მეშინია თქვენი
2 189 ნახვა
მე დაკარგული ვარ. დაკარგული ვარ საკუთარ თავში და საკუთარ სხეულში. საშინელ სიცარიელეს ვგრძნობ. სიცარიელეს და სიცივეს. სხვას არაფერს. აღარც ტკივილს, აღარც სითბოს, აღარც.. მე არაფერს ვგრძნობ. მე ვგრძნობ არაფერს. მარცხენა მხარეს, იქ სადაც ნორმალურ ადამიანებს გული აქვთ, მე რაღაც სიდამპლეშეპარული ნარჩენებიღა შემრჩენია. მაწუხებს ეს გრძნობათა ნაგავსაყრელი და მინდა ერთი ხელის მოსმით ამოვიგლიჯო სხეულიდან. მინდა ყველა მოგონება გავაქრო. ყველა ფიქრი დავმარხო. მიმიფურთხებია ყველა ოცნებისთვის, რომელიც მაინც დასანგრევად არის განწირული. მიმიფურთხებია ყველაფრისთვის, რაც გიკავშირდებათ. მე მეშინია თქვენი. ხოო, მეშინია. მეშინია თქვენი სიყალბის. ტყუილების. დაპირებების. მეშინია თქვენი, რადგან თქვენ გადამდებნი ხართ. ფიქრები როგორ უნდა მოვკლა ჯერ არ უსწავლებიათ ჩემთვის.
