როგორ გამოვთვალოთ "დღის ციფრი"

ნუმეროლოგიის, უძველესი ეზოტერიკული დისციპლინის მეშვეობით ადამიანები ანტიკური ხანიდან მოყოლებული ცდილობენ, ახსნან თავიანთი შესაძლებლობები, მიდრეკილებები, ცხოვრების პოზიტიური თუ ნეგატიური პერიოდები.

დღეს ინდური ნუმეროლოგიის გამოყენებით განვიხილავთ, როგორ გამოვთვალოთ ამა თუ იმ დღის ნუმეროლოგიური ციფრი და განვსაზღვროთ ამ დღის ზეგავლენა ადამიანზე. ამა თუ იმ "დღის ციფრის" გამოსათვლელად ჯერ უნდა გამოვითვალოთ "ბედის ციფრი" შემდეგ -"თარიღის ციფრი" და შევკრიბოთ.

დავუშვათ, ადამიანი დაიბადა 1979 წლის 15 აგვისტოს, შევკრიბოთ რიცხვებში შემავალი ციფრები: 1 + 5 (დღე) + 8 (თვე) + 1 + 9 + 7 + 9 (წელი) = 40. მიღებული რიცხვი დავიყვანოთ ერთნიშნა ციფრამდე: 4 + 0 = 4. ე.ი. ამ ადამიანის "ბედის ციფრი" ყოფილა 4.

ახლა ასეთივე მეთოდით შევკრიბოთ ჩვენთვის საინტერესო თარიღის, ანუ წლის თვისა და დღის ციფრები. დავუშვათ, გვაინტერესებს, რა გავლენას მოახდენს 1979 წლის 15 აგვისტოს დაბადებულ ადამიანზე 2011 წლის 17 დეკემბერი: 1 + 7 (დღე) + 1+2 (თვე) + 2 + 0 + 1 + 1 (წელი) = 15 = 1 + 5 = 6. საბოლოოდ კი შევკრიბოთ მიღებული "ბედის ციფრი" (4) და "თარიღის ციფრი" (6), შემდეგ კი დავიყვანოთ ერთნიშნა ციფრამდე: 4 + 6 = 10 = 1 + 0 = 1, ანუ 1979 წლის 15 აგვისტოს დაბადებული ადამიანისთვის 2011 წლის 17 დეკემბრის გავლენა იქნება ის, რაც ქვემომოყვანილ ცხრილში შეესაბამება 1-იანის გავლენას.

დღის ციფრი 1 (მზე) -კარგი დღეა შესაძლებლობების რეალიზებისთვის, აგრეთვე გავლენიან ადამიანებთან შეხვედრისთვის. შეეცადეთ, თამამად იკისროთ პასუხისმგებლობა, გამოავლინოთ ლიდერის თვისებები.

დღის ციფრი 2 (მთვარე) -ემოციური დღეა, ამიტომ, ურთიერთობებში სასურველია ტაქტისა და დიპლომატიის გამოჩენა. დაინტერესდით ოჯახის წევრთა პრობლემებით და მათ მიმართ გულისხმიერება გამოიჩინეთ.

დღის ციფრი 3 (მარსი) -ენერგიული დღეა. შესაძლოა, მოვლენები დინამიკურად განვითარდეს. არ არის რეკომენდებული ალკოჰოლის მიღება. სიფრთხილე გამოიჩინეთ ავტომობილის მართვისას.

დღის ციფრი 4 (მერკური) -დიდია საქმიანი შეხვედრებისა და ახალი ურთთიერთობების დაწყების ალბათობა, შესაძლოა, მიიღოთ ინფორმაცია, რომლის გამოყენებაც პროფესიულ წინსვლას შეუწყობს ხელს. თუმცა იზრდება მოტყუებისა და ფინანსურ სფეროში დანაკარგების ალბათობაც.

დღის ციფრი 5 (იუპიტერი) -ეს დღე სასიკეთოა უცხოელებთან ურთიერთობებისთვის, უცხოეთთან დაკავშირებული პრობლემების მოგვარებისთვის, აგრეთვე, სოციალურ სფეროში სიახლეების შეტანისთვის.

დღის ციფრი 6 (ვენერა) -პასიური დღეა. სასიკეთოა დასვენება, განტვირთვა, სასიყვარულო ურთიერთობების დარეგულირება და გართობა. კარგი დღეა ოჯახში სიახლეების შეტანისთვის, თუმცა იზრდება ფინანსური გასავლები.

დღის ციფრი 7 (სატურნი) -არ არის გამორიცხული მოულოდნელი პრობლემების წინაშე
აღმოჩნდეთ. ამ დღეს ძლიერდება დეპრესიული ფონი, ამიტომ, ირწმუნეთ საკუთარი თავისა და შესაძლებლობების.

დღის ციფრი 8 (ურანი) -მოულოდნელი ცვლილებების დღეა, არ არის გამორიცხული ექსტრემულ სიტუაციებში მოხვდეთ. შეეცადეთ, პრობლემების გადაწყვეტის არაორდინალური გზები მოძებნოთ.

დღის ციფრი 9 (ნეპტუნი) -სასიკეთო დღეა წარსულის გასაანალიზებლად დაშვებული შეცდომების გამოსასწორებლად.


ასტროლოგი რამაზ გიგაური
გაზეთი "ყველა სიახლე"