კეიტ მიდლტონმა კიმ კარდაშიანს საჩუქარი უკან დაუბრუნა

მსოფლიო მოდის კრიტიკოსები ერთხმად აღიარებენ, რომ კეიტ მიდლტონს უზადო გემოვნება აქვს და მის ჩაცმის სტილს უამრავი ადამიანი ჰბაძავს. ცნობილი დიზაინერებისთვის კემბრიჯის ჰერცოგინიასთვის სამოსის შექმნა დიდი პატივია. ცოტა ხნის წინ, კიმ კარდაშიანმა, რომელიც დებთან ერთად ბრენდ „Dorothy Perkins“-სთან თანამშრომლობს, მიდლტონს საკუთარი კოლექციიდან რამდენიმე მოდელი საჩუქრად გაუგზავნა. როგორც ჩანს, ახალბედა დიზაინერს იმედი ჰქონდა, რომ კეიტი მის მიერ შექმნილ ტანსაცმელს ჩაიცვამდა, თუმცა, ჰერცოგინიამ რეალიტი-შოუს ვარსკვლავს ამანათი მყისვე უკან გადაუგზავნა.

გამოცემა „Examiner“ წერს, რომ ცნობილი ამერიკელის საჩუქარი კეიტმა ზრდილობიანად დააბრუნა. სტატიაში აღნიშნულია, რომ კარდაშიანების კოლექციაში შევხვდებით ტანზე მომდგარ კოფტებსა და ლეოპარდის პრინტით გაფორმებულ ვიწრო შარვლებს, რაც სამეფო ოჯახის წარმომადგენლისთვის სრულებით შეუფერებელია. უინძორების სასახლესთან დაახლოვებულმა უცნობმა პირმა ჟურნალს უამბო: „კეიტს არ შეუძლია ღონისძიებას, რომელსაც დედოფალი ესწრება, ლეოპარდის ტყავის ფერებში გადაწყვეტილ იაფფასიან მინი ქვედა ბოლოსა და ოქროსფერი ბრჭყვიალებით გაწყობილ პიჯაკში ესტუმროს.“
ავტორი: ეთუნა მზარეულიშვილი