ბერლინში "წიგნების ტყე" გააშენეს

ბერლინში პრენცლაუ-ბერგის რაიონში "წიგნების ტყე" გააშენეს, სადაც გამვლელებს წიგნების აღება, დატოვება და გადაცვლა შეუძლიათ. პროექტი სახელწოდებით Bücherwald ("წიგნების ტყე") ქალთა საგანმანათლებლო კავშირის BauFachFrau-ს წარმომადგენელმა ერთ-ერთმა ხელოვანმა განახორციელა.

Bücherwald-ი ტყეში ნაპოვნი ძველი მორებისგანაა შექმნილი. მორებში სპეციალური თაროებია დამონტაჟებული, რომლებშიც რამდენიმე წიგნი თავსდება. იმისთვის, რომ წიგნები უამინდობისაგან დაიცვან, თითოეული თარო პლასტმასის კარით იხურება. Bücherwald-ი ას წიგნზეა გათვლილი.

ბერლინის მცხოვრებლებმა იდეას მხარი დაუჭირეს - საათიც კი არ გადის, რომ "წიგნების ტყეს" ლიტერატურის რომელიმე მოყვარული არ მიუახლოვდეს, დატოვოს წაკითხული წიგნი და მის მაგივრად ახალი აიღოს. თავად ხელოვანის დაკვირვებით, რომელიც Bücherwald-ს რეგულარულად სტუმრობს და წიგნების ასორტიმენტს იკვლევს, "ტყის" თაროებზე ეგზემპლარების რაოდენობით პირველ ადგილს საბავშვო ლიტერატურა იკავებს. მას უფროსებისთვის განკუთვნილი გერმანულ და ინგლისურენოვანი მხატვრული ლიტერატურა მოსდევს.

წაკითხული წიგნების მსოფლიოსთვის გაზიარება მოდური გახდა: ადამიანები წაკითხულ წიგნს საზოგადოების თავშეყრის ადგილებში – პარკში, სკამზე, ტელეფონის ჯიხურში, მეტროში, სადგურსა თუ აეროპორტში ტოვებენ.
ამ პროცესმა სახელი bookcrossing-ი ("წიგნების გადაკვეთა") მოიპოვა და შესაძლოა, მალე მთელი მსოფლიო ერთ დიდ სამკითხველოდ აქციოს.







მომზადებულია yes.com-ის მიხედვით.