სტეფანე ცოლს გაშორდა, მაგრამ მასთან მაინც ერთ სახლში ცხოვრობს

მომღერალ სტეფანე მღებრიშვილს სწორედ მაშინ ჰქონდა ყველაზე რთული პერიოდი, როცა ხალხის თვალში სრულიად ბედნიერი ჩანდა. ის და მომღერალი მაია დარსმელიძე უკვე აღარ არიან ცოლ–ქმარი, თუმცა ერთ სახლში აგრძელებენ ცხოვრებას და შვილზეც ერთობლივად ზრუნავენ. მათთვის ცოლქმრული ცხოვრება აღმოჩნდა შეუძლებელი, მეგობრობა კი ორივეს კარგად გამოსდის, ისე როგორც საქმიანი პარტნიორობა. როგორც სტეფანე ამბობს, "ერთმანეთზე პასუხისმგებლობისგან გათავისუფლდნენ" და, როგორც ჩანს, ამოისუნთქეს. ახლა მუსიკალურ ტელეპროექტში "ახალი ხმა" მწვრთნელების წყვილს წარმოადგენენ, თავისი გუნდის წევრები ერთად აარჩიეს და მათი გამარჯვებისთვისაც ერთად იბრძოლებენ. სტეფანესთან საუბარი სწორედ ამ პროექტით დავიწყეთ.
– სტეფანე, რას გვეტყვით თქვენთვის სრულიად ახალ ამპლუაზე, რომლითაც ეკრანზე გამოჩნდით? კმაყოფილი ხართ ამ წამოწყებით?
– "ახალი ხმა" უმაგრესი პროექტია. ვიცოდი, რომ ხალხი, ვისაც მივენდე, აუცილებლად კარგ პროექტს გააკეთებდა. ჟიურიში რომ მივდიოდი, მიხაროდა, რადგან ვფიქრობდი, ბავშვებისთვის შენიშვნების მიცემა არ მომიწევდა, მაგრამ აღმოჩნდა, რომ ღილაკის დაჭერას ლიმიტი აქვს და 14–ზე მეტს ვერ დავაჭერდით. 100 ბავშვი იყო და აქედან 90 კარგი იყო. კმაყოფილი ვარ, რადგან ძალიან სერიოზული, მაგარი ნაკადია მოსული. ვამაყობ, როგორც ჩემი, ისე სხვა მწვრთნელების გუნდის წევრებით. ამ გადაცემაში მონაწილეობა ჩემთვის სერიოზული გამოწვევაა. სულ ვფიქრობდი, რა უსამართლობაა, ბავშვები ესემეს–ებით რომ ფასდებიან–მეთქი, მაგრამ ისიც რთული ყოფილა, როდესაც თავად გიწევს იმ ადამიანის გაგდება, ვისი შეყვარებაც მცირე დროში მოასწარი.
– თქვენ და მაია ხშირად ჟიურის სხვა წევრებს მიმართავთ, ღილაკს შენ დააჭირე, შენიაო. თუ მონაწილე მოგწონთ, თავად რატომ არ ირჩევთ?
– ყველას ჩვენი სტილი გვაქვს და იმიტომ. მანანა დოიაშვილი მეუბნებოდა, ბავშვების გადანაწილებით თითოეული თქვენგანის ხასიათი გამოიკვეთაო. დათო ფორჩხიძის ხასიათი მისი ბავშვებით გამოიკვეთა, ჩვენი ხასიათი ჩვენი გუნდით გამჟღავნდა. ყველამ თავისას მიაგნო, მათ შორის – ნინო ჩხეიძემაც. შოუბიზნესი თამაშია და ჩვენ ყველამ ჩვენი სტრატეგია შევიმუშავეთ. იყვნენ ისეთი მონაწილეები, რომლებზეც ვნანობ, რომ ღილაკს ხელი არ დავაჭირეთ და არიან ისეთებიც, ვის ნამღერზეც დავაჭირეთ და ამასაც ვნანობთ, მაგრამ ახლა უკვე ჩვენი გუნდის ყველა ბავშვი მიყვარს. თითოეულმა ჩვენგანმა ალბათ ბევრი შეცდომა დავუშვით.
