ოთარ ტატიშვილი: "ნაციონალებზეც ვხუმრობდი, მაგრამ ეს არავის ახსოვს"

"იმედიდან" გუდანაბადაკრული "ღამის შოუ ოთარ ტატიშვილთან ერთად" ცხრაკვირიანი პაუზის შემდეგ ამავე არხზე დაბრუნდა, როგორც მისი წამყვანი ოთარ ტატიშვილი ამბობს, სიახლეებით. "სიახლე" კი ახალი ხელისუფლების სახეები არიან. ოთარის თქმით, მათ მაშინაც ეპატიჟებოდა გადაცემაში, როცა ისინი ოპოზიაციაში იყვნენ, მაგრამ თურმე თავად ამბობდნენ უარს. ალბათ მისი ხუმრობებიც შეიცვლება, უფრო სწორად, მათი ადრესატები. ერთი სიტყვით, მომავალი გვიჩვენებს როგორ დააბალანსებს შოუმენი პოლიტიკურ იუმორს პოსტარჩევნებისეულ საქართველოში.
აქამდე კი იუმორი ნამდვილად შველოდა ექიმს, მსახიობს, შოუმენს და აწ უკვე მოცეკვავეს პროექტშიც "ცეკვავენ ვარსკვლავები". მიუხედავად იმისა, რომ, პრინციპში, თითქმის არ ცეკვავდა, ტურიდან ტურში, რომ იტყვიან, ლიწინ–ლიწინით გადადიოდა. "სარკე" მას მერვე ტურის წინა დღეებში შეხვდა.
– ბატონო ოთარ, არჩევნების შემდეგ თქვენი შოუ ტელეეთერის მიღმა აღმოჩნდა. ეს რთულად გადაიტანეთ?
– რა თქმა უნდა, რთული იყო და არამარტო ჩემთვის, "ღამის შოუს" სტუდიის თანამშრომლებისთვისაც. ცხრა კვირა გაჩერებული ვიყავით. ვერ ვიტყვი, რომ სატელევიზიო ფორმიდან ამოვვარდი, რადგან ყოველ ორშაბათს პროექტში "ცეკვავენ ვარსკვლავები" პირდაპირი ეთერი მქონდა, რაც ფორმის შენარჩუნებაში ძალიან დამეხმარა.
– მაყურებლის მოსაზიდად რა სიახლეებს გეგმავთ?
– ძალიან საინტერესო სტუმრების მოწვევას ვაპირებთ. რამდენიმე ახალ მინისტრთან მოლაპარაკების რეჟიმში ვართ. მათ შორის არიან ჯანდაცვის და საგარეო საქმეთა მინისტრებიც. კახი კალაძესაც ვესაუბრეთ, უბრალოდ ეს პერიოდი ძალიან დაკავებულია. ვფიქრობ, რომ სტუმრად ახალი სახეები ძალიან საინტერესო იქნება.
– არჩევნებამდე რატომ არ იწვევდით მაშინდელი ოპოზიციის სახეებს?
– ჩემს შოუში ყოველთვის ყველას ვეძახდი, იქნებოდა ეს ხელისუფლების თუ ოპოზიციის წარმომადგენელი, მათ შორის – ჟურნალისტებიც. ამ მხრივ, არაფერი შეცვლილა, ჩემს გადაცემაში ახლაც ყველას დავუძახებ. ვინ მოვა და ვინ – არა, ეს უკვე სხვა საკითხია. მე ვარ ადამიანი, რომელიც ხალხს "ჩემიანად" და "სხვისიანად" არასდროს ვყოფ. ვინც ჩემს შოუში სტუმრობას დათანხმდება, ყველას დიდ მადლობას ვეტყვი.
– ყველაზე სასურველი სტუმრების სიაში ვინ გყავთ?
– ყველაზე სასურველ სტუმრად ჯერჯერობით დავით აქუბარდია რჩება, რომელსაც უკვე ვესაუბრე და მითხრა, ჯერ შენ მოდი ჩემს გადაცემაში და მერე ვილაპარაკოთო. ალბათ მივალ კიდეც და ვნახოთ, რა საუბარი გამოგვივა. ვაპირებ, რომ დავით აქუბარდიას პირდაპირ ეთერში იმის პირობა დავადებინო, რომ ახლა თუ არა, საახალწლო გადაცემაში მაინც მოვიდეს. ძალიან საინტერესო პიროვნებაა და თან იუმორისტულ შოუში სტუმრად არსად ყოფილა. მთელმა საქართველომ კარგად იცის, რომ მას განსაკუთრებული იუმორის გრძნობა აქვს და საკმაოდ განათლებულია.
