როდის იჯდა ციხეში გიორგი ქორქია

პროექტში - "საქართველოს ვარსკვლავი" მოულოდნელად აღმოჩნდა: ეთერში გასვლამდე 3 დღით ადრე გიორგი ხაბურზანიასგან გადაცემის თანაწამყვანობაზე შეთავაზება მიიღო. დიდხანს არ უფიქრია, თანხმობა განაცხადა. ჩემი რესპონდენტი ჟურნალისტი გიორგი ქორქია გახლავთ. როდის გამოდის წონასწორობიდან, ვინ აყენებს კარგ ხასიათზე, რას გააკეთებს, ბევრი ფული რომ ჰქონდეს, რაზე ოცნებობს და რა არ დაავიწყდება არასდროს? - ამას მის მიერ დასრულებული წინადადებებიდან შეიტყობთ.

- დაბადების თარიღი...
- 1974 წლის 23 აპრილი.

- ჩემზე გავლენა იქონია...
- ...ოჯახმა. საგვარეულო პროფესიას გავყევი. ჩემი დიდი ბაბუა პუბლიცისტი იყო, ბაბუა - ცნობილი სპორტული ჟურნალისტი; მამაც ჟურნალისტია. სკოლაში ტექნიკური საგნები არ მიყვარდა, ჰუმანიტარული - კი. ჰოდა, საბოლოოდ არჩევანი ჟურნალისტიკის ფაკულტეტზე შევაჩერე.

- ჩემზე ამბობენ, რომ...
- ...ათას რამეს ამბობენ, კარგსაც და ცუდსაც. ამბობენ, ქუდით და ბენდენით იმიტომ დადის, რომ ეს მისი იმიჯიაო. სინამდვილეში, თავზე ბევრი ტრავმა მაქვს მიღებული და გაცივებამ შეიძლება, ცუდი შედეგი გამოიწვიოს. ერთი პერიოდი ჩემს ქუდებსა და ბენდენებზე დაუსრულებელი ლაპარაკი ძალიან მაღიზიანებდა, ახლა - ნაკლებად. ჰო, ზოგი იმასაც ამბობს, თმა არ აქვს და ეს აკომპლექსებსო. ესეც ტყუილია.

- ბედნიერი ვარ, რომ...
- ...მყავს ნიკოლოზი, რომელიც მალე 3 წლის გახდება. ის მეც მგავს და დედამისსაც. კარგი ტიპია.

- როცა მარტო ვარ...
- ...ვკითხულობ წიგნს, ვუსმენ მუსიკას და "დავძვრები" ინტერნეტში.

- ახლა ვკითხულობ...
- ...რამდენიმე დღეა, ეკა სამხარაძემ ფამუქის წიგნი მათხოვა და ჯერ წასაკითხად ვერ მოვიცალე. დღეს თავისუფალი დღე მაქვს და როცა შინ მივალ, ჯერ დავისვენებ, მერე კი ამ წიგნის კითხვას დავიწყებ.

- ძილის წინ ყოველთვის...
- ...ვუსმენ მუსიკას და ვეწევი სიგარეტს.

- ვიბნევი, როცა...
- ...აზრს მეკითხებიან იმ საკითხზე, რომელშიც ვერ ვერკვევი. ასეთ დროს ყოველთვის ვაღიარებ, რომ ეს რაღაც არ ვიცი. ადამიანმა ჯობია, არცოდნა აღიარო, ვიდრე დასმულ კითხვას სულელური პასუხი გასცე.

- ლამაზი ქალის დანახვისას...
- ...არ ვიბნევი. მსიამოვნებს და ვუყურებ.

- წონასწორობიდან გამოვდივარ...
- ...როცა ძალიან დაღლილი ვარ, ჩემი წონასწორობიდან გამოყვანა ნებისმიერ წვრილმანს შეუძლია. ზოგადად, ადამიანების უზრდელობა და ხამობა მაღიზიანებს. ამ დროს რას ვაკეთებ? - მდგომარეობიდან გამოყვანის ხარისხს გააჩნია; შეიძლება ადამიანს შენიშვნა წყნარად მივცე, მაგრამ ისიც ადვილი მოსალოდნელია, რომ გავგიჟდე, გადავირიო.

- მე ვარ შეუმდგარი...
- ...მუსიკოსი. მთელი ცხოვრება, ჟურნალისტობასთან ერთად, მუსიკოსობაც მინდოდა. ერთი პერიოდი ბაკურ ბურდულთანაც ვუკრავდი ბასგიტარაზე, მაგრამ მერე შევეშვი. მუსიკაში საყვარელი ჟანრი არ მაქვს, ალტერნატიული მუსიკისკენ უფრო მეტად ვიხრები. ქართველებიდან ჩემი საყვარელი მუსიკოსი ლადო ბურდულია.

