ლექს–სენი: "ვერ გაგიმხელთ, სად ვმუშაობ"

ერთ დროს ძალიან პოპულარული რეპერი ლექს–სენი – ლექსო ქავთარაძე, რომელიც წინა ხელისუფლების ფავორიტებს შორის მოიაზრებოდა, შოუბიზნესიდან მოულოდნელად გაქრა. მიზეზად თავად იმას ასახელებს, რომ უთანხმოება მოუვიდა ჯგუფთან, რომელიც, როგორც ამბობენ, მაშინდელ შოუბიზნესს მართავდა. ამის შემდეგ რეპერს მძიმე პერიოდი დაუდგა, ფინანსურად გაუჭირდა, მანქანასაც კი შეელია. მაინც მოახერხა, ახალი სიმღერებიც ჩაწერა, თავისი ჯგუფიც ჩამოაყალიბა და გეგმაც დასახა, რომლის განხორციელების იმედი ქვეყანაში შექმნილმა ახალმა რეალობამ მისცა.
– ლექსო, ადრე ამ თემის კონკრეტიზაციაზე თავს იკავებდით, ახლა თუ შეგიძლიათ ღიად ისაუბროთ, რატომ ჩამოშორდით ქართულ შოუბიზნესს?
– შოუბიზნესი რამდენიმე კლანმა ჩაიგდო ხელში. მე კი ყოველთვის სიმართლის მხარეს ვიდექი, ჩემს აზრებს ხმამაღლა ვაფიქსირებდი და მხოლოდ ჩემს ღირებულებებს მივყვებოდი. ჩემი მოსაზრებები ვიღაც–ვიღაცეებს არ მოეწონათ. ამ პერიოდში უკვე ყველაფერი მართვადი იყო, "რუსთავი 2"–სა და "იმედზე" მხოლოდ ყოფილი ხელისუფლების კარის დამქაშების სიმღერები ტრიალებდა. მოკლედ რომ გითხრათ, შავ სიაში მოვხვდი, მაგრამ სანამ ეს მოხდებოდა, სიტუაცია კარგად შევისწავლე და ხმამაღლა ვთქვი, რომ ხელისუფლების კონცერტებზე არ გამოვიდოდი. მივხვდი, რა თამაშიც იწყებოდა. სადაც სიბინძურე იხარშებოდა, იმ ქვაბში მოხარშვა ნამდვილად არ მინდოდა. 2009 წლიდან, ჩემი განსხვავებული პოლიტიკური აზრის დაფიქსირების შემდეგ, ყველასთვის მიუღებელი გავხდი, თუმცა ვფიქრობ, რომ ამ ყველაფერმა კარგი შედეგი გამოიღო.
– ამ პერიოდში გაჩერდით, აღარ მუშაობდით?
– ვმუშაობდი, მაგრამ ეს ყველაფერი სად უნდა გამომეტანა?! როცა წამყვანი ტელეკომპანიების გადაცემებს ჩემი სახე სჭირდებოდა, მაშინ ყველა მეძახდა. მათი თამაშიც ადრევე შევაფასე და სიტუაციას გამოვერიდე. დაძველდა ყველაფერი, ჩემი შემოქმედება კი სულ განახლების პროცესშია. ჩემი ახალი სიმღერა ინტერნეტსივრცეში უკვე ბევრია. ამბიციით არ ვამბობ, მაგრამ ბევრ რაღაცაში ყოველთვის პირველი ვიყავი.
– მამუკა ღლონტი და მაკა ასათიანი ახალ მუსიკალურ არხს ხსნიან. ერთ დროს თქვენი და ღლონტის ტანდემი ძალიან წარმატებული იყო. მერე კი თქვენ შორის შავმა კატამ გაირბინა. ახლა ისევ ხომ არ აპირებთ მასთან თანამშრომლობას?
– ეს სიახლე პირველად თქვენგან გავიგე. მამუკა ღლონტმა ყველაზე კარგად იცოდა, ეს სისტემა როგორ ემუშავებინა. მასთან თანამშრომლობას სიამოვნებით გავაგრძელებ.
