"რასაც ჩემი ყოფილი საყვარელი აკეთებს, არაკაცობა ჰქვია"

ახალგაზრდა გათხოვილი ქალი, რომელიც სერიოზული პირადული ხასიათის პრობლემის წინაშე დგას, ჩვენს რედაქციას დაუკავშირდა, ვინაობის გამჟღავნებისგან გასაგები მიზეზის გამო თავი შეიკავა და ჩვენი ინტერვიუც ტელეფონის საშუალებით შედგა. "არავის ვუსურვებ, მსგავსი სიტუაციიდან გამოსავლის ძიებაში ისეთი შეცდომა დაუშვას, რაც მე ჩავიდინე", – გვითხრა მან და თავისი ამბის მოყოლა დაიწყო:
– ძალიან მიჭირს ლაპარაკი იმაზე, რაც დამემართა, მაგრამ სხვა გამოსავალი არ მაქვს. თავის დროზე, როცა გავთხოვდი, კარგ ბედში ჩავვარდი, არაჩვეულებრივი ქმარი და ყოველმხრივ უზრუნველყოფილი ოჯახი შემხვდა. ჩემზეა ნათქვამი, კონკიას ბედი ჰქონიაო, მაგრამ ჭკუა ვერ გამოვიჩინე, ვერ შევირგე, შეცდომა დავუშვი და საკუთარი ნებით თავი ყულფში გავყავი. ახლა ჩემს დაუფიქრებელ ნაბიჯებს ძალიან ვნანობ, მაგრამ ალბათ უკვე გვიანია. არ ვიცი, როგორ გამოვასწორო სიტუაცია, ან შეიძლება თუ არა საერთოდ რამის გამოსწორება. ჩიხში აღმოვჩნდი...
– მოდით, თავიდან დავიწყოთ. რამ გამოიწვია, რომ არაჩვეულებრივი ქმრის გვერდით, როგორც თავად უწოდებთ, ამგვარი პრობლემის წინაშე დადექით?
– ყველაფერი ჩემი ბრალია, სხვას ვერავის დავაბრალებ. 20 წლის ასაკში სიყვარულით გავთხოვდი. რეზო ჩემზე 11 წლით უფროსი, ყოველმხრივ ჩამოყალიბებული და შემდგარი მამაკაცი იყო. ძალიან ვუყვარდი, თავს მევლებოდა, მანებივრებდა, მაგრამ ჩემგან დამოუკიდებელი ცხოვრებაც ჰქონდა. ჩემი ქმარი ქალების მოყვარული იყო და მათთან ნებივრობას არ იკლებდა. ამას აშკარად და გამაღიზიანებლად არ აკეთებდა, მაგრამ თბილისში რა დაიმალება – ხან ვისთან ხედავდნენ, ხან ვისთან და ეს ამბავი ჩემამდე მოდიოდა. მე ისეთ დღეში ვვარდებოდი, მტერსაც არ ვუსურვებ!
– სერიოზული ურთიერთობები ჰქონდა სხვა ქალთან თუ ეს მხოლოდ ერთჯერადი, "გვერდითი გასეირნებები" იყო?

– მუდმივი საყვარელი რომ ჰყოლოდა, ჩემ მიმართ ასეთი თბილი და ალერსიანი არ იქნებოდა, ალბათ ხანმოკლე გატაცებები ჰქონდა, მაგრამ მე ამას ვერ ვეგუებოდი. ქმარი უზომოდ მიყვარდა და მის სარეცელს ვერავის გავუყოფდი – ეს ჩემს ქალურ თავმოყვარეობას ძალიან შეურაცხყოფდა და თრგუნავდა. მეგობარი გოგოები მირჩევდნენ, არაფრად ჩააგდო, მთავარია, ოჯახს არაფერს აკლებს და "კვარტალში ერთხელ" სადღაც თუ წავა, ეგ ბევრს არაფერს ნიშნავს, მამაკაცისთვის ეს უბრალო გართობაა და მნიშვნელობას ნუ მიანიჭებო. მოჰყავდათ თავიანთი და ახლობლების ქმრების მაგალითები, რომლებიც ფაქტობრივად ოჯახებისთვის არც ვარგოდნენ. "შენმა ქმარმა უნდა თქვას, კაცი ვარო. ყველაფერს ასწრებს და თან დედოფალივით ჰყავხარ, ასეთი ქმრის ხელში ძალით თავს ნუ დაიტანჯავ, შეირგე, რაც გაქვს და ბედნიერებით იხარე!" – მეუბნებოდა დაქალი, მაგრამ მე ასე არ შემეძლო.
