ვნების ფერი: რატომ ირჩევენ ცნობილები წითელს?

წითელი ფერი რომ თვალს ჭრის, გულს აჩქროლებს და აღაგზნებს, ამას თქმა არ უნდა. მაგრამ თუ მას სხვა ფერებთან კომბინაციაში გამოიყენებთ, შესაძლოა, საწინააღმდეგო ეფექტი მიიღოთ.

ბოლო დროს წითელი ცნობილების საყვარელი ფერი გახდა. წითლებში გამოწყობილი ვარსკვლავების ნახვა შესაძლებელია, როგორც სადღესასწაულო ღონისძიებებზე (ხშირად წითელ ხალიჩასთან შერწყმითაც), ასევე ყოველდღიურ ცხოვრებაში.

სუპერმოდელი ალესანდრა ამბროსიო მაქმანებიან წითელ კაბაში ბრაზილიური მარკა Melissa-სთვის შექმნილი საკუთარი ფეხსაცმლის ხაზის პრეზენტაციაზე გამოცხადდა. ახალგამომცხვარი დიზაინერის კაბა იმდენად მშვენიერი იყო, რომ შეკრების მიზეზი - ფეხსაცმელი, ლამის უყურადღებოდ დარჩა.

მსახიობმა და მოდელმა ლილი კოულმა მოკლე წითელი კაბა-პალტო ხელოვნების სამეფო აკადემიაში მხატვრებთან შეხვედრის დროს ჩაიცვა. კემბრიჯის პრინცესა კეტრინმა კი ამ ღონისძიებისთვის Roksanda Iincic-ის ღია ნაცრისფერი კაბა არჩია. თუმცა სამეფო ოჯახის რძალიც "სცოდავს" ხოლმე წითელი ფერით.

მსახიობი კლერ დეინსი, რომელიც ამჟამად საინტერესო მდგომარეობაში იმყოფება, თავისი ახალი ტელეპროექტისადმი - "უცხო შინაურებს შორის" - მიძღვნილ პრესკონფერენციაზე წითელ მოკლესახელოებიან კაბა-ფუტლარში გამოცხადდა. იგივე ფერის მსგავს სამოსში გასულ კვირას ლონდონში გამართულ გამოფენას კაილი მინოუგი ეწვია.

მიშელ ობამა ლონდონში, ოლიმპიურ თამაშებზე, ამერიკელი სპორტსმენების საგულშემატკივროდ წითელ ტოპსა და შავ შარვალში ჩავიდა. კიმ კარდაშიანი ნიუ იორკის ქუჩაში, საკუთარი ავტომობილისკენ მიმავალი ფოტოგრაფებმა წითელ დეკოლტე ბლუზასა და ვიწრო თეთრ შარვალში დააფიქსირეს. ლანა დელ რეი და გვენ სტეფანი წითელს სცენაზე გამოსვლისას იცვამენ.

მაგრამ წითელი მხოლოდ გამოსასვლელი და სადღესასწაულო ფერი არ არის. ამ ფერის სამოსი ყოველდღიურობაშიც არ გამოიყურება ცუდად. მაგალითად, კიარა ნაიტლი მშვენივრად ირგებს ბავშვის სასეირნოდ გამოყვანისას წითელ კაბას თუ ბლუზას.

ნიკი ჰილტონი თეთრ-წითელ კომბინეზონში სენ-ტროპეს პლაჟზე დასეირნობს. მომღერალი რიანა კი საფრანგეთის სამხრეთით, კურორტზე წითელ ყვავილებიან საცურაო კოსტიუმში იწონებდა თავს.

57 წლის ჯენის დიკინსონსაც უყვარს წითელი ფერი. ყოფილი სუპერმოდელი წითელ ჯინსებში, შავ ტოპსა და წითელ-შავ კაბა-კორსაჟში მშვენივრად გამოიყურება.

სხვათა შორის, წითლისა და შავის კომბინაციასთან ფრთხილად უნდა იყოთ. მიუხედავად იმისა, რომ ეს "დუეტი" კლასიკურად ითვლება, არასწორად შერჩეულმა კომბინაციამ შეიძლება გარეგნულად ჩაგაჟამოთ. წითელ-თეთრი კომბინაცია კი პირიქით, გაგიხალისებთ და გაგინათებთ იერს და დაღლილობასაც კი შეუმჩნეველს გახდის.

საინტერესო ფერთა შეხამება შემოგვთავაზა ჯესიკა ალბამ. ნიუ იორკში სეირნობისას მას წითელი კარდიგანი ემოსა.

წითელი ერთნაირად უხდებათ როგორც ქერა ქალბატონებს, ასევე შავგვრემნებსაც. თუმცა ქერა ქალბატონებს დიზაინერები ურჩევენ, რომ ჩაიცვან მხოლოდ წითლის თბილი ტონები. სხვა შემთხვევაში ისინი საკუთარი ჩაცმულობის ფონზე დაიკარგებიან.

შავგვრემან გოგონებს უფრო გაუმართლათ - მათ შეუძლიათ გამოიყენონ ნებისმიერი ტონი წითელი პალიტრიდან.