ბიძინა სამხარაძე: "თამაშზე რომ გავდივარ, ტრიბუნაზე ჩემს ცოლს ვეძებ"

ბორჯღალოსანი ბიძინა სამხარაძე ქართველ ქალებს ურჩევს, დიეტას თავი დაანებონ, სიზარმაცე დაძლიონ და ჯანსაღი ცხოვრების წესს მისდიონ, მაგალითად, დილით ადრე ადგნენ და ივარჯიშონ. ცოლთანაც ძირითადად სწორედ ამის გამო კამათობს. უნდა, რომ მისი მშვენიერი ლედი მუდმივად ფორმაში იყოს, ყოველდღიურად ივარჯიშოს, მაგრამ 3 წლის ბარბარეს დედიკო ამას ყოველთვის ვერ ახერხებს. სამაგიეროდ, მორაგბე ქმარს ყველანაირად უწყობს ხელს და თამაშის დროს, ავდარსა თუ დარში, მის გასამხნევებლად სტადიონზე მიდის.
– ბიძინა, სად და როგორ იპოვეთ თქვენი მეორე ნახევარი?
– ჩემი მეუღლე თამარ ბეჟაშვილია. ერთმანეთი სრულიად შემთხვევით ბორჯომში გავიცანით. იმ პერიოდში რუმინეთში ვთამაშობდი. იქ რომ წავედი, ერთმანეთს სოციალური ქსელით ველაპარაკებოდით. საქართველოში რომ ჩამოვდიოდი, თამარს ვნახულობდი, ჩვენი ურთიერთობაც ნელ–ნელა აეწყო და სიყვარულიც მალე მოვიდა. საბედნიეროდ, თამარის გულის მოსაგებად დიდი ბრძოლა არ დამჭირვებია. ერთი წლის შემდეგ დავქორწინდით.

– რითი მოგხიბლათ მომავალმა მეუღლემ და საერთოდ ქალში, პირველ რიგში, რას აფასებთ?
– პირველ რიგში, მისმა ვიზუალმა და შემდეგ უბრალოებამ მომხიბლა. საშუალო სიმაღლის, შავგვრემანი, შავთვალება გოგო ლამაზი ღიმილით ჩემთვის ყველაზე ლამაზი ქალია! თამარი რომ გავიცანი, ბევრი კარგი თვისება აღმოაჩნდა. ვფიქრობ, ქალი მამაკაცზე პირველ ეფექტს თავისი ვიზუალით ახდენს. თუმცა მხოლოდ ვიზუალი არ არის მნიშვნელოვანი და საერთოდაც მიმაჩნია, რომ ყველა ქალი ლამაზია, რადგან რაღაც ხიბლი ყველაში დევს. ის შეიძლება ვიზუალურად მომხიბვლელი არ იყოს, მაგრამ სულიერად ისეთი ადამიანი აღმოჩნდეს, რომ ლამაზადაც მოგეჩვენოს. ორსულობის პერიოდში კი ყველაზე ლამაზია. ფეხმძიმე ქალი ჩემი სისუსტეა. მათი დანახვა სულ მიხარია, ჩემში ყოველთვის დადებით განწყობას იწვევენ და სულ მინდა, რომ რაღაცით პატივი ვცე.
– ალბათ ორსულ ცოლს განსაკუთრებულად უფრთხილდებოდით.
– კი, ასე იყო. ჩემი მეუღლე ძალიან მშვიდი ორსული იყო. მაშინ რუმინეთში ვცხოვრობდით. ვარჯიშის მერე მთელ დროს მასთან ერთად ვატარებდი და საოჯახო საქმეებშიც ვეხმარებოდი. სულ რამდენიმე შემთხვევა მახსენდება, როცა რაღაც საჭმელი მოუნდა. მახსოვს, ერთხელ დასაძინებლად დავწექით და ტიროდა. რა გატირებს–მეთქი, ვკითხე. მაცივარში ნაყინი მეგულებოდა და აღარ დამხვდაო. შუაღამისას ავდექით, ჩავიცვით და სასეირნოდ გავედით, თან ნაყინიც გეახელით.
