ეკო ფანგანი ეჭვიანობით ბექა ჩხაიძეს აშინებს

მოდელი ეკო ფანგანი და მომღერალი, ანსამბლ "ალილოს" წევრი ბექა ჩხაიძე თბილისში პოპულარული შეყვარებული წყვილია. მათ მიმართ ინტერესი მას შემდეგ გაძლიერდა, რაც ეკო ტელეპროექტში "ცეკვავენ ვარსკვლავები" გამოჩნდა და ყველასთვის მოულოდნელად მოცეკვავის კარგი მონაცემები გამოავლინა.
გარდა სიყვარულისა, მათ საქმიანი ურთიერთობაც აკავშირებთ. ეკო კვარტეტ "ალილოს" პროდიუსერია. წყვილი ხშირად ჩხუბობს, იბუტებიან კიდეც, მაგრამ მალევე რიგდებიან. ეკას სვანურ "მიმწოლობას" ბექას გურული იუმორი აბალანსებს. მათ ცხოვრებაში ახლა მძიმე ორშაბათებია ეკას ცეკვების გამო. ბექას ბიუჯეტიც ამას ეწირება და ნერვებიც. ის საგულშემატკივროდ დარბაზში ყოველთვის ზის და სახეზე ეტყობა, რომ საყვარელი ქალის გამოსვლის დროს საკმაოდ დაძაბულია.
ეკოს და ბექას ქართული ცეკვების ტურის წინ შევხვდით.
– როგორ დაიწყო თქვენი რომანი?
ეკო: " ფეშენ ვიკში" ვმონაწილეობდი. ბექა მის მეგობარ როსტოსთან (ლევან როსტოშვილი. ავტ.) ერთად არც ერთ ჩვენებას არ აცდენდა. "ფეშენ ვიკის" დახურვის დღეს მთელი ჩვენი სამეგობრო ერთ ადგილას წავედით, მერე იქიდან კიდევ სხვაგან გადავინაცვლეთ და ამ სიარულ–სიარულში ბექამ ჩემ მიმართ ყურადღების გამოჩენა დაიწყო. ისე მოხდა, რომ გრძელ მაგიდასთან გვერდიგვერდ აღმოვჩნდით. ბექა ხუმრობდა, საქორწილო სუფრაა, ჩვენი ქორწილიაო. ამ ხუმრობა–ხუმრობაში დავიშალეთ, მეორე დღეს მომწერა, მესამე – დღესაც და ასე ნელ–ნელა დავუახლოვდით ერთმანეთს.
ბექა: რამდენიმე დღის შემდეგ ერთ–ერთი სუფრიდან 15 მომღერალი წამოვიყვანე, ეკოს სახლთან დავდექი და სერენადები ვუმღერე.
ეკო: ატენის ქუჩაზე პატარა კონცერტი მოაწყო. ერთი მეზობელი ყვიროდა, არ წახვიდეთ, მოვდივარო. ზოგს ღვინო ჩამოჰქონდა და ზოგს – სხვა რაღაც.
ბექა: მერე დაიწყო ყოველდღიური სიმღერები და ცეკვა–თამაში. ორი წელია ერთად ვართ და თავს კარგად ვგრძნობთ.
– ორი წელი კარგი დროა ერთმანეთის შესასწავლად. ზოგი გაცნობიდან სამ თვეში ქორწინდება. თქვენს გეგმებში დაოჯახება არ შედის?
