როგორ მოვუაროთ თმასა და ფრჩხილებს
2 757 ნახვა
როგორ მოვუაროთ თმასა და ფრჩხილებს
იყო დრო, როდესაც ადამიანზე მისი სიტყვა-პასუხის, განათლებისა და გონიერების მიხედვით მსჯელობდნენ. დღეს მოთხოვნა რამდენადმე შეიცვალა: პიროვნების შესახებ დადებითი აზრი რომ შეგვექმნას, მხოლოდ მისი ინტელექტუალური მონაცემები როდი კმარა; არანაკლებ მნიშვნელოვანია მისი გარეგნული იერსახე, რომელსაც, უწინარეს ყოვლისა, მოვლილი თმა და ფრჩხილები განსაზღვრავს.
თმა
თმა, ისევე როგორც ფრჩხილები, კანის რქოვანი წანაზარდია, რომელიც ადამიანს მთელი სიცოცხლის განმავლობაში ეზრდება და ბუნებრივია, მუდმივ ჰიგიენურ მოვლა-პატრონობას მოითხოვს.
დღემდე კამათობენ, რამდენ ხანში ერთხელ უნდა დაიბანოს თავი ადამიანმა. ამაზე სპეციალისტების პასუხი ერთმნიშვნელოვანია: იმდენჯერ, რამდენიც საჭიროა, რომ თმა მუდამ ბზინვარე, სუფთა, შრიალა და ფუმფულა იყოს.
შამპუნის შესახებ
თმის სისუფთავე და მიმზიდველობა პირდაპირ არის დამოკიდებული მართებულად შერჩეულ შამპუნზე. შამპუნის შეძენისას გირჩევთ რამდენიმე რეკომენდაცია გაითვალისწინოთ:
ურიგო არ იქნება, თუ შამპუნის შეძენამდე გულისყურით წაიკითხავთ მის ეტიკეტს და გაარკვევთ, რომელ დეტერგენტებს შეიცავს იგი, ვინაიდან შამპუნის ეფექტიანობა სწორედ აქტიურ ნივთიერებებზეა დამოკიდებული.
შამპუნის ნატურალურობას მასში შემავალი ნატურალური ინგრედიენტები: ბალახებისა და ხილის ექსტრაქტები, ვიტამინები განსაზღვრავს. ისინი თავის კანისა და თმისთვის მართლაც სასარგებლოა, ამიტომ უპირატესობა სწორედ ამგვარ ინგრედიენტთა შემცველ საშუალებებს მიანიჭეთ.
შამპუნის გამწმენდი უნარი სრულებით არ არის დამოკიდებული იმ ქაფის ოდენობაზე, რომელსაც ის წარმოქმნის. გახსოვდეთ: უხვი ქაფი მაღალ ხარისხს არ ნიშნავს.
ვფიქრობთ, ზედმეტი არ იქნება, თუ აქვე შემოგთავაზებთ რამდენიმე პრაქტიკულ რჩევას, რომლებიც ყოველთვის მოგცემთ ლამაზი თმით თავის მოწონების საშუალებას.
სავარცხელი რბილი და ნატურალური მასალისა შეიძინეთ. თუ გრძელი თმა გაქვთ, უმჯობესია, მის შესაკრავად რბილი ქსოვილისგან დამზადებული თმის სამაგრები გამოიყენოთ.
გრძელი თმა დაბანამდე გულდასმით დაივარცხნეთ.
მოკლე თმა უმჯობესია თმის ძირებიდან დაივარცხნოთ, გრძელს კი ბოლოებიდან ძირებისაკენ აუყვეთ. ამასთანავე, არ არის აუცილებელი, სავარცხლის ერთი ჩამოსმისას თმის მთელი სიგრძე გაიაროთ, - შეგიძლიათ, ეს მანძილი ეტაპობრივად, ნელი მოძრაობებით დაფაროთ.
თავის დაბანისას შამპუნს პირდაპირ თმაზე ნუ დაისხამთ. ჯერ ხელისგულზე გადმოისხით და თითებით ოდნავ ააქაფეთ, მერე კი წრიული მოძრაობებით შეიზილეთ თმასა და კანში, თითქოს მსუბუქ მასაჟს იკეთებთ.
თუ შამპუნის წასმისას თავზე ქაფი უხვად დაგადგათ, ესე იგი, ზედმეტი მოგსვლიათ. მომდევნო ჯერზე მისი ოდენობის შემცირება მოგიწევთ.
თავის მეტისმეტად ცხელი წყლით დაბანა სასურველი არ არის. მთავარია, სწორად დაბანილმა თმამ გაშრობის შემდეგ იშრიალოს.
დაბანის შემდეგ თმა ასე უნდა შეიმშრალოთ: პირსახოცი ჩალმასავით შემოიხვიეთ და როდესაც ის ჭარბ სისველეს შეიწოვს, მოიხსენით. თუ დრო გაქვთ, თმას თავისით გაშრობის საშუალება მიეცით
ფრჩხილების ჰიგიენა რამდენიმე ძირეულ წესს ითვალისწინებს:
არ შეიძლება ფრჩხილების კვნეტა და მათი წვალება უსუფთაო მჭრელი ინსტრუმენტით.
აუცილებელია ფრჩხილების რეგულარული დაჭრა, მათი ძირების სპეციალური საშუალებით გამოსუფთავება.ოჯახის თითოეულ წევრს ფრჩხილების მოსაწესრიგებელი საკუთარი კომპლექტი უნდა ჰქონდეს, მით უფრო - დღეს, როდესაც ასე იმატა სისხლის მეშვეობით გადამდებ ინფექციათა რიცხვმა.
თუნდაც მეტისმეტად გრძელი ფრჩხილების ტარებას იყოთ ჩვეული, აუცილებელია, ისინი რამდენიმე თვეში ერთხელ ძირამდე დაიჭრათ, ვინაიდან ფრჩხილის უკიდურეს ნაწილებში დროთა განმავლობაში ფერხდება კვება, ქვეითდება ნივთიერებათაAცვლა, შედეგად ფირფიტა შესახედაობას იცვლის, იქერცლება და აშრევებას იწყებს, მასზე თვალით შეუმჩნეველი მიკრობზარები ჩნდება, ასეთი ფრჩხილი კი ღია კარიბჭეა დაავადების გამომწვევი ბაქტერიებისთვის
ფრჩხილების დაზიანების ნიშნებია აქერცვლა, აშრევება, მსხვრევადობა და მტვრევადობა,ფორმის, შესახედაობის, ზედაპირის სიგლუვისა და შეფერილობის შეცვლა. რომელიმე ამ ნიშნის აღმოჩენისთანავე მიმართეთ სპეციალისტს, რადგან დაავადების სწრაფი დიაგნოსტიკა მისი სწრაფი განკურნების ერთ-ერთი მთავარი პირობაა.
ზღვის ნაპირზე ფეხშიშველა სიარული სასიამოვნოა, მაგრამ გირჩევთ, ამ სიამოვნებისგან თავი შეიკავოთ - ონიქომიკოზი ხშირად სწორედ იმ სოკოების დამსახურებაა, პლაჟზე რომ "იზრდებიან".
