რატომ "დააპატიმრეს" სამი თვის ჩვილი?

იმ ღამეს (ღამის 3-ის წუთები იყო) ექთანმა დამირეკა. არც კლინიკა, არც სახელი და გვარი დაუსახელებია, პირდაპირ მომახალა, ჩვენთან 3 თვის ბავშვი დააპატიმრეს და იქნებ სასწრაფოდ მოხვიდეთო. ტელეფონი გათიშეს და ჩემი არაერთგზის ცდა, დაფიქსირებულ ნომერზე დამერეკა, უშედეგო აღმოჩნდა. ჩემი ზარისთვის არც მომდევნო დღეებში უპასუხია ვინმეს. სამი კვირის შემდეგ კი, როგორც იქნა, მიპასუხეს.

- მერე ძალიან ვინანე, რომ დაგირეკეთ. უბრალოდ, აფექტურ მდგომარეობაში ვიყავი. მე თქვენ გიცნობთ, თქვენც მიცნობთ, მაგრამ ახლა ვინაობას ვერ დაგისახელებთ. ძალიან გთხოვთ, ყველაფერს გეტყვით, მაგრამ სახელი და გვარი არსად დაასახელოთ.

- მომიყევით რა მოხდა, ვინ დააპატიმრეს, სად?
- 3 თვის ბავშვი, გურამიშვილის სახელობის პედიატრიულ კლინიკაში... სანამ მშობლები ფულს არ გადაიხდიდნენ, კლინიკიდან არ ატანდნენ. ბავშვი გვარად კუშნეცია თუ კუსმირცი, არ მახსოვს. მისამართი ჩაიწერეთ, ნათაძის N10, გვარი მიახლოებით გითხარით უკვე. მშობლები თუ დაგელაპარაკებიან...

- დამშვიდდით და ისე მომიყევით.
- პაციენტი 5 რიცხვში შემოვიდა და 13-ში გაეწერა. ჯერ რეანიმაციაში იყო, მერე გადაიყვანეს პედიატრიულში და 16 რიცხვამდე ბავშვი დატყვევებული ჰყავდათ. არ ვაჭარბებ, დაპატიმრებული.

- რატომ?
- იმიტომ, რომ მშობლებს ფული არ ჰქონდათ გადახდილი.

- კი მაგრამ, 0-დან 3 წლამდე ბავშვების მკურნალობა ხომ უფასოა?
- საქმეც ის არის, არ უნდა გადაეხადა და გადაახდევინეს.

- როგორც ვიცი, კლინიკას ახალი ხელმძღვანელობა ჰყავს.
- აქ ყველაფერს გიგი გოცირიძე მართავს. უნდა ნახოთ, რა ხდება, გიგი ყველას აგინებს - ექიმს, ექთანს, მედპერსონალს... გოცირიძე ამბობს, არ მაინტერესებს პაციენტის გამოჯანმრთელება, მთავარი მენეჯმენტიაო...

მისამართი მოგეცით... თუ ნახეთ, ხომ კარგი...
ცნობათა ბიუროში მხოლოდ ის მითხრეს, რომ ეს ქუჩა ნაძალადევშია, მაგრამ ნათაძის ქ. N10-ში კუშნეცები კი არა, არავის გვარი არ ფიქსირდებოდა. იქ მისულებს საამქრო დაგვხვდა. გადავწყვიტე, თითო გამოტოვებით ყველა სახლში მომეკითხა კუშნეცები. დიდხანს არ მიძებნია - ნათაძის N9-ში ჰქონია ნაქირავები ბინა მანანა კუშნეცს.

კუშნეცები 7 კვმ-იან ოთახში ცხოვრობენ. ორი საწოლი უდგათ, მაგიდა და ელექტროგამათბობელი. იატაკი აყრილია, შპალერი ჩამოხეული. ვცდილობ, ისე გადავაბიჯო, რომ ფეხსაცმლის ქუსლი არ ჩამეჭედოს ფიცრებს შორის. ერთ საწოლზე ახალგაზრდა ქალი ზის ბავშვით ხელში. სკამს ვერ ვხედავ, ამიტომ დედის გვერდით საწოლზე ვჯდები.

მანანა კუშნეცი (სამი თვის ნიკას დედა): - ბავშვი გაცივებული იყო და რაიონულ ექიმთან წავიყვანეთ, მაგრამ ექიმმა ჩათვალა, რომ ბინაზე ვერ ვუმკურნალებდით და ბავშვი სასწრაფო დახმარების ბრიგადამ გურამიშვილის კლინიკაში გადაიყვანა. ნიკას ფილტვების ანთება აღმოაჩნდა, სამი დღე რეანიმაციაში ჰყავდათ. მდგომარეობა მძიმე იყო, მაგრამ თავიდან დამიმალეს. რომ მომჯობინდა, მერე მითხრეს.

- როდესაც ბავშვის გაწერის დრო მოვიდა, რა მოხდა?
- რისი საშუალებაც მქონდა, ის გადავიხადე - 150 ლარი. ჩვენი ოჯახი სოციალურად დაუცველია.

- 150 ლარი რაში გადაიხადეთ?
- მითხრეს, პოლისი უნდა მოიტანო ჯანდაცვის სამინისტროდანო, ამას რამდენიმე დღე დასჭირდა. რომ მივიტანე, მითხრეს, ამ პოლისით მკურნალობის საფასურის მხოლოდ 80% დაიფარება, 20% თYქვენ უნდა გადაიხადოთო. არადა, საკმაოდ დიდი თანხა შეადგინა იმ 20%-მა, დაახლოებით 350 ლარამდე. აქედან 150 ლარი გადახდილი მქონდა, დარჩენილის გადახდა კი ვერ შევძელით.