ეკო: გეგმებზე წინასწარ არ ვლაპარაკობთ. ახალი ნაცნობები რომ ვიყავით, ბექას ჯერ კიდევ მაშინ უნდოდა ოჯახის შექმნა, მაგრამ ყველაფერს თავისი დრო აქვს.
ბექა: თქვენ აუცილებლად შეგატყობინებთ, როგორც კი რამეს დავაპირებთ.
– ეკო, გამოდის, რომ ხელი გთხოვათ და უარი თქვით?
ბექა: ხელიც ვთხოვე, გულიც და სულიც.
ეკო: ხელის სათხოვნელად ბეჭდით ხელში დაჩოქილი არ მოსულა.
– ბექა, როგორი ადამიანი და როგორი ქალი დაინახეთ ეკოში ამ ორი წლის განმავლობაში?
ბექა: ძალიან მაგარი, უერთგულესი. თუ საქმეს დასჭირდა, 100 პროცენტიანი სვანია. სულ გვერდში მიდგას, ვაჟკაცი ქალია. მთავარია რამე არ გამიჭირდეს, თორემ ჩემ გამო სამ კაცს მოკლავს "პულემიოტით"... (იცინის). ბევრზე უკეთესად იცის გვერდში დგომა.
ეკო: შენი ნაცნობი ქალებიდან ყველაზე უკეთესად ვიცი გვერდში დგომა... (იცინიან). ეს არის ჩემი დათვის ბელი. ბექა ძალიან თბილი, კარგი, კეთილი ადამიანია. ხან არ მიჯერებს და რომ არ მიჯერებს, მერე ნანობს. ვთვლი, რომ გონივრულ რჩევებს ვაძლევ. სახლშიც დომინანტი ვარ და გარეთაც, ოღონდ ამ თვისებას ბოროტად არ ვიყენებ. ბექას ზოგჯერ ჩემი ხასიათი არ მოსწონს და იბუტება.
ბექა: რას ვიბუტები?
ეკო: ვჩხუბობთ, მაგრამ ვრიგდებით. საერთოდ, კაცი ყოველთვის დამნაშავეა ქალის წინაშე. ჩვენს შემთხვევაშიც ასეა, მაგრამ ბექას დანაშაულის შეგრძნება არ აწუხებს, გურულია და არ იმჩნევს. მე სვანი ვარ და რქებით ვაწვები. ერთხელ კვარტეტი "ალილო" მეგობარმა ეგვიპტეში დაპატიჟა. ბექა უჩემოდ წავიდა, თბილისში ზამთარი იყო, მირეკავდა და მეუბნებოდა, აქ აღარ მინდაო. ბექას არც ზღვა უყვარს, არც მზე და არ ვიცი, რა უნდოდა ეგვიპტეში. ერთხელ "ფეისბუქზე" ხუმრობით დამიწერა, სიზმარში ვნახე, რუსმა გოგომ აუზზე თვალი ჩამიკრა, უცებ თავზე "დრუჟბით" დამადექი და გიჟივით გამეღვიძაო.
– ანუ ეს იმას ნიშნავს, რომ...
ბექა: ეკოს ზეგვალენის ქვეშ ვექცევი?
– ეკო ეჭვიანია?
ბექა: კი, ზომაზე მეტად ეჭვიანია.
ეკო: ეჭვი არის სავსებით ნორმალური, ასე ხარ შენც! როცა მის გარეშე სადმე მივდივარ, მასაც აქვს ასეთი ტექსტი: "წესიერად მოიქეცი!". ეს იმას კი არ ნიშნავს, რომ არ მენდობა, უბრალოდ, განიცდის.
– განშორება გიძნელდებათ?

