როგორია იდეალური სხეული?

სასტუმროთა ქსელის Travelodge-ს ადმინისტრაციამ ბრიტანეთის მოსახლეობა გამოკითხა. კითხვა ასეთი იყო - რას შეცვლიდნენ საკუთარ გარეგნობაში.

აღმოჩნდა, რომ გამოკითხული ბრიტანელების 80%-ს ყველაზე მეტად ზედმეტი წონა აღელვებს. ყოველი ათი გამოკითხული ქალიდან შვიდმა - აღიარა, რომ წონასა და იდეალურ სხეულზე დღის განმავლობაში ყველაზე მეტს ფიქრობს და ამის გამო, ყოველ ჯერზე გუნება უფუჭდება.

გამოკითხულ ქალთა დიდ ნაწილს საკუთარი გარეგნობა იმდენად აღიზიანებს, რომ სარკეში ჩახედვაც არ სურს. გამოკითხულთა უმეტესობამ განაცხადა, რომ კამერონ დიასის ფეხები, კიმ კარდაშიანის საჯდომი, ჟიზელ ბუნდჰენის მუცელი და ჯესიკა სიმპსონის მკერდი სურს. ისინი თვლიან, რომ ასეთი სხეული იდეალური იქნება.

თუმცა, ზედმეტი წონის პრობლემა და მოხდენილი სხეული მხოლოდ ქალების ოცნება არ ყოფილა - ბრიტანელი მამაკაცების 61 %-სთვის ყველაზე დიდი საზრუნავი მუცელზე ზედმეტი ცხიმის მოშორებაა. მამაკაცებმა აღიარეს, რომ წონის დაკლებაზე დღის განმავლობაში მინიმუმ სამჯერ ფიქრობენ.

მათ სურთ დევიდ ბექჰემის ფეხები, ჩანინგ ტატუმის საჯდომი და მეთიუ მაკკონაჰის დაკუნთული მუცელი ჰქონდეთ. სხეულის ყველაზე პრობლემურ ნაწილად გამოკითხული ქალებისა და მამაკაცების დიდი ნაწილი მოშვებულ მუცელს მიიჩნევს. ქალებისთვის ლამაზი მუცლის შემდეგ ყველაზე მნიშვნელოვანი ფეხებია, ხოლო მამაკაცების დიდი ნაწილი თვლის, რომ სიმპათიური მხოლოდ იმ შემთხვევაში იქნება, თუკი დაკუნთული მკლავები ექნება.



მომზადებულია dailymail.co.uk-ის მიხედვით.