– ქმარს ეჭვიანობის სცენებს უწყობდით?
– განცდებს საკუთარ თავში ვერ ვთრგუნავდი, ვწუხდი, ვსაყვედურობდი, ვტიროდი. მის პერანგებზე ქალის სურნელს და თმებს ვეძებდი, ეჭვიანობისგან ღამეებს ვათენებდი, ლამის ფსიქიკა დამიავადდა.

– ამ მძიმე დღეში რომ იყავით, თქვენი ყურადღებიანი და მოსიყვარულე ქმარი როგორ რეაგირებდა?
– ძალიან გთხოვთ, არ არის მის მიმართ საჭირო ასეთი ირონია. რეზო მართლაც არაჩვეულებრივი ადამიანია, უბრალოდ თავისი მამაკაცური მოთხოვნილებების დათრგუნვა არ შეეძლო.
ახლანდელი გადმოსახედიდან ვფიქრობ, რომ ჯობდა, მართლაც "გამეტარებინა" მისი საქციელი და ამ დღეში არ აღმოვჩნდებოდი. ქმარი მეუბნებოდა, შენი ფასი არავინ მყავს და სხვის ენებს ნუ აჰყვები, სხვა ქალს თუ მანქანაში ჩავისვამ, ეს ღალატი არ არისო. იმის დასამტკიცებლად, რომ ნამდვილად ვუყვარდი, ჩემთვის ძვირფასი საჩუქრები მოჰქონდა, ყველაფერი ის, რაც მომწონდა და რაზეც ვოცნებობდი... თუმცა ეჭვით დაავადებულ ქალს საჩუქრებით ვერ უშველი.
– და თქვენც რაღაც მოიმოქმედეთ, რასაც ახლა შეცდომად თვლით?
– ერთი ბავშვობის დაქალი მყავს, მადონა. ერთი მისი ნაცნობი, გოგი, ჩემი ფარული თაყვანისმცემელი იყო. და, აი, მადონამ მირჩია, არაფერი დაშავდება, თუ გოგის შეხვდები და მასთან განიტვირთები, სტრესიც მოგეხსნება, ქმრის ღალატსაც უფრო მოინელებ და ცხოვრება გაგიადვილდებაო. თავისი მაგალითი მოიშველია: ლოთი და უვარგისი ქმარი ჰყავს, ვერ იშორებს და გამოსავალს მის ღალატში პოულობს. ამბობს, ეს მაცოცხლებს, თორემ აქამდე ვერც მოვატანდი, ახლა უფრო იოლად ვუყურებ ცხოვრებას და ჩემი ქმრის პათოლოგიებს არაფრად ვაგდებო.
მადონას რჩევაზე თავიდან მძაფრი რეაქცია მქონდა, თავში აზრად როგორ გაივლე, რომ მაგის გამკეთებელი ვარ–მეთქი, მაგრამ, როგორც ჩანს, მისმა ნათქვამმა ჩემზე მაინც იმოქმედა, ნელ–ნელა შხამივით გამიჯდა გონებაში. რეზოსთან მორიგი ინციდენტის შემდეგ შურისძიების გრძნობა დამეუფლა, თანდათანობით კი ისე გამიღვივდა, რომ საბოლოოდ მტკიცე გადაწყვეტილებად ჩამომიყალიბდა. მსიამოვნებდა, როცა წარმოვიდგენდი, როგორ გადავუხდიდი ჩემს ქმარს სამაგიეროს სხვა მამაკაცის მკლავებში. წვრილმანებს აღარ მოვყვები, როგორ შევხვდი გოგის და როგორ მივიდა ჩვენი შეხვედრები ლოგინამდე. მოხდა ის, რომ ერთ "მშვენიერ" დღეს სხვა მამაკაცის საყვარელი გავხდი.