- მეზარება...
- ...გზის გავლა სამსახურიდან სახლამდე: ვერაზე ვცხოვრობ. ტელევიზიიდან ყოველთვის დაღლილი გავდივარ და სახლამდე მისასვლელი გზა აღარ ილევა ხოლმე... ზოგს დილით ადრე ადგომა ეზარება, მე კი გვიან ღამე მიწევს ადგომა, რათა სამსახურში დროზე მივიდე.

- მაღიზიანებს...
- ...ადამიანები, რომლებსაც საკუთარ თავზე დიდი წარმოდგენა აქვთ; მაღიზიანებს პოლიტიკურად ანგაჟირებული ახალგაზრდა, რომელიც ყველგან პოლიტიკაზე ლაპარაკობს. სტუდენტობის დროს აქციებზე მეც დავდიოდი; სწორედ იმ პერიოდს დაემთხვა მძიმე წლები, მაგრამ აქციიდან წამოსული პოლიტიკაზე აღარ ვლაპარაკობდი. ბოლო პერიოდში პოლიტიკის გამო ერთმანეთს მეგობრებიც დაუპირისპირდნენ, ეს კი არ მომწონს.

- ძალიან მინდა....
- ...მქონდეს იმის შესაძლებლობა, რომ ყველა ქვეყანაში ვიმოგზაურო. შეიძლება სადმე დიდი ხნითაც კი დავრჩენილიყავი, მაგალითად - ინდოეთში. ეს ქვეყანა ძალიან მხიბლავს. იქაურ კულტურას, სილამაზეს ცივილიზაცია ნაკლებად შეეხო.

- არასდროს დამავიწყდება...
- ...პირველი წარმატებული ნაბიჯი ჟურნალისტიკაში და პირველი სიუჟეტი, რომლითაც "დროებაში" მოვხვდი. მაშინ ჩემი ხელმძღვანელი გიორგი თარგამაძე იყო, პროდიუსერი - ლევან ვეფხვაძე. მათ დამავალეს საცდელი სიუჟეტის მომზადება კოლონიიდან. ამისთვის ყველაზე კარგი გზა გამოვნახე: ოპერატორთან ერთად 3 დღე და ღამე იმ საკანში ვიჯექი, სადაც სასჯელს მძიმე დანაშაულის ჩამდენი პატიმრები იხდიდნენ. მათ შორის იყვნენ მკვლელები, რეციდივისტები... საკმაოდ რთულია, შესაბამის უწყებაში მიაღწიო შეთანხმებას, შეგიშვან კამერაში, დამნაშავეებთან ერთად გაატარო ღამე, დაითანხმო გადაღებაზე... ამ სიუჟეტს დიდი გამოხმაურება მოჰყვა და მართლა არასდროს დამავიწყდება.

- დათმობა შემიძლია, თუ...
- ...ვხვდები, რომ მართალი არ ვარ.

- ვერაფრით ვისწავლე...
- ...უცხო ენები. ბავშვობაში ინგლისურ ბაღში დავდიოდი და ცხადია, ინგლისური ვისწავლე, მაგრამ მერე ამ ენაზე აღარ ვლაპარაკობდი და თანდათან დამავიწყდა. უნივერსიტეტში სწავლის დროს, რატომღაც, ესპანურის სწავლა მოვინდომე - გამიჭირდა; მერე გერმანულზე მივედი, მაგრამ ვერც ეს ენა ავითვისე.

- ცრუმორწმუნე არ ვარ, მაგრამ...
- ...ზოგჯერ ხეზე მაინც ვაკაკუნებ.

- ბოლოს მესიზმრა...
- ...წყალდიდობა, მაგრამ ყველანი გადავრჩით, ყველაფერი კარგად დამთავრდა.

- მჯერა, რომ...
- ...ყველაფერი კარგად იქნება. ოპტიმისტი ვარ.

- როცა მომავალზე ვფიქრობ...
- ...გეგმას ვადგენ, მაგრამ მალევე ვხვდები, რომ ეს სისულელეა. ყოველთვის დღევანდელი დღით ვცხოვრობდი. ჯერ ყველაფერი კარგად არის და მგონი, მომავალშიც კარგად იქნება.

- არავისთან ვლაპარაკობ...
- ...ჩემს პირად ცხოვრებაზე.

- სიყვარული ეს...
- ...ის გრძნობაა, რომელიც ადამიანმა ცხოვრებაში ერთხელ მაინც უნდა გამოცადოს.