– მაშინ თქვენს ურთიერთობაზე ბევრი ჭორ–მართალი ვრცელდებოდა. სინამდვილეში რა მოხდა თქვენ შორის?
– იმ მომენტისთვის ჩვენი ურთიერთობა ამოიწურა და საკმარისი ფინანსებიც აღარ იყო. მაშინ მამუკა შეიძლება უკმაყოფილოც დარჩა, მაგრამ შემდეგ, მე როგორც ვიცი, ამ ყველაფერს გაგებით მოეკიდა. მასთან თანამრომლობა აღარ გავაგრძელე, რადგან რესურსები აღარ გვქონდა. ის ტელევიზიაც პოლიტიკური მიმართულებით წავიდა.
– აქტიურ კარიერას მას შემდეგ ჩამოშორდით, როცა კონკურს "პატრინოტში" მიიღეთ მონაწილეობა. მაშინ რაღა მოხდა?
– ბევრს პატრიოტიზმის არსი არ ესმის და ხშირად პოლიტიკასთან აიგივებენ. მეამაყება ის, რომ ჩემი პატრიოტული სიმღერა დღემდე ჰიტია. პატრიოტიზმი მხოლოდ სადღეგრძელოს თქმა და ნატო–ში გაწევრების ოცნება არ არის, სულ სხვა რამაა. შენს ქვეყანას და ქართველ მოძმეს სათუთად უნდა მოექცე. ჩემმა საკონკურსო სიმღერამ გაიმარჯვა, ყველა მღეროდა. პოლიტიკამ კი სათავისოდ გამოიყენა. მგონი, ამით თქვენს კითხვას პასუხი გავეცი.
– ამ ხნის განმავლობაში სცენაზე აღარსად გამოსულხართ?
– კი, როგორ არა. გასულ ზაფხულს ბათუმში სოლო კონცერტიც მქონდა. ვერ გეტყვით, რომ კონცერტს ზღვა ხალხი დაესწრო, მაგრამ მაყურებლის ნაკლებობაც არ იყო... მთელი ეს პერიოდი პოლიტიკის დოღი იყო და იმედი მაქვს, ახალი მთავრობა ყველაფერს დააბალანსებს. ახალი ხელისუფლების მოსვლაში გარკვეული წვლილი მეც მიმიძღვის.
– რას გულისხმობთ?
– მე პირველი ვიყავი, ვინც ბატონი ბიძინა ივანიშვილის გამოჩენას მივესალმე. ცვლილებების მომხრე ვარ. პრეზიდენტი ჩემი ძმაც რომ ყოფილიყო, მაინც ვიტყოდი, რომ ცვლილებები აუცილებელი იყო. ხელისუფლების სათავეში 8 წლის განმავლობაში არ შეიძლება ერთი და იგივე გუნდი იყოს, რესურსები იწურება და სიახლეებია საჭირო. სწორედ ჩემი პოლიტიკური პოზიციის დაფიქსირების შემდეგ ბევრი ადამიანი გადამემტერა, მათ შორის – შოუბიზნესის წარმომადგენლებიც. თავიანთი ჭკუით, სცენას მომაშორეს, მაგრამ ისინი ვერ მიხვდნენ, რომ ჩემი სცენა მქონდა, მათი სცენა კი ჩემთვის სცენა არ იყო. ამ ბოლო არჩევნებზეც განსხვავებული პოზიცია დავიჭირე, ჩემი აზრი დავაფიქსირე, მაგრამ საარჩევნო კამპანიაში აქტიურად არ ჩავები, რადგან იქ ისეთი ადამიანები იყვნენ, რომ მე, როგორც ინსტრუმენტი, საჭირო აღარ ვიყავი.
– ამ ხნის განმავლობაში შოუბიზნესიდან თქვენს კოლეგებთან თუ გქონდათ ურთიერთობა?