– და მერე მწარედ ინანეთ...
– სინანული მქონდა ყოველ ჯერზე, როცა გოგის ვხვდებოდი, შინაგანი ბრძოლები არ მასვენებდა. მეგონა, რომ ეს მე არ ვიყავი, ჩემ მაგივრად ვიღაც სხვა მოქმედებდა. ვერასოდეს წარმოვიდგენდი, რომ ასეთ უზნეობას ჩავიდენდი და მოღალატე ცოლი გავხდებოდი. საყვარელი ქმრისგან გავრბოდი და ვიწექი მამაკაცთან, რომელიც არ მიყვარდა და არც არასოდეს მყვარებია. "ნამდვილად ღირსია, ღირსი! – ვფიქრობდი ქმარზე და მას ვაბრალებდი ჩემს ამორალობას, – მან არ მიბიძგა თავისი გაუთავებელი მექალთანეობით? ახლა თავადაც იაროს რქებით, არაფერი უჭირს!". მაგრამ ვერ ვიტყვი, რომ ამ თვითშთაგონებით მადონასავით გავიიოლე ცხოვრება.
მადონა არასოდეს დამიძრახავს, საყვარელი რომ გაიჩინა. მას ქმარი ხელს უშლიდა ცხოვრებაში, მის გვერდით უბედური იყო. მის "სიმამაცეს" თავის დროზე ლამის ტაშისკვრით შევხვდი, მაგრამ მე რა გამართლება მქონდა? განა შეიძლებოდა რეზოსნაირი ქმრისთვის მეღალატა?! რამდენადაც მიმტევებელი ვიყავი მადონას ქმედების მიმართ, იმდენად კრიტიკულად შევაფასე ჩემი საქციელი. ადამიანისთვის შინაგან წინააღმდეგობაში ყოფნა დამანგრეველია, ამიტომ ამგვარ ცხოვრებას დიდხანს ვერ გავუძელი და გადავწყვიტე, გოგისთან ურთიერთობა შემეწყვიტა.
– და ისევე მარტივად დაასრულეთ, როგორც დაიწყეთ?
– ყველაფერი გულწრფელად ავუხსენი. მოვუბოდიშე, ვუთხარი, კარგი ბიჭი ხარ და საუკეთესო ქალის ღირსი ხარ, მაგრამ ასე ცხოვრების გაგრძელება აღარ შემიძლია, ამიტომ უნდა დავშორდეთ–მეთქი. გაგიჟდა, თავი შეურაცხყოფილად იგრძნო და მითხრა, ასე ადვილად არ დაგთმობ, უფლებას არ მოგცემ, ხელაღებით მიმატოვოო.
– მართლა შეუყვარდით თუ თქვენ რომ ტოვებდით, ეს ვერ აიტანა?
– იმას, რასაც ჩემი ყოფილი საყვარელი ჩადის, არაკაცობა ჰქვია, სასტიკად და უსულგულოდ მექცევა. შეიძლება ითქვას, ცხოვრება ჯოჯოხეთად მიქცია. ის სითბო და ალერსი, რასაც მაძლევდა, სულ შხამად მადინა.
– თავიდანვე იცოდა, რომ მასთან განტვირთვის და შურისძიების მიზნით დადიოდით თუ ამ ურთიერთობისგან უფრო მეტს ელოდა?