– როგორც ვიცით, შვილის შეძენა თამაშის დროს გაიგეთ.
– დინამოს ეროვნულ სტადიონზე საქართველოს ნაკრები ესპანეთს ვეთამაშებოდით. წინა ღამე ჩემს ცოლთან ერთად სამშობიაროში გავატარე, მაგრამ ბოლომდე ვერ დავრჩი, თამაშზე 3 საათით ადრე უნდა ვყოფილიყავი და სამშობიაროდან წამოვედი. თამაში დაიწყო და დამთავრებას 5 წუთი აკლდა, როცა გამოაცხადეს, რომ გოგო შემეძინა. ეს ჩემს ცხოვრებაში ყველაზე ბედნიერი წუთები იყო! ჩემი გუნდის წევრები მომცვივდნენ, ყველა მკოცნიდა და მილოცავდა. ესპანელები ვერ მიხვდნენ, რა ხდებოდა. არც ლელო დამიდია და არც განსაკუთრებული რამე გამიკეთებია, ამიტომ ყველა გაკვირვებული მიყურებდა. ბოლოს გაიგეს, რაც ხდებოდა და ქალიშვილის შეძენა მათაც მომილოცეს.
– ქალი როგორი თვისებით უნდა იყოს შემკული?
– უბრალო ადამიანს ძალიან ვაფასებ და ქალს თავის თავზე დიდი წარმოდგენა რომ აქვს, საოცრად არ მიყვარს. შეიძლება ქალი პატივსაცემი იყოს, მაგრამ საკუთარ თავზე გადამეტებული წარმოდგენა და ზემოდან ყურება არ შეშვენის. ასეთი გოგო არასდროს მომწონებია. ჩემს მეუღლეს ყველაფერი აქვს იმისთვის, რომ სპორტსმენის გვერდით იცხოვროს.
– სპორტსმენის ცოლს რაიმე განსაკუთრებული თვისებები სჭირდება?
– სპორტსმენის გაგება ძალიან რთულია, მით უმეტეს, ჩემი, რადგან გამუდმებით საქმით ვარ დაკავებული. საქართველოდან გასვლა ხშირად გვიწევს და საკმაოდ რთული რეჟიმითაც ვცხოვრობთ. 2011 წელს ჩემი ოჯახი სამი თვით დავტოვე და ძალიან გამიჭირდა. ბავშვიც და ცოლიც საშინლად მენატრებოდნენ. თამარისთვისაც რთულია, სულ უნდა, რომ ჩემ გვერდით იყოს და ამის გამო გამუდმებით მეწუწუნება, მაგრამ, რაც მთავარია, გვერდში მიდგას და ჩემი გადასარევად ესმის.
– არ ეჭვიანობს?
– ერთმანეთში ისეთი ურთიერთობა გვაქვს, რომ არ ეჭვიანობს და ამას ძალიან ვაფასებ. თამარი ეჭვიანი რომ იყოს, ჩვენი ურთიერთობა არც გამოვიდოდა, რადგან ჩემი გრაფიკის მიხედვით სხვაგან ყოფნა ხშირად მიწევს. არც მე ვარ ეჭვიანი, მას ბოლომდე ვენდობი. ჩვენი ერთად ყოფნა სწორედ ნდობაზეა დამყარებული.
– თქვენს თამაშებს ყოველთვის ესწრება?
– არამხოლოდ ჩემი ცოლი, პატარა ბარბარეც ესწრება. რაც უნდა ხდებოდეს, წვიმდეს, თოვდეს ან თუნდაც ქარბუქი იყოს, ჩემი ცოლი თამაშს არ ტოვებს. ჩემი გოგო ხომ გიჟი ფანია! ჩემი გუნდის მაისურები ორივესთვის შევაკერვინე და თამაშებზე ასე მგულშემატკივრობენ. "რიჟა! რიჟა! მიდი, მამიკო, მიყვარხარ!" – ბარბარე ამ შეძახილებით მამხნევებს. ბოლო თამაშზე მოწინააღმდეგემ წამაქცია და ისტერიკაში ჩავარდა, ტრიბუნიდან უყვიროდა, რატომ წააქციე ჩემი მამიკო, ახლა ჩამოვალ და გაგტყეპო.