თქვენთვის და მკითხველისთვისაც ალბათ საკვირველი ის არის, რომ კონკურსანტების მოსმენის დროს ყველაზე მეტად ჩემი და მერაბ სეფაშვილის მიმიკები ემთხვეოდა ერთმანეთს, არადა რატომღაც ეგონათ, რომ დათო ფორჩხიძის და ჩემი უფრო დაემთხვეოდა.
– თქვენ და მაია ბევრს კამათობთ, აშკარაა, რომ თქვენი მუსიკალური გემოვნება ხშირად ერთმანეთს არ ემთხვევა. როგორ ფიქრობთ, ასეთ შემთხვევაში საერთო ღილაკი ამართლებს?
– ესეც შოუს ერთ–ერთი ნაწილია. ჩემი და მაიას გემოვნება რადიკალურად განსხვავდება, მაგრამ მუსიკაზე საბოლოოდ მაინც ვთანხმდებით. სახლშიც გვაქვს შიდა ბრძოლები და სერიოზული კამათი, მაგრამ რას ვიზამთ? ვუძლებთ. არ დავნებდებით და ჩვენსას მაინც ბოლომდე გავიტანთ.

– როგორ აპირებთ თქვენი გუნდის კონკურსანტების ვარსკვლავებად ქცევას, უკვე იცით, თითოეულთან როგორ უნდა იმუშაოთ?
– ბევრ პროექტში მიმიღია მონაწილეობა, საკმაოდ დიდი გამოცდილება მაქვს და ვიცი, როგორ შეიძლება ადამიანის გამოწვრთნა მოკლე დროში. ვიცი, სხვა ქვეყნებში რა და როგორ ხდება და ახლა ისე ვგრძნობ თავს, როგორც თევზი წყალში. მეც და მაიასაც იმხელა ბაზა ნამდვილად გვაქვს, რომ ბავშვებს რაღაც გამოცდილება მივცეთ. თუ ამ ქვეყანაში მუსიკას ყურადღება მიექცევა, ეს კონკურსანტები სამომავლოდ ძალიან ცნობილი ადამიანები იქნებიან.
– ხომ არ ცდილობენ, რომ თქვენს მუსიკალურ სტილს მიბაძონ? იმ ინდივიდუალურობას ხომ არ დაკარგავენ, რითაც პროექტში მოვიდნენ?
– არა, ჩვენი გუნდის წევრები ერთმანეთისგანაც კი საკმაოდ განსხვავდებიან. მათ მხოლოდ მუსიკის სიყვარული აერთიანებთ. ვფიქრობ, ისინი ჩვენ ვერანაირად დაგვემსგავსებიან. პირველი მტერი ვარ პიროვნების გადაკეთების. ვცდილობ, ბავშვების სულს ჩავწვდე, გავიცნო და ის მაქსიმუმი ამოვქაჩო, რაც მათ აქვთ. მინდა, მათი ინდივიდუალიზმი ხალხს მაქსიმალურად დავანახო. მე ვოკალის პედაგოგი მყავდა – მზია ღამბაშიძე. მთელი ცხოვრება მისი მადლობელი ვარ, ის იყო ქეთი მელუას, ნინო სურგულაძის პედაგოგი. მეამაყება, რომ მისი მოსწავლეების სიაში შევდივარ. მის მოწაფეებს შორის, მგონი, დღესდღეობით ყველაზე წარუმატებელი მე ვარ.
– პრეზიდენტ სააკაშვილის საამაყო მიუზიკლებში მონაწილეობთ – "ქეთო და კოტესა" და "ვერის უბნის მელოდიებში". ბევრ სამთავრობო კონცერტსაც თქვენ ხელმძღვანელობდით. საკუთარ თავს თვლიდით თუ არა "სამთავრობო მომღერლად"?
