ნაოჭის საწინააღმდეგო არ არის, უბრალოდ ატენიანებს მას, რომ არ გამოშრეს. ამ ეტაპზე მხოლოდ დამატენიანებელ კრემებს ვიყენებ და მყავს კოსმეტოლოგი. ყველას ვურჩევ, კრემის შეძენისას ყურადღება მიაქციონ, ხომ არ შეიცავს ის პარაბენს. ეს ნივთიერება სიმსივნის პროვოცირებას ახდენს. კრემის შემქმნელები კი აცხადებენ, რომ ამის გარეშე კრემები არ მზადდება, მაგრამ, მერწმუნეთ, მზადდება და მე მაქვს სახის საცხი, რომელიც პარაბენის გარეშეა დამზადებული.
– ფიგურას როგორ ინარჩუნებთ, წონის პრობლემა გენეტიკურად არ გაქვთ?
– მე საკმაოდ ქალური ფორმები მაქვს, რაც ერთი პერიოდი ძალიან არ მომწონდა და მაკომპლექსებდა. ისეთ ტანსაცმელს ვიცვამდი, რომ ეს ფორმები დამეფარა. დღეს უკვე მივხვდი, რომ ამის დამალვას აზრი არ აქვს. დიეტას არ ვიცავ, უფრო მეტიც, ხშირად ღამის საათებშიც კალორიულად ვიკვებები, მაგრამ არასოდეს ვეკარები შოკოლადის ბატონებს, რომელიც ემულგატორებს შეიცავს და სიმსივნის პროვოცირებას იწვევს. ვცდილობ, არ მივიღო გაზიანი სასმელები და ჩიფსები. სწრაფი კვების ობიექტებში არ დავდივარ, მიუხედავად იმისა, რომ მიყვარს იქ მომზადებული კარტოფილი, ეგრეთ წოდებული ფრი. პურზე უარს ვერ ვამბობ, მიუხედავად იმისა, რომ ვიცი, ეს ქალების მტერია, მაგრამ დღეში ორ ნაჭერზე მეტს არ ვჭამ. ტკბილეულზე კი უბრალოდ თავს ვერ ვიკავებ. ფორმას გენეტიკურად ვინარჩუნებ. ჩემი წონის მაქსიმუმი 50 კილოა. ერთადერთხელ ვიყავი 52 კილო და ისე შემეტყო, რომ სასწრაფოდ ერთკვირიანი დიეტა დავიცავი.
– დაბოლოს, თქვენს მომღერალ დაზეც ვისაუბროთ, რომელიც ტელეპროექტში აცეკვდა და ჟიურისგან საშინელი შეფასებები დაიმსახურა. თქვენ მოგწონთ თაკოს ცეკვა?
– ერთხელ დავესწარი თაკოს კონცერტს. პირველ ეპიზოდს ვუყურე, გულშემატკივრების რიგში ვიჯექი. ძალიან ვნერვიულობდი, რადგან ეს მისი პირველი გამოსვლა იყო და არ ვიცოდი, როგორ იცეკვებდა. თავისთავად, თაკოსთვის ეს არის გამოცდილება. მე ალბათ დავფიქრდებოდი ამ პროექტში მონაწილეობაზე, რადგან წინა სეზონის კონკურსანტებისგან გამიგია, რომ ძალიან შრომატევადია. მე კი ცოტა ზარმაცი ვარ, მაგრამ რადგან თაკო დათანხმდა მონაწილეობაზე, ყველაფერი უნდა გააკეთოს, რომ რაღაც შედეგს მიაღწიოს. მიუხედავად იმისა, თითქოს ითვლება, რომ ცუდად ცეკვავს, მე ვიტყოდი, რომ ძალიან მონდომებულია. თაკოც ზარმაცია, მაგრამ მაინც ყოველდღე დადის რეპეტიციებზე და ბოლომდე იხარჯება. მე ერთს ვიტყოდი: ჟიური ძალიან კრიტიკულია თაკოს მიმართ. თაკო არ ცეკვავს ყველაზე ცუდად. ჩემი აზრით, თაკოსნაირი სუსტი მოცეკვავეები არიან ამ პროექტში, მაგრამ რატომღაც ჩემი და ამოიჩემეს და გამიზნულად ჩაგრავენ. მგონი, ეს დიდი უსამართლობაა და ასე არ შეიძლება.
– ია ფარულავას და თაკოს შელაპარაკებას საკმაოდ არასასიამოვნო გაგრძელება მოჰყვა. როგორი ურთიერთობა აქვთ დღეს მათ?
– ეს შეიძლება ჟურნალისტებისთვის იყოს ხელჩასაჭიდი თემა. იას და თაკოს რა აქვთ გასაყოფი? მით უმეტეს, რომ მათ შორის ქრისტინე დგას. ეს იყო უბრალოდ ემოციური გამოსვლა ორივეს მხრიდან, შეკამათება, რომელიც შეიძლება ყოველდღე მოგივიდეს. იმავე სიტყვებით შეიძლება ილაპარაკო ყოველდღე მეგობართან და ამ სიტყვას, რომელსაც არ გავიმეორებ, ყოველდღიურად იყენებენ ადამიანები, მიუხედავად იმისა, რომ შეიძლება არ უნდა თქვან. მით უმეტეს, ეს პირდაპირ ეთერში არ უნდა ეთქვათ, მაგრამ ჟიურის წევრებიც და კონკურსანტებიც ისეთი ემოციების ქვეშ არიან, რომ იქ თავს კონტროლს ვერ გაუწევ. არაფერი განსაკუთრებული არ მომხდარა, საერთოდ ვერ ვხვდები, რატომ ატყდა ამ თემის გარშემო ასეთი აჟიოტაჟი.
მანანა ნოდია