ბექა: ამ ყველაფერს თან ახლავს მონატრება, მონატრება და მონატრება. კიდევ საჩუქრები, სიურპრიზები... ეკო ის ადამიანია, რომელსაც ამდენი ხანი ვეძებდი.
ქიშმიშიანი "ბულკი" არ არის, მგონი, იარაღის ტარების უფლება აქვს და არ მეუბნება. ძალიან დამოუკიდებელი ადამიანია. მისი წარმატება ჩემი წარმატებაა.
– რაიმეს აკრძალვა, მოთხოვნა... ასეთი რამ თქვენს ურთიერთობაში არსებობს?
ბექა: ჩემი მხრიდან აკრძალვები არ არსებობს.
ეკო: არც მე მახსოვს, რამე ამეკრძალოს შენთვის.
ბექა: რომ ვსვამ და მიკრძალავ, აბა, ეს რა არის?!
ეკო: სმის გამო მომღერლების ნახევარს ზოგს რა დაემართა, ზოგს – რა. "ალილოს" ბიჭები ყველას უყვარს, ამათთან ერთად ქეიფს არაფერი ჯობს, ამიტომ ისე გამოდის, რომ სულ სმა უწევს.

ბექა: დალევით რომ ჩამოჭკნები და ჩამოლპები, მერე აღარავის ენდომები. ასე რომ, ვუჯერებ და აღარ ვსვამ.
ეკო: სმა სიმღერაშიც უშლის ხელს და ხორხის გასაწმენდად ექიმებთან დადის. ისე, ბექას გადასარევი სიმთვრალე აქვს.
– სერიოზული კამათი მოგსვლიათ?
ეკო: ორჯერ სერიოზულად ვიჩხუბეთ და ერთმანეთს დავშორდით. მისგან განსხვავებით, მე ბუტია არ ვარ. გურულები მაგრად მყავს შესწავლილი, შავზე შეიძლება დაგიმტკიცონ, რომ თეთრია.
ბექა: ვისზე ლაპარაკობ! ტანკით მიდიხარ, შენი რომ გაიტანო!
ეკო: სიმართლის დასამტკიცებლად ყველაფერს ვიღონებ. მე, შავზე შავია–მეთქი, იმას ვამტკიცებ და შენ კი თეთრზე მიმტკიცებ, შავიაო. ბექა საოცრად ამაყია. როცა კრიტიკული მომენტია და ნაჩხუბრები ვართ, არ ტყდება.
– ბექა, თქვენზე ჭორაობენ, მექალთანეაო, ესეც ხომ არ არის ხოლმე ჩხუბის მიზეზი?
ბექა: მექალთანე აღარ ვარ!
ეკო: ბექას ცხოვრებაში რაც იყო, ყველაფერი ვიცი. ჰყავდა ერთი ცოლი, რომელსაც გაშორდა. მას მერე დადიოდა ვიღაცეებთან და ამით მორჩა. ზოგადად, ბექა ძალიან თბილი ტიპია, ბევრი მეგობარი ჰყავს. ერთხელ ერთ–ერთი წვეულებიდან ადრე წამოვედი, მაშინ ბექას არ ველაპარაკებოდი. ის ჩემს მეგობრებთან ერთად დარჩა და გართობა გააგრძელა. ცოტა ხნის შემდეგ მესიჯი მომივიდა, ბექა ვიღაც გოგოებთან "გულაობსო". აი, ასე ჩნდება ჭორები. რამე სერიოზული რომ გავიგო, თავს მოვაჭრი!
– "კარგი ინფორმატორები" გყოლიათ.
ბექა: ხო, ეს უნდა იყოს გენპროკურორის მოადგილე!
ეკო: თუ 5 წუთი ვიფიქრე, ზუსტად გამოვიცნობ, სად და ვისთან ერთად არის და რას აკეთებს.
– ეკო კვარტეტ "ალილოს" მენეჯერია. ამ საქმეს თავს როგორ ართმევს?
ბექა: ასეთი ნიჭიერი რომ არ იყოს, საქმე არ გამოუვიდოდა. პიარს, კონცერტების დაგეგმვას, თავს მშვენივრად ართმევს.
– ხელფასს უხდით?
ბექა: წილში გვყავს.
ეკო: ამათ მე ვუხდი ხელფასს იმიტომ, რომ მე ვარ პროდიუსერი.
ბექა: "ალილოს" ბევრი სიახლე აქვს. რამდენიმე ახალი სიმღერა ჩავწერეთ, საახალწლოდ ახალი შემართებით გამოვჩნდებით. კლიპი გვაქვს, რომელიც ჯერ ტელეეთერში არ გასულა. პრემიერისთვის ვემზადებით.
– ეკოს ამღერებას ხომ არ აპირებთ?
ბექა: არა, ეკო მადლიერი მსმენელია, ასე რომ, არც ცდილობს, იმღეროს. ამაზე თავიდანვე შევთანხმდით.

ეკო: თუ მომინდა, რა გამაჩერებს!

ბექა: რომ ვერ მღერი?
ეკო: მასწავლე და ვიმღერებ! სმენა მაქვს.
ბექა: ეკო ცეკვავს, მე – ვმღერი. ასე ტაშ–ფანდურში ვატარებთ ცხოვრებას. სხვათა შორის, ადრე ქართულ ხალხურ ცეკვებზე დავდიოდი, მაგრამ ცეკვის ამბიცია არ მაქვს.
– ეკო, ელოდებოდით, რომ პროექტში "ცეკვავენ ვარსკვლავები" მიგიწვევდნენ?

