სილამაზის ბუნებრივი ვიტამინები

არც ერთ ხელოვნურ პრეპარატს არ შეუძლია მეტოქეობა გაუწიოს ყველაზე დაჩიავებულ-გაღარიბებულ ხილსა და ბოსტნეულს.
საჭირო ვიტამინებსა და მიკროელემენტებთან ერთად, ხილი და ბოსტნეული კიდევ სხვა ძვირფას ნივთიერებებსაც შეიცავს. მთავარია, იცოდეთ, სად იპოვოთ ისინი.

ქორფა მწვანილი ვიტამინებისა და მიკროელემენტების საიმედო წყაროა. მაგალითად, კამა 15-ჯერ მეტ C ვიტამინს შეიცავს, ვიდრე ლიმონი.

მასში ბევრია ბეტა-კაროტინი და სხვა საჭირო ვიტამინები. ამას ემატება 12 მნიშვნელოვანი მიკროელემენტი. ნიახური, საოცრად ბალანსირებული სახით, B ჯგუფის ვიტამინების სრულ კომპლექტს შეიცავს.

არანაკლებ სასარგებლოა ოხრახუში და რეჰანი. გარდა ამისა, ყველა ქორფა მწვანილს ერთი საერთო თვისება გააჩნია - ისინი უჯრედების აქტივობას ამაღლებენ.

წიწაკა შეიცავს უნიკალურ ნივთიერება კაპსაიცინს, რომელიც სისხლის მიმოქცევას აუმჯობესებს. მასში რეკორდული რაოდენობითაა კაროტინი (განსაკუთრებით, წითელ წიწაკაში), ვიტამინი C, სილიციუმი (ის აუცილებელია ჩვენი თმების ნორმალური მდგომარეობისათვის).

წიწაკა შესანიშნავია იმითაც, რომ მთელ თავის შემადგენლობას გაყინულ ფორმაშიც სრულად ინახავს.

ნიორი, სხვა უამრავ სასარგებლო თვისებასთან ერთად, კაპილარულ სისხლის მიმოქცევას აღადგენს და სახის კარგ ფერს უზრუნველყოფს.

თავხვეული კომბოსტო B ჯგუფის ვიტამინების მთელ ნაკრებს, ვიტამინ C-ს, თუთიისა და მანგანუმის დიდ რაოდენობას და სხვა სასარგებლო ნივთიერებებს შეიცავს, მაგრამ ეს არ არის მთავარი.

კომბოსტო უჯრედების ზრდის ერთ-ერთ საუკეთესო ბუნებრივ სტიმულატორად ითვლება, ე.ი. მას აღმდგენი და გამაახალგაზრდავებელი თვისებები აქვს.

დამწნილებული კომბოსტო პოლივიტამინების წყაროა. ფერმენტაციის პროცესის წყალობით, მასში B12 ვიტამინის მეტი რაოდენობა წარმოიქმნება, დაცულია C ვიტამინის მნიშვნელოვანი ნაწილი, მონაწილეობს პანტოტენოვის მჟავას (B12) წარმოქმნაში, რომელიც თმის ბრწყინვალებასა და ფრჩხილების სიმაგრეს განაპირობებს.

დამწნილებული კომბოსტო, მიუხედავად მასში მარილის არსებობისა, ორგანიზმის შესანიშნავი გამწმენდი საშუალებაა. ამისათვის საჭიროა, კვირის განმავლობაში მხოლოდ ამ პროდუქტით იკვებოთ (შეგიძლიათ შავი პურიც დაუმატოთ).

ჟურნალი "რეიტინგი"