– ნაციონალური მოძრაობის წევრებზე საკმაოდ მორიდებულად და რბილად ხუმრობდით ხოლმე.
– როდესაც ნაციონალები იყვნენ ხელისუფლებაში, მათზე ძალიან ბევრს ვხუმრობდი, მაგრამ რატომღაც ეს არავის ახსოვს. ერთი ასეთი ხუმრობა მქონდა: პაციენტს კლინიკური სიკვდილი დაემართა. მდგომარეობიდან რომ გამოვიდა, ყველამ კითხეა, იქ რა ნახეო. რა ვნახე და ტრადიციულ გვირაბში მივდიოდი, ბოლოში თეთრებში ჩაცმული კაცი გამოჩნდა, რომ მივუახლოვდი, რამაზ ნიკოლაიშვილი (რეგიონული განვითარებისა და ინფრასტრუქტურის ყოფილი მინისტრი) აღმოჩნდა. ასე მითხრა, სად მიდიხარ, კაცო, ხვალ ეს გვირაბი სააკაშვილმა უნდა გახსნას და მერე თუ გინდა, მოკვდიო. ეს ხუმრობა რატომ არავის ახსოვს?!
– ძირითადად ვისგან იღებდით უარს შოუში სტუმრობაზე?
– ოპოზიციის წევრები სხვადასხვა სუბიექტური თუ ობიექტური მიზეზების გამო ჩემს გადაცემაში არ მოდიოდნენ. ძალით ნამდვილად ვერავის მოვიყვან! თუმცა იმდენი მაინც მოვახერხე, რომ ჩემს შოუში ზვიად ძიძიგური, ირაკლი ალასანია და ლალი მოროშკინა მყავდნენ სტუმრად. ძალიან რეიტინგული შოუც გამოგვივიდა. რობერტ სტურუასთან მოლაპარაკებას ერთი წლის განმავლობაში ვაწარმოებდი, მაგრამ გადაცემაში მაინც არ მოვიდა. გუბაზ სანიკიძეს და აკაკი ასათიანს რამდენი "ვეჩალიჩე"... ქუჩა–ქუჩა სიარულს ვერ დავიწყებ და თითოეულს ვერ ავუხსნი, თქვენი ჟურნალის მეშვეობით საზოგადოებას მინდა ვუთხრა, რომ თუკი ჩემს შოუში სტუმრები გეცოტავებოდათ, ეს მხოლოდ და მხოლოდ იმიტომ ხდებოდა, რომ თვითონ ისინი ამბობდნენ უარს.
– წინა ხელისუფლების წევრებიც უარს გეუბნებოდნენ?
– დავით ბაქრაძე ჩემი სტუდენტობის მეგობარია, მაგრამ ჩემს შოუში მაინც ვერ მოვიყვანე. "ახლა არ მცალია, ძალიან დაკავებული ვარ", – ეს იყო მისი პასუხები. ზოგი პირდაპირ მეუბნებოდა, "იმედის" ტელევიზიაში არ მოვალო, ზოგი კი სხვანაირად მიშორებდა თავიდან. ყველა ადამიანის გადასარევად მესმის. არ უნდათ იუმორისტული შოუ და მორჩა! გიორგი კარბელაშვილსაც გადასარევად ვიცნობ. სომალიდან როგორც კი ჩამოვიდა, მაშინვე დავუკავშირდი, მაგრამ სტუმრობაზე მანაც უარი მითხრა.
– ჟურნალისტებთან თავადაც არ ხართ მაინცდამაინც "კონტაქტური".
– ვფიქრობ, რომ ჟურნალისტს როცა ეუბნები, რაღაცის მოლოდინში ხარ და ინტერვიუ არ გინდა, არ უნდა ეწყინოს. სანამ რეალურად არ ჩამოვყალიბდებოდით, გადავწყვიტეთ, რომ ჟურნალისტებთან ურთიერთობისგან დროებით თავი შეგვეკავებინა.
– პროექტზე "ცეკვავენ ვარსკვლავები" ვისაუბროთ. ფიქრობდით, რომ კონკურსში ამდენ ხანს დარჩებოდით?