ეკო: არ ველოდებოდი, რადგან კლუბებში ცეკვის გარდა, არანაირი გამოცდილება არ მქონდა. ალინა არველაძემ დამირეკა და პროექტში მონაწილეობა შემომთავაზა. დავთანხმდი. ეს საქმე შრომატევადი და რთულია, სულ რეპეტიციაზე ვართ.

ბექა: მთელ დღეებს რეპეტიციას უთმობს.
ეკო: ამჟამად მთელი ჩემი ცხოვრება ამ პროექტით შემოიფარგლება. ბექა სულ მსაყვედურობს, ახალ წლამდე ორშაბათობით იარუსებიდან უნდა გნახოო. ღმერთმა ქნას, მართლა ახალ წლამდე მივიდე. ფინალი ახალ წელს არის.
– ბექა, თქვენ რა რეაქცია გქონდათ, როცა გაიგეთ, რომ ეკოს უნდა ეცეკვა?
ბექა: ეს შემოთავაზება რომ მიიღო, მაშინვე მოვიწონე, ვუთხარი, ყველაფერი გამოგივა–მეთქი. ისედაც არ მიყვარდა ორშაბათი და ახლა ხომ საერთოდ! ყოველ ტურზე ვკვდები. ეკო სცენაზე რომ გამოდის, ვერ ვუყურებ, ვფიქრობ, რამე არ მოუვიდეს. ცეკვა რომ მთავრდება, მიხარია. ჩემი მხრიდან ქება უხერხულია, მაგრამ ეკო ძალიან კარგად ცეკვავს, სცენაზე უკომპლექსოა, კარგი პლასტიკა აქვს. მისი მონაცემებით თუ შესაძლებლობებით ყველა გაკვირვებულია.
– ბექა, "ფეისბუქზე" ყოველ ორშაბათს მოგვიწოდებთ, რომ ვიაქტიუროთ და ეკოს ესემეს–ები გავუგზავნოთ, ტექსტები ყოველთვის იუმორით არის დაწერილი.
ეკო: "მეგობრებო, თქვენი ლამაზი თვალების ჭირიმე, დაუმესიჯეთ ეკოს!". აი, ამ შინაარსის ტექსტებს ავრცელებს.
ბექა: შეძლებისდაგვარად ამის მიღმაც ვაქტიურობთ. ვუმესიჯებ, მთელი ჩემი ბიუჯეტი ორშაბათს იხარჯება და არა მარტო ჩემი... (იცინიან).
– მაინც რამდენ ესემეს–ს უგზავნით, 100–ზე მეტს?
ბექა: ბევრს. ჩემი მეგობრებიც უმესიჯებენ.
– ერთმანეთის ოჯახებს, მშობლებს იცნობთ?
ეკო: ბექას ვინც კი ნათესავი ჰყავს, ყველას ვიცნობ. როცა ნაჩხუბრები ვართ, ყველა მე მიჭერს მხარს. მასთან გურიაშიც ვარ ნამყოფი. რომ ჩავედით, მანქანიდან იმდენი ადამიანი გადმოვიდა, ბექას მამამ ვერ მიცნო, მკითხა, ბავშვო, შენ ვისი ხარო. ვუპასუხე დედასი და მამასი–მეთქი. ცოტა ხანში, ეტყობა, ბექამ უთხრა, რომ ეკო ვიყავი. მოვიდა და მითხრა, დედა, ეს ფილარმონია ქალი როგორ ვერ გიცანი, მაპატიეო. ბექას ძალიან საყვარელი მამა ჰყავს.
ბექა: ეკოს ოჯახის წევრებთან მე ასეთი ახლო ურთიერთობა არ მაქვს.
ეკო: ღამის სამ საათზე დეიდაჩემთან მე ვჭამდი?!
ბექა: მშობლებთან სიახლოვე ვიგულისხმე.
ეკო: დედაჩემს იცნობს, მამას – არა, მაგრამ მთავარი ეს არ არის, მთავარია, რომ ერთად კარგად ვგრძნობთ თავს.

ლანა კიკნაძე