რამ გაუჩინა ლელა მებურიშვილს არწივად გადაქცევის სურვილი

"დეტექტორის" კითხვებმა მსახიობი და გადაცემის - "ეკივოკი" წამყვანი, ლელა მებურიშვილი გაამხიარულა, მაგრამ მურა დათვების დახმარების მეთოდი არ ესიამოვნა და ცხოველებისადმი სოლიდარობის ნიშნად "გამართულ" აქციაში მონაწილეობაზე უარი ბევრი ფიქრის გარეშე თქვა... "ლელას გამო", ნინო ხოშტარიაც უხერხულ სიტუაციაში "აღმოჩნდა"...

- ყოფილა თუ არა შემთხვევა, როცა საკუთარი სიმართლე ვერ დაგიმტკიცებია?
- ალბათ ყოფილა, მაგრამ ისეთი მძაფრი - არა, რომ გონებაში ცუდად ჩამრჩენოდა. სხვათა შორის, უსამართლობას ვერ ვიტან და ყოველთვის ვეცდები, ჩემთვის ძვირფას ადამიანებს საკუთარი სიმართლე დავუმტკიცო. ის კი არა, ყოფილა შემთხვევა, როცა ჩემს მეგობრებს შორის გაუგებრობა მომხდარა და მათ ცალ-ცალკე დავლაპარაკებივარ; ორივესთვის მიმიცია რჩევა: ერთმანეთს დაელაპარაკეთ, მოუსმინეთ და რაღაცები აუხსენით-მეთქი. საბოლოოდ, ისინი გაუგებრობაში გარკვეულან და შერიგებულან.

- ვთქვათ, მეგობარ ბიჭთან ერთად მაღაზიაში ხარ. შენთვის ვერაფერი შეარჩიე და უკან ხელცარიელი ბრუნდები, მაგრამ მაღაზიის დაცვის თანამშრომელმა დაგაკავა და გაჩხრეკა დაგიპირა...
- ...განსაკუთრებული რეაქცია არ მექნება. ვიფიქრებ, რომ რაღაც შეცდომაა. შეიძლება, აპარატმა პრობლემა დააფიქსირა. დაცვის თანამშრომლის მოვალეობა ის არის, რომ შეამოწმოს და გაარკვიოს, რა მოხდა. საკუთარ თავში დარწმუნებული ვიქნები. ბოლოს და ბოლოს, 2 წამში ყველაფერს გაარკვევენ და მიხვდებიან, რომ ჩემი დაკავება შეცდომა იყო.

- ვთქვათ, ჩანთაში მაღაზიის კუთვნილი მაისური აღმოგიჩინეს...
- გამეცინება. ვიფიქრებ, რომ "ფარული კამერის" მახეში გავები. შეიძლება, მაღაზიის რომელიმე თანამშრომელი ან თანმხლები მეგობარი ბიჭი გამეხუმრა.

- ცხოველები გიყვარს?
- კი, ძალიან.

- ვთქვათ, "ცხოველთა დამცველთა კავშირიდან" დაგირეკეს და საქართველოში მძიმე პირობებში მყოფი დატყვევებული მურა დათვებისადმი სოლიდარობის ნიშნად, ვოლიერში მთელი დღის გატარება გთხოვეს...
- (იცინის) აუ, ეს ძალიან არაკომფორტული და არასასიამოვნო იქნებოდა! შევთავაზებდი, - იქნებ, სხვა ხერხით დაგეხმაროთ-მეთქი?!

- შანსი რომ გქონდეს, 1 დღით რომელ არსებად გადაიქცეოდი?
- ძალიან საინტერესო კითხვაა! ალბათ, რომელიმე ჩიტს ავირჩევდი. სხვათა შორის, ამაზე ადრეც მიფიქრია. ფრენა ძალიან მაგარი იქნება! არწივი მომწონს: ძლიერია, ძალიან მაღლა დაფრინავს... რომელიღაც ქვეყანაში ვიყავი, სადაც დიდი ზოოპარკი იყო. იქ არწივების შოუ ვნახე: გაწვრთნილი ფრინველები ძალიან მაღლა აფრინდებოდნენ, მერე კი ნიშანზე - ანუ ხელის დაქნევაზე დიდი სისწრაფით, უკან მოფრინავდნენ! ამ სანახაობამ ჩემზე დიდი შთაბეჭდილება მოახდინა! უბრალოდ, ცოტათი არასასიამოვნოა ის ფაქტი, რომ მტაცებელია, მაგრამ 1 დღით შეიძლება, არწივად ყოფნაც ინატრო (იღიმის).

- დღის განმავლობაში არწივს მოგშივდება და ცხოველებზე თავდასხმა მოგიწევს...
- 1 დღე საჭმლის გარეშეც გავძლებდი. უფრო მეტიც - ჭამაში დროს არ დავკარგავდი, ყოველ შემთხვევაში, ამას მაქსიმალურად შევეცდებოდი. ისე, ზოგიერთ ცხოველს ადამიანებიც ვჭამთ, სამწუხაროდ.

- არწივად ყოფნის პერიოდს როგორ გამოიყენებდი?
- მსოფლიოს სხვადასხვა ადგილს მოვინახულებდი, დღის ბოლოს კი პარიზში დაფრენაც შეიძლება...

