ქვეყნები, სადაც ცხოვრება ყველაზე კომფორტულია

25 წლის წინ გამოცემა The Economist Intelligence Unit-მა იმ ქვეყნების რეიტინგი შეადგინა, რომლებიც საშუალოვადიან პერსპექტივაში ყველაზე წარმატებულ ქვეყნებად იქცეოდნენ. რეიტინგში აშშ საპატიო პირველ ადგილზე იყო. 1988 წელს სწორედ აშშ იყო საუკეთესო ქვეყანა ბავშვის გასაჩენად, ვინაიდან, მკვლევარების ვარაუდით, ორ ათეულ წელიწადში ის პლანეტაზე ყველაზე განვითარებული ქვეყანა იქნებოდა.

ბოლო წლების განმავლობაში მსოფლიოს პოლიტეკონომიკურ რუკაზე ძალთა გადანაწილება შეიცვალა, მეცნიერებმა კი თავიანთ პროგნოზებს მეტი სიზუსტე შესძინეს. ამგვარად, ქალებისთვის, რომლებიც 2013 წელს ბავშვის გაჩენას აპირებენ, საინტერესო იქნება რეიტინგი ქვეყნებისა, სადაც მათ შვილებს წარმატებული მომავალი ექნებათ.

სიაში პირველ ადგილზე შვეიცარიაა, რომელიც მსოფლიოს უმდიდრეს ადამიანთა ქონებას ინახავს და ევროპის სტაბილურობის საყრდენს წარმოადგენს. რეიტინგის პირველ ათეულში ევროპის კონტინენტის ბევრი ქვეყანა მოხვდა, თუმცა მხოლოდ ერთი მათგანია ევროკავშირის წევრი - ეს ნიდერლანდებია, რომელიც მერვე ადგილზეა. პრობლემური ეკონომიკის მქონე ევროკავშირის ქვეყნები ძირითადად მეორე და მესამე ათეულში გადანაწილდნენ. მესამე, მეოთხე და მეხუთე პოზიციებს, შესაბამისად, ნორვეგია, შვედეთი და დანია ინაწილებენ.

თუ შვილის გაჩენას სკანდინავიასა და შვეიცარიაში ვერ შეძლებთ, ავსტრალიაც შეგიძლიათ სცადოთ, ის რეიტინგის მეორე ადგილზეა. მეექვსე და მეშვიდე პოზიციებს დასჯერდნენ სინგაპური და ახალი ზელანდია. მეცხრეზე აღმოჩნდა კანადა, ტოპ-ათეულს კი ჰონკონგი აგვირგვინებს.

რეიტინგის შედგენისას მკვლევარები უამრავ მაჩვენებელს ითვალისწინებდნენ, მათ შორის ობიექტურს - შემოსავლის საშუალო მაჩვენებელს, და სუბიექტურს - თავად რეზიდენტების ცხოვრებით კმაყოფილებას.

ყოფილი ლიდერი აშშ ამჯერად რეიტინგის მე-16 ადგილზე აღმოჩნდა, მე-14-ზე - ტაივანი, მე-15-ზე კი - ბელგია. მეორე ათეულშია ასევე ფინეთი (11), ირლანდია (12), ავსტრია (13), არაბეთის გაერთიანებული საემიროები (18), სამხრეთ კორეა (19) და ისრაელი (20).

თუ The Economist-ის მკვლევარებს დავუჯერებთ, ყოფილი სოციალისტური ბლოკის ქვეყნებიდან ყველაზე პერსპექტიული ჩეხეთია, რომელიც 28-ე ადგილს ესპანეთთან ერთად ინაწილებს, ასევე სლოვენია (32) და პოლონეთი (33).

რეიტინგში მოხვდნენ ასევე "არაბული გაზაფხულის" გამარჯვებული ქვეყნები: ტუნისი (59) და ეგვიპტე (60), ხოლო ლიბია და იემენი რეიტინგში ვერ მოხვდნენ. მიზეზი მარტივია, The Economist-ს მიაჩნია, რომ "არაბული გაზაფხული" ამ ქვეყნებში უახლოეს მომავალში არ დადგება.

მომზადებულია The Economist-ის მიხედვით.