– დღემდე ყველა გაოცებული თვალით მიყურებს. რამდენიმე ფიგურაზე მაქვს საუბარი, ვინც ამ სფეროს მართავდა. ჩემი სვლები მათ ყოველთვის აოცებდათ, ბევრი მოდიოდა და რჩევას მეკითხებოდა. ბოლო პერიოდში კი ეს სფერო იმდენად გაიყო, არავისთან მქონდა შეხება. მომღერლებზე ცუდს ვერაფერს ვიტყვი, თავიანთი საქმე მათაც ჩემსავით უყვართ და ბევრი მათგანი გაუგებრობაში მოხვდა, არ იციან, როდის რა და ვისთვის უნდა იმღერონ.
– ყველაზე დიდი იმედგაცრუება ვისგან იგრძენით?
– მე ყოველთვის მარტო ვიყავი და განყენებული შოუბიზნესი მქონდა. როცა სხვებთან ერთად სცენაზე ვიდექი, "სადემარკაციო" ხაზი ყოველთვის შეინიშნებოდა, ამას საზოგადოებისგანაც ვგრძნობდი. არასდროს არავის იმედად ვყოფილვარ და იმედგაცრუება ვისგან უნდა მეგრძნო?! თუმცა, მინდა გითხრათ, რომ პოპულარობის მოპოვებასა და გარკვეული ნაბიჯების გადადგმაში ბევრ ადამიანს დავეხმარე, რომლებიც დღეს ვარსკვლავებად ითვლებიან.
– დაგიფასდათ?
– არა ან ვერა. როცა სიკეთეს აკეთებ, სამაგიეროს არ უნდა ელოდო.
– რეპსამყაროში ბერა ივანიშვილის სახით ახალი სახე გამოჩნდა. მის შემოქმედებაზე რა აზრის ხართ?
– მე ვიცოდი, რომ ამ ადამიანს რეპი ძალიან უყვარდა. როცა ბერა ჩემთან მოიყვანეს, 12 წლის იყო. ჩემი დიდი გულშემატკივარი გახლდათ და ერთი პერიოდი ვთანამშრომლობდით კიდეც. ბერა ძალიან ნიჭიერი ადამიანია და მეამაყება, რომ ქართულ ჰიპ–ჰოპს, რომელიც მე დავაარსე, ასეთი კარგი გამგრძელებელი ჰყავს. მისი შემოქმედება ძალიან მომწონს. ამ ეტაპზე მასთან ურთიერთობა ჯერჯერობით არ მაქვს, შემდეგ რა იქნება, ვნახოთ.
– ქვეყანაში ბევრი რამ შეიცვალა, აპირებთ შოუბიზნესში აქტიურად დაბრუნებას?
– რა თქმა უნდა! 4 ახალი სიმღერა ჩავწერე, რომლებსაც ხალხი ინტერნეტის საშუალებით ისმენს და უმრავლესობა დადებითად აფასებს. უახლოეს მომავალში კი ალბომის გამოშვებას ვგეგმავ. ასე რომ, არსად წავსულვარ და არც მარტო ვარ, რამდენიმე ძველი სახეც გაცოცხლდა, შევკრიბე კოლექტივი და უკვე ვმუშაობთ. მეამაყება, რომ ჰიპ–ჰოპის დრო დაბრუნდა. ამაში კი ბერას ძალიან დიდი წვლილი მიუძღვის. რასაც მე ვაკეთებდი, ძველი კლანისთვის აუტანელი იყო და ამ მიმდინარეობის აღმოფხვრა ზიზღითა და შურით სცადეს, მაგრამ არ გამოუვიდათ.
– ბერას მუსიკალური არხიც გაიხსნა. მასთან თანამშრომლობას აპირებთ?
– ასეთ დროს ჯერ შემოთავაზება უნდა იყოს, ასეთი რამ კი ჯერ არ ყოფილა. ისე, არაფერს გამოვრიცხავ. თუკი რამე პოზიტიური და კარგი იქნება, უარს არაფერზე ვიტყვი.
– "გაცოცხლებულ სახეებში" ვის გულისხმობთ, ამჟამად ვისთან თანამშრომლობთ?