- ვთქვათ, დღის ბოლოს პარიზში ისევ ადამიანად იქეცი. რას იზამ? არა მგონია, არწივს ნისკარტით ფული და პასპორტი თან წაგეღო.
- რაღაცას მოვახერხებდი. ნაცნობს ვიპოვიდი ან რომელიმე ახლობელს დახმარებას ვთხოვდი - პასპორტს და ფულს გამოვაგზავნინებდი.

- ბავშვურ ლოგიკას კარგად ხვდები?
- ვიდრე "ეკივოკის" წამყვანი გავხდებოდი, ამ გადაცემაში სტუმრად ვიყავი. ყველამ აღნიშნა, რომ ბავშვების მიერ ახსნილი სიტყვები კარგად გამოვიცანი. სხვათა შორის, გავიმარჯვე კიდეც.

- განსაკუთრებულად ბავშვების მიერ ახსნილი რომელი სიტყვა დაგამახსოვრდა?
- პატარა სანდრომ "რომანტიკა" ძალიან მაგრად ახსნა. თან, ლაპარაკი ასე დაიწყო - რა თქმა უნდა, ამ სიტყვის მნიშვნელობა ჩემთვის უნდა გეკითხათ, რადგან ამ საკითხის სპეციალისტი ვარ - დიდი გამოცდილება მაქვს. კარგად ვიცი, "რომანტიკა" რაც არისო (იცინის).

- მოდი, სიტყვა - "რომანტიკა" თავად ახსენი...
- სანდრომ ასე ახსნა: ბიჭი გოგოს "ესემესებს" სწერს და პასუხს ელოდება; მერე ერთმანეთს ხვდებიან. სანთლები ანთია. ნავში სხდებიან და მიდიან. წყნარი მუსიკა უკრავს. ამ დროს ბიჭი ძალიან ნერვიულობს და ოფლიანდებაო (იცინის). რომანტიკა ჩემთვისაც ლამაზ მუსიკასთან ასოცირდება. გოგო და ბიჭი, ნავი, წყნარი მუსიკა... - "რომანტიკის" სანდროსეული განმარტება მომწონს.

- "ეკივოკიში" მონაწილეობის სურვილს ცნობილი ადამიანები თავად თუ გამოთქვამენ?
- ძირითადად, ბავშვების მშობლები რეკავენ. ცნობილები როცა პირადად მხვდებიან, გადაცემაში მონაწილეობის სურვილს მაშინ გამოთქვამენ.

- ვთქვათ, შალვა ნათელაშვილი გირეკავს და დაჟინებით გთხოვს, "ეკივოკიში" მიმიწვიეო...
- აუ, დიდი სიამოვნებით მოვიწვევდი (იცინის)! ზუსტად ვიცი, რომ ძალიან მაგარი გადაცემა გამოვიდოდა, რადგან შალვა ნათელაშვილი დიდი იუმორის პატრონია. დარწმუნებული ვარ, გადაცემაში მისი სტუმრობა მხიარულად და საინტერესოდ ჩაივლიდა.

- ვთქვათ, ოთხშაბათ დილას ნინო ხოშტარიას სხეულში იღვიძებ...
- მეგონება, რომ ისევ მძინავს!

- ამასობაში, შეშფოთებული ნინო გირეკავს, რომელიც შენს სხეულში "ჩასახლებულა" და გეუბნება, - ჩვენს თავს მომხდარ ამბავს მაინც არავინ დაიჯერებს; ჯობია, ეს ყველაფერი საიდუმლოდ შევინახოთ. და კიდევ, საღამოს "საქართველოს ვარსკვლავის" ჟიურის წევრობა უნდა შეითავსოო.
- თუკი თავად ჩემს საქმეებს მოაგვარებს, მის შემოთავაზებას დავთანხმდები, სხვა რა გზა მექნება?

- მუსიკალური განათლება გაქვს?
- კონსერვატორიასთან არსებულ შვიდწლედში ვსწავლობდი. მივხვდი, ეს კითხვა რატომაც დამისვი: ვეცდებოდი, "საქართველოს ვარსკვლავის" ჟიურის წევრობისთვის თავი გამერთმია.

- ვთქვათ, შენი მცდელობის მიუხედავად, პრესაში, ტელევიზიაში, რადიოში - ყველგან იმაზე ლაპარაკობენ, რომ "ნინო ხოშტარიამ" კონკურსანტები არაადეკვატურად შეაფასა...
- მგონი, ნინო ხოშტარია თავის მართლებას არ დაიწყებდა. ჰოდა, მეც ასე მოვიქცეოდი. უბრალოდ, ვიტყოდი, რომ ამ დღეს განსაკუთრებულ ხასიათზე ვიყავი ან - ვიხუმრე... ისე, არაადეკვატურად არასდროს ვიქცევი და ასეთ მდგომარეობაში სხვას როგორ ჩავაყენებ? შეიძლება, მაქსიმუმ ის თქვან, - ნინო ხოშტარია საკუთარ თავს არ ჰგავდაო...

ეთო ყორღანაშვილი
ჟურნალი ”გზა”