კაცმა 19 წლის შემდეგ შეიტყო, რომ მისი მეუღლე ადრე მამაკაცი იყო

ბელგიის მკვიდრმა მამაკაცმა, 64 წლის იანმა, 19 წლის შემდეგ აღმოაჩინა, რომ მისი თანამეცხედრე სინამდვილეში მამაკაცი იყო. მონიკა ინდონეზიელი გახლდათ, იანის ოჯახში მოსამსახურედ მუშაობდა და ოჯახის უფროსი მან სწორედ თავისი ქალურობით მოხიბლა. იანს 27 წლის მონიკა ისე ძლიერ შეუყვარდა, რომ მის გამო ცოლს გაშორდა. მონიკა შესანიშნავი დიასახლისი გამოდგა, დიდ მზრუნველობას იჩენდა მეუღლისა და მისი ვაჟების მიმართ, რომელიც იანს წინა ქორწინებიდან ჰყავდა. მეუღლისდა სასიხარულოდ, მან საკუთარი შვილების ყოლაზე უარი განაცხადა. ეს იანისთვის სასიამოვნო ფაქტი გახლდათ, ვინაიდან იმ დროისთვის მას უკვე 44 წელი შეუსრულდა და მესამე შვილის ყოლის არავითარი სურვილი არ გააჩნდა. ცოლ-ქმარს შორის ურთიერთობა ბოლო ორი წლის განმავლობაში დაიძაბა. იანმა ეჭვიანობა დაიწყო და არცთუ უსაფუძვლოდ. მონიკა ბოლო ხანებში სხვა მამაკაცებისადმი დაუფარავ ინტერესს ამჟღავნებდა, სახლში ხშირად შუაღამისას ბრუნდებოდა. სინამდვილე კი მისმა ნათესავმა გაამჟღავნა, რომელიც მათ სტუმრად ეწვია. ფაქტი მონიკამაც აღიარა და ქმარს გამოუტყდა, რომ ადრე ის მამაკაცი გახლდათ. იანისთვის ეს ამბავი იმდენად შოკისმომგვრელი აღმოჩნდა, რომ ფსიქიატრის დახმარება დასჭირდა. მან გაყრის გადაწყვეტილება მიიღო და სასამართლოში სარჩელი შეიტანა. იგი ქონების გაყოფის კატეგორიული წინააღმდეგია, თუმცა სასამართლო მიიჩნევს, რომ მონიკას სრული უფლება აქვს, კანონით დადგენილი ქონების ნახევარი მიიღოს, - იუწყება „დეილი მეილი“.
ავტორი: ნინო მაღალაშვილი