– რამდენიმე ახალი სახე წამოვწიე წინ, რომლებთანაც დუეტებზე ვმუშაობ. ჩემს საქმიანობაში მინდოზა და ბიგ თიკოც აქტიურად ჩავრთე. 25 სიმღერისგან შედგენილი ძალიან მაგარი საკონცერტო პროგრამაც მაქვს გაკეთებული. თუკი ვინეს კარგი კონცერტის გაკეთების ინტერესი გაუჩნდება, ჩემი ჯგუფი ქართული ჰიპ–ჰოპის ზეიმის მოსაწყობად ყოველთვის მზად არის. ჩემი გასაკეთებელი გავაკეთე და ჩემი ეპოქა შევქმენი. რეალითი რეპშოუს გაკეთება მინდოდა, მაგრამ არავინ გამოგვეხმაურა. ახლა კი, როცა რამდენიმე ახალი ტელეარხი გაჩნდა, რომელიმე მათგანთან შემიძლია ვითანამშრომლო.
– ოჯახში საქმე როგორ გაქვთ, ცოლ–შვილს რითი არჩენთ?
– ეს ძალიან მტკივნეული თემაა. ჩემი საქმე იმდენად შემოსავლიანი იყო, რომ ამით ვცხოვრობდი. სტუდიებმა, სადაც ვმუშაობდი, მთხოვეს, რომ იმ ალბომების რაოდენობა, რაც იყიდებოდა, არ დამესახელებინა, რომ სხვა შემსრულებლებს არ სწყენოდათ. დღეს, რა თქმა უნდა, ამდენი შემოსავალი აღარ მაქვს. გაყიდული სატელეფონო ზუმერებიდან მწირი თანხა შემომდის. მეგობრები მეხმარებიან და რაღაც–რაღაცეებს ვაკეთებთ. ამის გარდა, ვმუშაობ, მაგრამ ვერ გაგიმხელთ – სად. როცა ძალიან გაგვიჭირდა, უკრაინიდან სიდედრ–სიმამრიც მეხმარებოდნენ.
– როგორია თქვენი ყოველდღიური ცხოვრება?
– ჩემი მეუღლე თბილისში ბევრ რამეში ჯერ არ არის გაწაფული და ამიტომ ბაღიდან ბავშვის გამოსაყვანად წასვლა ხშირად მიწევს. ტატიანა საქართველოს ნელ–ნელა შეეგუა. ხალხი შეუყვარდა და უფრო კომუნიკაბელური გახდა. ერთადერთი პრობლემა, რაც აქვს, უმუშევრობაა. ეს აგიჟებს. ძალიან ვნერვიულობ, რომ ვერაფრით ვეხმარები. რამდენიმე დღის წინ მანქანაც გავყიდე. ფეხით სიარული ძალიან რთულია და ყოველთვის ვერიდები. ბევრი კარგი და ცუდი რეპლიკაც მესმის. თურმე ცნობილი ადამიანი თუ ფეხით დადიხარ, გოიმი ხარ და თუ მაგარი მანქანით მოძრაობ – ნაძირალა. ეს ერის პრობლემაა.
– ერთი პერიოდი უკრაინაში წასვლასაც აპირებდით. რატომ გადაიფიქრეთ?
– ოჯახთან ერთად წასვლას ნამდვილად ვაპირებდი, მაგრამ ქვეყანაში შეცვლილმა პოლიტიკურმა ვითარებამ რაღაც იმედი გაგვიღვიძა. ჩემს ცოლს სწყინდა, რომ ამხელა რესურსების პატრონს შემოსავალი არ მქონდა. საქართველოს გამუდმებით უკრაინას ადარებს. ამ ნიჭით იქ ძალიან ბევრს გააკეთებო, მეუბნება. იქ წასვლას სერიოზულად ვფიქრობდი,
სიახლე ყოველთვის იმედის მომტანია, თუმცა არ გამოვრიცხავ, რომ ამ ყველაფერს შეიძლება დიდი იმედგაცრუებაც მოჰყვეს. ვარდების რევოლუციის შემდეგ ვთვლიდი, რომ ეს სწორი გზა იყო. იგივე დღესაც შეიძლება განმეორდეს, მაგრამ ბატონი ბიძინა იმდენად ჭკვიანი კაცია, ამ ეტაპზე ამ ალბათობის დაშვებაც არ გვინდა და ამ ადამიანს დიდი იმედით შევყურებთ.

სოფიო ბოჭორიძე