დაშლის შემდეგ "ვია გრაზე" მოთხოვნა და ჰონორარები გაიზარდა

მას შემდეგ, რაც პროდუსერმა კონსტანტინე მელაძემ ჯგუფ "ვია გრას" დაშლის შესახებ განცხადება გააკეთა, კორპორატიულ წვეულებებზე ჯგუფის შოუს ფასმა საგრძნობლად იმატა. თუ ადრე ჯგუფის ჰონორარი 50 000 ევროს არ აღემატებოდა, ახლა "ვია გრას" გამოსვლაში 500 000 დოლარს იხდიან.

ამ მომგებიანი წინადადების შესახებ კორპორატიული წვეულებების ორგანიზატორ საშა დერგოუსოვას სააგენტოში განაცხადეს.

"ჩვენთან ჯგუფის საახალწლო კერძო წვეულებებზე გამოსვლის თხოვნით რუსეთიდან და უკრაინიდან ათზე მეტი ზარი შემოვიდა. ერთ-ერთმა ჩვენმა მუდმივმა კლიენტმა, უკრაინელმა ოლიგარქმა გვითხრა, რომ მზადაა 1-ლი იანვრის ღამეს "ვია გრას" ერთსაათიან კერძო კონცერტში ნახევარი მილიონი დოლარი გადაიხადოს. სიმართლე გითხრათ, ცოტა დაბნეულები ვართ. წინადადებას განვიხილავთ. ახალი წლის ღამეს გოგონები მუშაობას არ აპირებდნენ",- აცხადებს ალექსანდრა დერგოუსოვა.

კონსტანტინე მელაძე სპეკულირებაში უკვე დაადანაშაულეს. კერძოდ, მას ბრალს სდებენ, რომ თითქოს პროექტის საჯარო "დახურვით" ჯგუფის საახალწლო კორპორატიულ წვეულებებზე გამოსვლის ჰონორარი გაზარდა. პროდუსერი ბრალდებებს კატეგორიულად უარყოფს.

"ჯგუფის დახურვის გადაწყვეტილება დიდი ხნის წინ მიღებული ნაბიჯია. არანაირი პიარი აქ არ არის. "ვია გრა" უკვე აღარ არსებობს. ჯგუფი დეკემბერში დაგეგმილ კონცერტებს ჩაატარებს და იანვარში მოღვაწეობას დაასრულებს",-აცხადებს მელაძე.