ძალიან სექსუალური, გამომწვევი და უცხო ნანკა კალატოზიშვილი

ლამაზი - ეს სიტყვა მრავლისმთქმელია. ჩემთვის ლამაზი ძალიან ბევრნაირია. საინტერესოც თუ ემატება ამ სიტყვას, უკვე სრულყოფილებამდე ნაბიჯებიღაა დარჩენილი...


ნანკა კალატოზიშვილი მეორედ შევარჩიეთ ყდისთვის. ამას წინათ გადავხედე და მსოფლიო გამოცემებიც კი ხშირად იმეორებენ ცნობილ სახეებს ჟურნალების გარეკანებზე. მაგალითად, ნატალია ვოდიანოვა რეკორდსმენია - სხვადასხვა ქვეყნის Vo­gue-ის გამოცემების ყდებზე ყველაზე ხშირად გადაუღიათ.

ნანკა მომწონს და, რაც მთავარია, ჩემთვის საინტერესოდ ლამაზია. დიდხანს ვფიქრობდით ტანსაცმელზე... La­ko Bu­kia Sto­re-ში ახალგაზრდა ნიჭიერი დიზაინერების ექსკლუზიური კოლექციებია წარმოდგენილი, ანანო დოლაბერიძემ კი სტაილინგი პროფესიონალურად გააკეთა.

ნანკა... ბავშვობა ძალიან შთამბეჭდავი და დასამახსოვრებელი პერიოდია მისთვის. ხანდახან ეშინია კიდეც, უცებ არ წაეშალოს მეხსიერებიდან ის საოცარი მოგონებები. ერთ-ერთი მოგონება კიკეთში გამართული კონცერტია. მაშინ პირველად იგრძნო პასუხისმგებლობა და ინერვიულა გამოსვლის წინ. მისი პირველი წარმატებული გამოსვლა კი აპლოდისმენტებით შეაფასეს მაყურებლებმა: ბავშვებმა.

მაშინ 8-9 წლის იყო. შემდეგ... 12-13 წლისამ უკვე ზუსტად იცოდა, რომ მსახიობი გახდებოდა და მხოლოდ ეს პროფესია მოსწონდა. მიშა ანთაძის სტუდიაში დადიოდა და არაჩვეულებრივი პედაგოგები ასწავლიდნენ: გურამ საღარაძე, ზურაბ ანჯაფარიძე. იმის გამო, რომ სისტემატურად ევლო სტუდიაში, საღამოს სკოლაშიც კი გადავიდა.

ერთ დღეს თავს "ზემოდან" შეხედა და როდესაც საკუთარი მოძრაობის ტრაექტორიას დააკვირდა, არ მოეწონა (აღმოაჩინა, რომ თბილისში ერთსა და იმავე 5 უბანს შორის მოძრაობდა), მსახიობობა კი სწორედ ამ ტრაექტორიის შეცვლის საშუალებად მიიჩნია, რომელიც კვირაში რამდენჯერმე, სხვაგან, სულ სხვა სამყაროში ამოგზაურებდა. ნანკას თქმით, საოცარი შეგრძნებაა მსახიობობა, ქვეყნად ყველაზე მეტად იზიდავს.

კომფორტს უქმნის მზე და ყველაფერი, რაც სითბოსთან ასოცირდება. კიდევ, როდესაც მის ნათქვამს სწორად იგებენ, ანუ ისე, როგორც ამბობს. ყველაზე მეტად კომფორტს სწორედ მისი ნათქვამის გადაკეთება უნგრევს. როდესაც რაღაცის ახსნა ან დამტკიცება უხდება, ცდილობს, მინიმალურად ეკონტაქტოს ასეთ ადამიანებს, ანუ ცდილობს, რეალურად იცხოვროს კომფორტში.

განვლილი ცხოვრება უყვარს და ხშირად ფიქრობს, რომ მომავალშიც სინანულის გარეშე იცხოვროს.

ყველაზე მეტად უჭირს, აუხსნას საყვარელ ადამიანს, როგორ უყვარს... ჰგონია, რომ სიტყვებით ვერ გამოხატავს იმას, რასაც განიცდის და გრძნობს. მისთვის მთავარია, მოქმედებით გამოხატოს: ამ დროს უხარია და იღიმის. შინაგანი თავისუფლების განცდა კი ამ ყველაფერს უფრო ამძაფრებს და სასურველს ხდის.

ხშირად უფიქრია ვარცხნილობის შეცვლაზე. ბევრჯერ სალონშიც მისულა შესაჭრელად, მაგრამ სტილისტს უარი უთქვამს. მოკლედ, ვერასოდეს მოახერხა თმის შეჭრა. თეატრისთვის კი ძალიან კომფორტულია პარიკების ნაცვლად საკუთარი თმის ტარება. ცვალებადი ხასიათი აქვს. იცის, რომ ოდესმე შეიჭრის, მაგრამ ისიც იცის, რომ მალე მობეზრდება.

ნანკა თვლის, რომ ხაზგასმით მოდურად არ იცვამს, თუმცა მოდა, როგორც ხელოვნების სფერო, ხიბლავს. თბილისში ეზედმეტება, როდესაც რაღაც მოდაში შემოდის და ყველას აცვია. დიდ მეგაპოლისებში უფრო მარტივია მოდის გაგება და მოდურობა.

თვითონ თავს ნაკლებად მოდურად მიიჩნევს, მაგრამ ჩვენი გადაღებისთვის სუპერმოდური და ულამაზესია. "შექმნილი ვარცხნილობაც" ძალიან უხდება.

ნანკა თავისი ტრაექტორიით ნოემბრის "ბომონდისთვის" პოზირებს... მე კი ამეკვიატა, რომ ის საინტერესოდ ლამაზია.


თეა აგლაძე
ჟურნალი "ბომონდი"