შარვალი არ ჩამხადოთ, ქალბატონო!

ქალები წლებს იკლებენ და უხარიათ, როცა მამაკაცებისგან ამდაგვარ ქათინაურს იღებენ _ ასაკი არ გეტყობა, საყვარელო! ეს მართლა სასიამოვნოა, მაგრამ როცა 50 წლის გახდებით და სუპერმარკეტში შეხვალთ, თანაც ქალაქის ცენტრში და მამრობითი სქესის ცნობილ სახეს დაინახავთ, მაინცდამაინც მაშინ ნუ დაიწყებთ აკრობატული ნომრების ჩვენებას. არ არის საჭირო. გახსოვდეთ, თქვენც ისეთივე უხერხულ მდგომარეობაში შეიძლება აღმოჩნდეთ, როგორშიც ერთი ჩემი მეგობარი _ ლამაზი ქალი, მაგრამ უკვე ჩასუქებული და ღიპდადებული. სიტუაცია ასე წარიმართა: მოწიფული ქალი მაღაზიაში შევიდა და შოკოლადები იყიდა. ამ დროს დაინახა ერთი სიმპათიური მამაკაცი, ცნობილი პოლიტოლოგი, რომელიც რაღაცებს ყიდულობდა და რომელსაც უცებ ხუთლარიანი დაუვარდა. _ ფული დაგივარდათ, _ შესძახა ქალმა. მან ყურადღება არ მიაქცია მისდა ჭირად და ამ მეტიჩარა ჩასუქებულის ჭირადაც. ქალი გაექანა, ჩაიკუზა, დასწვდა ხუთლარიანს და ვეღარ ადგა, მუცელმა შეუშალა ხელი. აშკარა იყო, თავი 20-30 წლის ეგონა და თან გაუკვირდა, ნეტა, რა დამემართაო. _ ნუ წუხდებით, ქალბატონო, _ უთხრა აგრეთვე ღიპდადებულმა სიმპო კაცმა. ამ დროს ქალი ფეხებზე შემოეხვია და ადგომა სცადა. ის იქვე დარჩა, ანუ ძირს, მაგრამ პოლიტოლოგის შარვალი წამოვიდა ქვევით და კაცი კინაღამ გაშიშვლდა. _ რას შვრებით, ქალბატონო? _ გაგიჟდა უნებლიე მსხვერპლი და ქალს ხელი გაუწოდა. ქალმა ჩაავლო და უკან გადაგორდა. ატყდა აიწონა-დაიწონა. გადაყვა იმ საცოდავ ხუთლარიანს ორი დარბაისელი ადამიანი _ ქალი და კაცი. ბოლოს, როგორც იქნა, მოხერხდა ქალის ადგომა და კაცსაც შერჩა შარვალი ტანზე. მიაჩეჩა რა ხუთლარიანი, რომელიც ყველაზე უვნებლად გადარჩა ამ სამიდან, მოკურცხლა ქალმა და უკან არც მოუხედავს. ერთი ეგ არის, იმ კაცს ყოველდღე ხვდება ქუჩაში, რადგან ერთ უბანში ცხოვრობენ.
ავტორი: მანანა ციცქიშვილი