– ორივე სპექტაკლი ძალიან ბევრჯერაა ჩატარებული და ორივე შემთხვევაში რეჟისორს ძალიან დიდი თხოვნით მივმართე, დუბლიორი მყოლოდა, მაგრამ ეს ვერც ერთხელ მოხერხდა. ანუ თუ მე როლზე უბრალოდ ვერ შემცვალეს, ეს იმას ნიშნავს, რომ მათ ნამდვილად ვჭირდებოდი. ნაცნობობით იქ არავის მივუწვევივარ. ფრანგმა რეჟისორმა, რომელმაც "ვერის უბნის მელოდიები" დადგა, მიუზიკლში "ქეთო და კოტე" მნახა და მთელი დასიდან მხოლოდ მე და სოფო ნიჟარაძე აგვირჩია. თქვა, ეს ბიჭი აუცილებლად უნდა იყოს ჩემს სპექტაკლშიო. ამიტომაც არ მესმის, რა შუაშია აქ სამთავრობო მომღერალი.
– ეს იარლიყი – სამთავრობო მომღერალი – გაღიზიანებთ?
– არ ვიცი, ეს რას ნიშნავს. ადრე იყვნენ მომღერლები, რომლებიც მთავრობას პროტესტს უცხადებდნენ და სამთავრობო ღონისძიებებში არ მონაწილეობდნენ. წელიწადში სამი კონცერტი იმართებოდა მერიის მხარდაჭერით, რასაც ვერ გვპატიობდნენ. ეს იყო ახალ წელს, თბილისობას და საქართველოს დამოუკიდებლობის დღეს. საქართველოს სხვა რეგიონებში კონცერტები არასოდეს გამიკეთებია. მერიას აწყობდა ჩვენთან თანამშრომლობა.
– თბილისის მერია მაინცდამაინც თქვენთან რატომ თანამშრომლობდა?
– იმიტომ, რომ მაქსიმუმს ვაკეთებდით იმ თანხით, რაც გვქონდა. მე და კახა 12 წელია ამ სფეროში ვმუშაობთ. კარგად ვიცით, ორი ნათურით და ერთი დინამიკით კონცერტის გაკეთება როგორ შეიძლება. ასევე ვიცით, თუ როგორ უნდა დაამაგრო 100 ნათურა, რომ ეთერში ლამაზად გამოჩნდეს. წელიწადში სამ კონცერტს ვატარებდით და ამის გამო ზოგი რატომღაც გადაგვეკიდა. სამთავრობო კონცერტებზე არ გამოვსულვარ და არ მიმღერია. მომღერლები, რომლებიც მთავრობას არ უჭერდნენ მხარს, უბრალოდ არ მონაწილეობდნენ ამ კონცერტებში. მე ასე ვიცი. რამდენჯერმე უარი თქვეს და მერე დაბლოკილების სახელით "გაიჩითნენ".

– თქვენ ამბობთ, რომ შოუბიზნესში შავი სიები არ არსებობდა?
– ჩვენ არასოდეს გვქონია შავი და თეთრი სია. მათთვის, ვინც ვითომ ე.წ. შავ სიაში შედიოდა, მეც და კახას ცისკარიძესაც ბევრჯერ დაგვირეკავს სხვადასხვა წინადადებით, მაგრამ მათგან ყოველთვის უარს ვიღებდით იმ მიზეზით, რომ ჩვენ სამთავრობო კონცერტებს ვმართავდით. არ მესმის, თბილისობას გაკეთებულ კონცერტს სამთავრობო როგორ უნდა უწოდო. მერიის ვალდებულება იყო, რომ თბილისობას ღონისძიებები დაეგეგმა და ამისთვის საჭირო თანხები გამოეყო. ეს ყველაფერი ძალიან ბინძურია, არც მინდა ბევრი რამის გახსენება... უბრალოდ გეტყვით, რომ არანაირი შავი სია არ გვქონია.
