როგორ რეაგირებთ შენიშვნებსა და მწარე კრიტიკაზე?

არ არსებობს ადამიანი, რომლისთვისაც შენიშვნა არ მიუციათ ან არ გაუკრიტიკებიათ. თუმცა კრიტიკისადმი ყველას სხვადასხვანაირი დამოკიდებულება აქვს, რაც სრულიად ბუნებრივია.

როგორ რეაგირებთ შენიშვნებსა და სხვადასხვაგვარ კრიტიკაზე, ამაზე სპეციალისტები მსჯელობენ.

სამართლიანი კრიტიკა

თქვენ მიმართ გამოთქმული კრიტიკა სამართლიანია. ეს თქვენც ძალიან კარგად იცით, მაგრამ, როგორც წესი, ცდილობთ, თავი გაიმართლოთ ან თავდასხმაზე გადახვიდეთ. უმჯობესია, თუ ყველაფერს იოლად შეხედავთ - შეძლებთ ხმამაღლა აღიაროთ შეცდომები და, თუ საჭირო გახდება, ბოდიშიც მოიხადოთ. ამაში სათაკილო არაფერია.

თუ ასე მოიქცევით, ბუნებრივია, რომ ის ადამიანი, რომელიც გაკრიტიკებთ, მოლბება, აღარ განაწყენდება და თქვენ მიმართ დამოკიდებულებასაც რადიკალურად შეიცვლის.

უსამართლო კრიტიკა

ყველაზე ხშირად გვხვდება და ყველაზე ძნელი მოსასმენია. ჩვეულებრივ, ასეთ დროს ადამიანი შესაბამის რეაგირებას ვერ ახდენს, რადგან იბნევა. სინამდვილეში კი სასურველია საკუთარი თავის ხელში აყვანა, აზრების მობილიზება და დასაბუთებული არგუმენტების მოსმენა ყოველგვარი ნერვიულობისა და აღელვების გარეშე.

არაკონკრეტული და უსამართლო კრიტიკა

სამწუხაროდ, ამგვარი კრიტიკის მოსმენა ძალიან ხშირად გვიწევს. ასეთ დროს ძალიან რთულია, რაიმე მოვიმოქმედოთ. მაგალითად, თუ ახლო მეგობარი გეუბნებათ, რომ მასთან ყოველთვის უსამართლო ხართ, ბუნებრივია, ასეთი საყვედურის მოსმენისას გულნატკენი დარჩებით.

ამ დროს, ცოტა არ იყოს, გაუგებარია ისიც, თუ როგორი პასუხი უნდა გასცეთ ასეთ საყვედურს; უკეთესია ჰკითხოთ, კონკრეტულად რომელ შემთხვევას გულისხმობს. ამ კითხვით თანამოსაუბრეს ან ჩიხში მოაქცევთ, ან კონსტრუქციული დიალოგისკენ უბიძგებთ.

როგორ ჩავაქროთ კონფლიქტი?

ამ შემთხვევაში ყველაზე მნიშვნელოვანი თქვენი პირველი რეაქციაა, რადგან სწორედ მასზეა დამოკიდებული ის, თუ რამდენად გაღრმავდება კონფლიქტი. ამ დროს ძალზე დიდ როლს ასრულებს ლაპარაკის ტონი: სიმართლეც კი, თუ მკაცრი ტონით ან ირონიით იქნება ნათქვამი, ტკივილს მოგაყენებთ.

უმჯობესია, თუ იფიქრებთ, რომ მას, უბრალოდ, ზედმეტი მოუვიდა და თქვენი წყენინება არ უნდოდა. მაგრამ, მიუხედავად ყველაფრისა, თუ თქვენი თანამოსაუბრე აშკარად კონფლიქტური სიტუაციისკენ გიბიძგებთ, ისევ თქვენთვისაა უკეთესი, თუ არ აჰყვებით. წინააღმდეგ შემთხვევაში, უმნიშვნელო წყენაც კი შეიძლება დიდი, სერიოზული სკანდალის მიზეზი გახდეს. 

ჟურნალი "რეიტინგი"