– რა თქმა უნდა, ყველაფერი მშვენივრად იცოდა. მისთვის არაფერი მომიტყუებია, არ დამიმალავს და არც იმედი მიმიცია. არც თავად დამპირებია რამეს. ამ თემაზე საუბარიც არ გვქონია. ერთმანეთისთვის არასოდეს გვითქვამს, რომ კუბოს კარამდე გვექნებოდა ურთიერთობა. მხოლოდ საალერსოდ ვხვდებოდით. ამისთვის მისი მადლობელი ვარ, მაგრამ ეს არ იყო საჩემო საქციელი, ამას ჩემი ფსიქიკა ვერ გაუძლებდა, ამიტომ გადავწყვიტე, დავშორებოდი. შეიძლება ჩემგან უარის თქმა მისთვის მოულოდნელი და შეურაცხმყოფელიც იყო, მაგრამ იმას, რასაც ამის საპასუხოდ კადრულობს, გამართლება არ აქვს.

– მაგალითად, რას კადრულობს?
– მუქარას, შანტაჟს, პროვოკაციებს... იმისთვის, რომ მატერიალური და მორალური "ზარალი" მივაყენე, კომპენსაციას მთხოვს.
– როგორ, ფულს ითხოვს?!
– სამწუხაროდ, ასეა. ულტიმატუმი წამომიყენა: ან ჩემთან დაწვები, ან არადა თვეში ამდენ დოლარს გადამიხდიო. საკმაოდ დიდ თანხას მთხოვს.
– რისი იმედი აქვს, ფულს რა საშუალებით გადაუხდით?
– იცის, რომ ჩემს ქმარს კარგი შემოსავალი აქვს. ამით შელახული პატივმოყვარეობის დაკმაყოფილება უნდა. ვერ ინელებს, რომ ქმარს დავუბრუნდი.
– მასთან ურთიერთობის მანძილზე თქვენ მიმართ ანგარებიანი დამოკიდებულება არ შეგინიშნავთ? ან თქვენ ხომ არ ანებივრებდით ფულით და საჩუქრებით?
– ჩვენი ურთიერთობა ასე ღრმად არ წასულა, რომ ერთმანეთისთვის საჩუქრები მიგვეძღვნა. შეხვედრის ხარჯებს კი გოგი საკუთარ თავზე იღებდა. რა ვიცი, თავიდან, როცა ყველაფერში მივყვებოდი, ჯენტლმენივით იქცეოდა. მერე კი, უარყოფილი რომ დარჩა, არაკაცობის სიმბოლო გახდა.
– თუ მის პირობას არ მიიღებთ და არ შეასრულებთ, საინტერესოა, რას იზამს.
– მემუქრება, რომ ყველაფერს ჩემი ქმრის ყურამდე მიიტანს და ამით ოჯახს დამინგრევს.

– რითი დაამტკიცებს, რამე სამხილი აქვს?
– მას შეუძლია ინტიმური ურთიერთობიდან ისეთი დეტალები დაასახელოს, რითაც ეჭვებს აღძრავს.
– მის პროვოკაციაზე ხომ არ წამოეგეთ, რაიმე დათმობაზე წახვედით?
– რამდენჯერმე ფული გადავეცი და უსინდისოდ გამომართვა. ახლა მისი მისაცემი ფულიც არ მაქვს, არც მოლაპარაკებაზე მომყვება.
– დასახმარებლად არავის მიმართეთ?
– საქმეში მადონა ჩაერია, ჩემს საახლობლოში ეს ამბავი მხოლოდ მან იცის. გოგი მასაც ემუქრება და ლანძღავს. დარწმუნებულია, რომ ამ ინციდენტს სხვასთან არ გავამჟღავნებ და ამით ჩემს ღირსებას და ჩემი ოჯახის ყოფნა–არყოფნას სასწორზე არ დავდებ.
– ალბათ მაინც ჯობს, რაღაც ზომები მიიღოთ, ვიდრე ძალადობის მსხვერპლი გახდეთ.
– პირველი ზომა, რაც მივიღე, თქვენს ჟურნალთან გულახდილი საუბარია. ეს ჩემი მხრიდან დიდი რისკია. ეგებ გოგი მიხვდეს, რომ არ ღირს თამაშის გაგრძელება და ჩემს დაშანტაჟებას შეეშვას.
ნანა კობახიძე