– ფაქტი ერთია, თქვენ მიმართ ხალხისგან დიდი აგრესია წამოვიდა. მახსოვს ფილარმონიაში ჩაშლილი "ვერის უბნის მელოდიები"... ამ ყველაფერმა თქვენზე როგორ იმოქმედა?
– ამ მიუზიკლის შინაარსი სწორედ ძალადობის წინააღმდეგაა მიმართული. ეს იყო სპექტაკლი, სადაც უამრავი შრომა ჩაიდო. ყოველდღე "სასწრაფო" მოდიოდა იმიტომ, რომ ვილეწებოდით. სრული ოთხი თვე დილის 11 საათიდან შუაღამემდე რეპეტიციებს გავდიოდით. საკუთარი შვილის ნახვის დრო არ მქონდა. დღემდე ნორმალურად ვერ დავდივარ, ისეთი ტრავმები მივიღე. ქართველების რესურსით ასეთი შრომატევადი სპექტაკლი არასოდეს არავის უნახავს. ვერაფრით გავიგეთ, რატომ შეიძლებოდა ეს სპექტაკლი ჩაგვეშალა. იმ მომენტში სხვა თეატრებიც ფუნქციონირებდა და სტრიპტიზკლუბებიც. იმასაც ვუფიქრდები, რომ ადამიანებს, ვინც აგრესიას და პროტესტს გამოთქვამდა, აბსოლუტურად ლოგიკური მიზეზები ჰქონდათ. ჩვენს ქვეყანაში მართლაც უამრავი საშინელება მოხდა და მთავრობამ ეს შეცდომები მწარედ იწვნია. ხელისუფლება დემოკრატიულად შეიცვალა. მიხარია, რომ ეს ყველაფერი უმტკივნეულოდ და სამართლიანად მოხდა. ვისაც ვენდობოდი, იმ ადამიანებმა მიიღეს გადაწყვეტილება, რომ ქვეყანაში სხვა ხელისუფლება მოსულიყო. ეს კი საქართველოს ისტორიაში პირველად მოხდა.
– საქართველოში შექმნილი ამჟამინდელი პოლიტიკური სიტუაციიდან რას ელით?
– შოუბიზნესის კუთხით, არაფრის მოლოდინი მაქვს. ქვეყანას დალაგება სჭირდება. წინასწარ არ შემიძლია იმ ადამიანებზე ლაპარაკი, რომლებიც, არ ვიცი, რისი გამკეთებლები არიან. მინდა, კარგ ქვეყანაში ვიცხოვრო. ჩემი ქვეყნიდან წასვლა და უცხო ხალხში ცხოვრება არ მსურს. თუ ვინმე ამ ქვეყანას გამართავს, კმაყოფილი და ბედნიერი ვიქნები.
– როდესაც შოუბიზნესის წევრები აკეთებენ პოლიტიკურ განცხადებებს, ეს სწორად მიგაჩნიათ?
– როცა გამოსავალი არ არსებობს, ყოველთვის შეიძლება, შენი აზრი ღიად გამოთქვა.
– არჩევნების წინ მაია დარსმელიძე "ფეისბუქის" გვერდზე გამოქვეყნებულ სტატუსებში სააკაშვილისა და მისი ხელისუფლების მოწინააღმდეგეთა მიმართ მკვეთრ გამოთქმებს არ იშურებდა და აგრესიულ დამოკიდებულებას ამჟღავნებდა. საპასუხოდაც იგივე მიიღო. როგორ ფიქრობთ, სწორად მოიქცა, თავისი აზრი ამ ფორმით რომ გამოხატა?