– რას გრძნობთ, როცა თქვენთვის ორი ძალიან ძვირფასი ადამიანი ასე გქომაგობთ?
– ეს დიდი სტიმულია. სანამ დავქორწინდებოდით, მაშინაც ბევრს ნიშნავდა ჩემთვის თამარის გვერდით დგომა და ახლაც ასეა. თამაშზე გავდივარ თუ არა, პირველ რიგში, ტრიბუნაზე ჩემს ცოლს ვეძებ, რადგან ვიცი, რომ აუცილებლად იქ იქნება და თვალი გამუდმებით იქით გამირბის. ადრე თამაშის დროს ტრიბუნისკენ არასდროს ვიყურებოდი და ახლა კი თამაშამდე თამარი თუ ვერ მოვძებნე, მერე მთელი თამაშის განმავლობაში ცოლ–შვილის ძებნაში ვარ.
– ქალისთვის კომპლიმენტების თქმა გჩვევიათ?
– სიმართლე გითხრათ, ეს ჩემს ხასიათში არც ზის. კომპლიმენტების თქმა არც დაოჯახებამდე მჩვეოდა და, სამწუხაროდ, ამით არც ჩემს მეუღლეს ვანებივრებ. ვფიქრობ, რომ ამის თქმა არ გამომდის და ცარიელი სიტყვები, მგონია, რომ ფარსია. თუ ცოლს ვეტყვი, მეცინება. ამიტომ ყოველთვის ვცდილობ, ემიციები სხვანაირად გამოვხატო.
– სხვანაირად როგორ?
– საჩუქრების კეთებას და საერთოდ თბილ მოქცევას ვგულისხმობ. ვცდილობ, თამარს საჩუქარი ხშირად გავუკეთო და გავახარო. ჩემს ცოლს ძალიან უნდოდა, "ტოიოტას" მარკის მანქანა ჰყოლოდა. თამარი 1 იანვარს არის დაბადებული. შარშანწინ, ახალ წელს, შაბიამნისფერი "ტოიოტა" ვაჩუქე. რა თქმა უნდა, ძალიან გაუხარდა.

– თქვენი აზრით, ქალისთვის ყველაზე დიდი კომპლიმენტი რა არის?
– "რაღაც არაბუნებრივად გამოიყურები!". ქართველი გოგო ყველაზე ბედნიერი, იცით, როდის არის? როცა ეუბნები, უი, როგორ გამხდარხარო. ძალიან ბევრია, ვისაც წონის დაკლება ნამდვილად არ სჭირდება, მაგრამ ამდენი დიეტა უკვე ხასიათში აქვთ გამჯდარი. ადრე სულ სხვა სტანდარტების, ცოტა მოპუტკუნო ქალები იყო მოდაში. არც ძალიან გამხდარი და არც ძალიან პუტკუნა ქალები არასდროს მიზიდავდნენ. ქალი საშუალო წონის უნდა იყოს, ზედმეტი არც სიგამხდრეა კარგი და არც – სიმსუქნე. მე თანამედროვე ქალი მეტად მომწონს, რადგან უფრო დაიხვეწა. ტანის და სახის მოვლა ისწავლა და უფრო გალამაზდა.
– თქვენი აზრით, ქალისთვის მაკიაჟი აუცილებელია, რომ უფრო ლამაზი გამოჩნდეს?
– როგორც აღვნიშნე, კომპლიმენტების თქმა დიდად არ მახასიათებს, მაგრამ, უნდა გამოგიტყდეთ, რამდენჯერაც გავბედე და ჩემს ცოლს კომპლიმენტი ვუთხარი, დღეს რა ლამაზი და განსხვავებული ხარ–მეთქი, იმდენჯერ აღმოჩნდა, რომ უმაკიაჟოდ იყო. ვფიქრობ, ჩემი ცოლი მაკიაჟის გარეშეც იმდენად ლამაზია, რომ ყოველდღიურ ცხოვრებაში ნამდვილად აღარ სჭირდება. ქალისთვის მაკიაჟი აუცილებელია, მაგრამ არ ვთვლი, რომ ყოველდღე უნდა გაიკეთოს.