– ამაზე ნამდვილად არ მიფიქრია. ჩემი მონაცემები ცეკვაში ჩემზე კარგად ვინ იცის?! თქვენ როგორ გგონიათ, ჩემს ნომრებში ცეკვაზე მეტი კომედიური ნომრები რატომ არის? გოჩა ჩერტკოევმა მითხრა კიდეც, ფანტასტიკური შოუ გაქვს, მაგრამ ცეკვა ძალიან ცოტააო და აბსოლუტურად ვეთანხმები. ცეკვის მონაცემები არ მაქვს, ელემენტარულ მოძრაობებს ვსწავლობ და დანარჩენს კომედიური ნომრებით "ვქაჩავ". ამდენ ხანს თუ "გავქაჩავდი", ნამდვილად არ მეგონა.
– როგორ ფიქრობთ, ჟიურის ან თუნდაც მაყურებლის სიმპათია რითი დაიმსახურეთ?
– ყველა წყვილი ერთნაირი ხომ არ იქნება? ჩვენ ვართ წყვილი, რომელმაც აქცენტი უფრო მეტად იუმორისტულ ნომერზე გააკეთა. ვფიქრობ, რომ სიმპათიაც აქედან წამოვიდა. ჩემ გამო პროექტის გარეთ ნიჭიერი მონაწილეც დარჩა. როცა მე და ჯაბა კილაძე აუტსაიდერებად ვიდექით, მაყურებელს მოვუწოდე, რომ ჯაბა გადაერჩინათ. ეს ადამიანი ჩემზე გაცილებით უკეთესად ცეკვავს, მაგრამ პროექტი მაინც მან დატოვა. ვთქვი კიდეც, რომ აღარ მინდა ცეკვა და ჯაბას დავუთმობდი ადგილს, მაგრამ ეს დაუშვებელი ყოფილა, რადგან ყველას კონტრაქტზე გვაქვს ხელი მოწერილი.
– ვის გულშემატკივრობთ?
– ნებისმიერ მათგანს შეუძლია მოგება. მათ ცეკვას პირდაღებული ვუყურებ, ყველას ვგულშემატკივრობ. ფავორიტიც მყავს, მაგრამ ამას არსად ვამბობ და არც თქვენ გეტყვით. მისთვის რამდენჯერმე ესემეს–იც გავაგზავნე.
– თქვენს მეწყვილეზე, მზია ორველაშვილზეც ვისაუბროთ, როგორი პარტნიორია.
– მზია თავიდან რაღაც შენიშვნებს მაძლევდა, მაგრამ მერე მიხვდა, რომ აზრი არ ჰქონდა და შემეშვა. მხრებში გაიმართეო, ბოლოს მითხრა. ვუპასუხე, რატომ, მოხრილი მხრებით ვერ გაგიყვანე შვიდი ტური–მეთქი. მზია ძალიან მაგარია და ამ შოუში ერთ–ერთი ყველაზე ძლიერი მოცეკვავეა. ის აკეთებდა იმას, რომ ყოველი ცეკვის შემდეგ ლაპარაკობდნენ ჩემზე და არა – მასზე. მეუბნებოდა, ეს შენი შოუა და უნდა ვიბრძოლო იმისთვის, რომ წინა პლანზე შენ იყოო. ჟიურის ჩემთვის არასდროს უთქვამს, ტურიდან ტურში მზიას დამსახურებით გადახვედიო. ეს კი ჩემი მეწყვილის დამსახურებაა.
– თქვენს შვილებს მოსწონთ მამის ცეკვა?
– შტერები არიან, ჩემი ცეკვა მოსწონთ! მოსწონთ, მათი მამა რომ დახტუნაობს. შვილების კარგად მესმის. ალბათ ხვალ მამაჩემმა რომ იცეკვოს, მეც ასე ვუგულშემატკივრებ.
დედაჩემი მხოლოდ ერთხელ, პირველ ტურზე იჯდა დარბაზში და მაშინაც აუტსაიდერად დავდექი. ჩემმა ბიჭებმა უთხრეს, ბებო, შენ ცუდი ფეხი გაქვსო და გადაწყდა, რომ სანამ პროექტში ვიქნებოდი, ზუკა და შოთიკო სულ გულშემატკივრის ლოჟაში ისხდებოდნენ, ჩემი გოგო, ნანიკო კი ამ დროს ჩემთან ერთად კულისებში იქნებოდა.
სოფიო ბოჭორიძე