– ჩვენ არ გვეშინია. მაია ის ტიპია, რომელიც მომავალზე არ ფიქრობს. ასევე ვარ მეც. არ ვართ ის ტიპები, რომლებიც არც მწვადს წვავენ და არც – შამფურს. ის ადამიანები, ვინც მმართველ პარტიას არ უჭერდნენ მხარს, ამბობდნენ, თქვენ ვირთხებივით ხართ ჩამალულიო. მაიაც სწორედ მათ გამოიწვიეს. ვფიქრობ, რომ ამ შემთხვევაში ძალიან სწორად მოიქცა. საერთოდ არ გვაღელვებს, ვინ რას ფიქრობს. მე და მაიას არავინ მოგვიტყუებია, არავისთვის არაფერი წაგვირთმევია. ისეთ ოჯახებში გავიზარდეთ, რომ ჭუჭყის, ინტრიგების, გათვლების ხარჯზე არ ვცხოვრობთ. მთელი ცხოვრება ძალიან ბედნიერები ვიყავით. ახლაც ძალიან ბედნიერი ვარ... არ ვიცი, იცით თუ არა, მაგრამ მე და მაია მეგობრებად დავრჩით.
– და არა– ცოლ–ქმრად? თქვენი გაშორება ჭორი არ არის?
– არა, ჭორი არ არის, მაგრამ ჯერჯერობით საუკეთესო ურთიერთობას ვინარჩუნებთ.
– ცოტა ხნის წინ მაია ამ ოთახში შემოვიდა, სადაც ინტერვიუს ვწერთ. დაშორებული ცოლ–ქმარი ერთ სახლში ცხოვრობთ?
– როგორც ხედავთ, ძალიან დიდი სახლია და საკმაოდ ბევრი ოთახია. ამ სახლში 1900 წლიდან ცხოვრობენ ჩემი წინაპრები. გამორიცხული არაფერია, შეიძლება ისევ ისე ვიყოთ, როგორც ადრე. ბავშვის ფაქტორი მაქვს გასათვალისწინებელი, სხვაც ბევრი რამ არის დასაფიქრებელი. ახლა მე და მაიას საუკეთესო ურთიერთობა გვაქვს. ალბათ ამიტომ ავიღეთ პაუზა და ერთმანეთზე პასუხისმგებლობებისგან დროებით გავთავისუფლდით. პირველი თქვენ ხართ, ვისთანაც ამაზე ვლაპარაკობ.
– ნამდვილად გამაკვირვა თქვენმა ნათქვამმა, რადგან ბოლოს მაიამ "სარკესთან" თქვა, რომ თქვენი ოჯახი დაღვინდა. ცოტა ხნის შემდეგ "ფეისბუქის" გვერდზე დაწერა, რომ დაშორდით, რაც თქვენ არ დაადასტურეთ. იმაზეც იყო საუბარი, რომ ეს ინტრიგა იყო, რომელიც "ახალ ხმას" სჭირდებოდა...
– არა, ჩვენ პოპულისტური მომენტები არ გვაქვს. მართლა საუკეთესო მეგობრული ურთიერთობა გვაქვს. ზუსტად ვიცი, რომ ერთმანეთზე მეტად არავინ გვიყვარს, მაგრამ ცხოვრების განმავლობაში ალბათ ყველა ადამიანს სჭირდება ასეთი პაუზა.
– მძიმე იყო ამ გადაწყვეტილების მიღება?
– რაღაც პერიოდი დეპრესიაში ვიყავი. ეს მაშინ იყო, როდესაც ხალხის გადმოსახედიდან ძალიან კარგად და ბედნიერად ვცხოვრობდი. იმ პერიოდში კონცერტებიც ტარდებოდა, მიუზიკლებში ვმონაწილეობდი, მაგრამ რეალურად დეპრესია მქონდა. ახლა კარგად ვარ და საერთოდ არ მაინტერესებს, ახალ მთავრობაში ვინმეს ვაღიზიანებ თუ არა. მთელი ცხოვრება სწორად და პატიოსნად ვიცხოვრე, არავისთვის არაფერი წამირთმევია, არ გამიფუჭებია, არავისი შემშურებია. იმას არ ვამბობ, რომ ანგელოზი ვარ, უამრავი შეცდომა მაქვს დაშვებული, მაგრამ წინასწარი გათვლებით არასოდეს ვცხოვრობ.
ქეთი დინოშვილი