- ახლა შეყვარებული...
- ...არ ვარ.

- ვოცნებობ...
- ...ვცხოვრობდე ნორმალურ ქვეყანაში, სადაც სოფლის მეურნეობა მაღალ დონეზე იქნება განვითარებული; მქონდეს საკუთარი ფერმა (მაგალითად, ცხვრების), მყავდეს ძალიან კარგი ცხენი; მქონდეს ეზო, სადაც სულ ცოტა, 2 ძაღლი მაინც იცხოვრებს, - ბავშვობიდან ამაზე ვოცნებობდი. თავს ყველაზე კომფორტულად იქ ვგრძნობ, სადაც სიმწვანეა, სადაც ნაკლები ხალხია და სადაც მეტი სიცოცხლეა.

- ჩემი ყველაზე დიდი სისუსტე...
- ...ჩემი ნიკოლოზია.

- ყოველთვის შეუძლია კარგ ხასიათზე დამაყენოს...
- ...ნიკოლოზმა და ჩემმა ძაღლმა, რომელიც ძალიან მიყვარს. კიდევ, კარგმა ცხენმა და უახლოესმა მეგობრებმა, ლუდის სმის დროს.

- ცხოვრებაში რისკზე...
- ...ხშირად წავსულვარ. ექსტრემალი ვარ, მაგრამ თავზე ხელაღებული - არა.

- როცა საჯაროდ მაქებენ...
- ...ვწითლდები და ვცდილობ, იქაურობას მოვშორდე.

- მეშინია...
- ...წყლის. ბავშვობაში ვიხრჩობოდი და ალბათ, ამის ბრალია. წყალზე ფიცარი რომ დამიდო, გავირბენ. გემით და ნავით მგზავრობისაც არ მეშინია.

- არ მჩვევია...
- ...კონფლიქტის გაღვივება. საერთოდ, ძალიან უკონფლიქტო ადამიანი ვარ; თუ ვინმემ არ გამომიწვია, ჩხუბს თავად არ წამოვიწყებ. ყოველთვის ვცდილობ, დაპირისპირებას თავი დიპლომატიური გზით ავარიდო.

- ხშირად მსაყვედურობენ...
- ...რომ კარადა არეული მაქვს. როცა მილაგებენ, მერე ვეღარაფერს ვპოულობ, იმ ქაოსში კი ვიცი, რომელი შარვალი სად მაქვს მიგდებული (იცინის).

- ვუფრთხილდები...
- ...მეგობრებს.

- ვერავინ მაიძულებს...
- ...იმის გაკეთებას, რაც ჩემთვის მიუღებელია.

- ვერ დავიჯერებ...
- ...საერთოდ, მიამიტი ვარ, მაგრამ ვერ დავიჯერებ, რომ საქართველოში ოდესმე ნორმალური კონცერტი ჩატარდება.

- ყოველთვის განვიცდი...
- ...თუ სახლში დაძაბულობა იგრძნობა. ასეთი სიტუაცია ყოველთვის 2-3 წუთში ინმუხტება, მაგრამ მე იმ წუთებსაც ვერ ვიტან. ჩემთვის ოჯახში სიმშვიდე აუცილებელია!

- რამდენიც უნდა გადამიხადონ...
- ...ჩემს ძაღლს ვერავის მივყიდი. მას მილიონ ლარადაც არ გავყიდი.

- ცხოვრებას ვილამაზებ...
- ...ჩემი შვილით, მეგობრებით, მუსიკით და იმ იშვიათი დღეებით, როცა ვისვენებ.

- პროექტში - "საქართველოს ვარსკვლავი"...
- ...მოულოდნელად აღმოვჩნდი. თანაწამყვანობა გიორგი ხაბურზანიამ შემომთავაზა და დავთანხმდი. ჩემი ფუნქცია კონკურსანტების გამხნევებაა. მართალია, ჯერ ფავორიტი არ მყავს, მაგრამ პირველ კონცერტზე ანა ვეკუას ქარიზმატულობით მოვიხიბლე. ის გიჟი, გადარეული გოგოა, რომელიც ფეხბურთს თამაშობს, მაგრამ სცენაზე ედიტ პიაფის სიმღერა შეასრულა - ასეთ დიდ გარდასახვას ნიჭი უნდა.

- დაბოლოს, გირჩევთ, რომ...
- ...მეგობრებს ნურაფრის გამო ნუ დაკარგავთ. შეინარჩუნეთ სიმშვიდე. ნუ იქნებით "ნურავისტები", უბრალოდ, თქვენი სამშობლოს ფანები იყავით.

თამუნა კვინიკაძე

ჟურნალი ”გზა”