– ქალის გამოცნობა ადვილად გამოგდით?
– ვფიქრობ – კი, მაგრამ ამისთვის ცოტა ურთიერთობაცაა საჭირო. 100%–ით ვერ გავშიფრავ, მაგრამ რამდენიმე ნახვის შემდეგ 90%–ით შემიძლია გამოვიცნო. დაოჯახებამდე შეყვარებული ბევრჯერ არც ვყოფილვარ და ჩემთვის არც ქალის გამოცნობა ყოფილა მთავარი ამოცანა. ამიტომაც ქალისგან არც გულისტკენა მქონია.
– ხშირად ამბობენ, ქალსა და კაცს შორის ურთიერთობები შეიცვალაო. თქვენ რას ამჩნევთ?
– ეს ყველაფერი ცხოვრებამ მოიტანა. ადრე მამაკაცი უფრო დიდი უპირატესობით სარგებლობდა, ვიდრე დღეს. ქალების დიდი ნაწილი კაცზე იყო დამოკიდებული. ახლა კი ეს ყველაფერი დაბალანსდა და ცხოვრებაში მამაკაცის და ქალის როლი გათანაბრდა. ისიც უნდა ითქვას, რომ რაღაც მაინც დაიკარგა, მაგრამ მანდილოსნის პატივისცემა ქართველი კაცისთვის მაინც ღირებულებად რჩება. კარგია, როცა ქალი კარგი კულინარი, კარგი დიასახლისია, თუმცა ვფიქრობ, რომ ეს დიდ აუცილებლობას არ წარმოადგენს. ჩემი მეუღლე ამჟამად უმუშევარია. მისი ძირითადი საქმე ბარბარეს აღზრდაა. შვილი უკვე ბაღში მივიყვანეთ და ჩემს ცოლს ყველანაირად შევუწყობ ხელს, რომ თავისი საქმით დაკავდეს და მუშაობა დაიწყოს.
– რა არის იმისთვის საჭირო, რომ ქალი ყოველთვის ლამაზად გამოიყურებოდეს?
– ქართველი ქალები, ცოტა არ იყოს, ზარმაცები არიან და ეს დიდ პრობლემად მიმაჩნია. ეზარებათ, რომ ვიზუალურ მხარეს სხვანაირად მიხედონ. ჰგონიათ, რომ დიეტით უფრო კარგ ფორმაში ჩადგებიან, ვიდრე სპორტული და ჯანსაღი ცხოვრების წესით. არ ფიქრობენ, რომ წონაში დასაკლები ამდენი არაბუნებრივი საშუალება მათ ორგანიზმს ვნებს. ქალებმა თავს უნდა მიხედონ! დილით ადრე გაიღვიძონ, პირი ცივი წყლით დაიბანონ, სუფთა ჰაერზე იარონ... ეს ყოველივე სულიერი და ფიზიკური სილამაზის შენარჩუნებაში ხელს შეუწყობთ.
– თქვენი ცოლი ვარჯიშობს?
– როცა დრო აქვს, მაშინ ვარჯიშობს. ჩვენი კამათის თემა ძირითადად სწორედ ეს არის. ვეუბნები, რომ საკუთარი თავისთვის უფრო მეტი დრო გამონახოს, მაგრამ რთულია, როცა ბავშვი ჰყავს გასაზრდელი.
– საქართველოში ყველაზე ლამაზ ქალად ვინ მიგაჩნიათ?
– ჩემთვის ყველაზე ლამაზი ჩემი ცოლია, თუმცა ბავშვობაში მაკა ასათიანი ძალიან მომწონდა. ის საქართველოში ერთ–ერთი ყველაზე ლამაზი ქალია.
სოფიო ბოჭორიძე