ოთო ფოლადაშვილი: "ჩვენი ფრაკები 5.000 ლარი ღირს"

მოცეკვავე ოთო ფოლადაშვილისთვის "სასიცოცხლოდ" მნიშვნელოვანია სასცენო კოსტიუმის ხარისხი, შეიძლება ითქვას, დიდწილად ამაზეა დამოკიდებული მისი წარმატება. როცა ლამაზი და კომფორტული სამოსი აცვია, სცენაზე თავდაჯერებულად გამოიყურება და კარგად ცეკვავს. ამიტომაც თავის ფრაკებში საკმაოდ ძვირსაც იხდის.
რაც შეეხება ყოველდღიურ ტანსაცმელს, თავისუფალ სტილში იცვამს. უყვარს მოდურად და ლამაზ ფერებში ჩაცმა, ყოველთვის მოწესრიგებულად და პეწიანად გამოიყურება. ამიტომაც ტრიალებს მის გარშემო თაყვანისმცემელი გოგონების არმია, რომლიდანაც მისთვის განსაკუთრებით ახლობელი მხოლოდ ერთია. მის რჩევებს ჩაცმულობის თაობაზე ყოველთვის ითვალისწინებს და თავადაც უჯერებს მის აზრს.
– ოთო, როგორც ვიცი, საქართველოში სამეჯლისო–სპორტული ცეკვის კოსტიუმებისთვის საჭირო ქსოვილის შოვნა ჭირს. თქვენ ყიდულობთ თუ იკერავთ?
– ცეკვაშიც არის მოდა. ახალი სტილი, დიზაინი შემოდის. ნელ–ნელა ვითარდება. ამ სფეროში პირველი თუ არა, ერთ–ერთი ლიდერი მაინც რომ იყო, მოდას უნდა აჰყვე. ამიტომაც მოცეკვავეებს ნაირ–ნაირი სამოსის შეძენა გვიწევს. კონკურსზე ერთი და იმავე ტანსაცმლით რამდენიმე ტურში ვერ იცეკვებ. სამწუხაროდ, საქართველოში სპორტული ცეკვების კოსტიუმების მაღაზიები არ არის. ამიტომ შეკერვა ან ინტერნეტით გამოწერა გვიწევს. ზოგჯერ საზღვარგარეთაც ვყიდულობთ. მე ცეკვის ფეხსაცმელს ვიწერ, რადგან თუ მაღალი ხარისხის არ არის, ეს ცეკვაზე აისახება და შეიძლება კარგად ვერ შეასრულო. კარგი ხარისხის საცეკვაო ფეხსაცმელი ძალიან ძვირი ღირს. საქართველოში ქსოვილების პრობლემაცაა. კარგი იქნებოდა, საზღვარგარეთ ყიდვა შეგვეძლოს, მაგრამ ზოგჯერ არ არის იქ წასვლის საშუალება, არც ინტერნეტში დევს რამე ნორმალური და იძულებული ხდები, აქ შეიკერო.
ევროპულ ცეკვებს ფრაკით ვცეკვავთ. მასზე ბევრი რამ არის დამოკიდებული. ჩემი აზრით, საქართველოში კარგი ფრაკები არ იკერება. როდესაც მსოფლიოს თასზე მიდიხარ, კავკასიის ჩემპიონი ხარ, უკვე ყველა წვრილმანს ყურადღებას აქცევ. ფრაკი ძალიან ძვირი ღირს, მაგრამ სამაგიეროდ კარგ მხრებს, ტანს გიჩენს.

– რა ღირს კარგი ფრაკი?
– საცეკვაო სამოსში რომ 5.000 ლარს მისცემ, ძვირია, აბა, რა არის?! ნახმარიც, ერთი–ორჯერ ჩაცმულიც იყიდება და 1.000–2.000 დოლარი ღირს. მნიშვნელოვანია, რომ კარგი ხარისხის ფრაკი გქონდეს. როცა სცენაზე ფრაკით გადიხარ, ცეკვა ძალიან ლამაზი ჩანს. საჭიროა მაყურებელს ახალ–ახალი კოსტიუმები შესთავაზო.
– პროექტში "ცეკვავენ ვარსკვლავები" როგორ კოსტიუმებს გიკერავენ. კმაყოფილი ხართ?
– თავიანთ საქმეს იდეალურად აკეთებენ, მაგრამ საცეკვაო სამოსში გარკვევა მაინც უჭირთ, ამიტომ კორექტივების შეტანა სჭირდება. შეიძლება პიჯაკს შეხედო და გარედან ძალიან ლამაზი იყოს, მაგრამ ცეკვის დროს მხრებს რომ აწევ, "ლიპები" თავზემოთ ავიდეს, რაც სასიამოვნო საყურებელი არ არის. ჩვენს დიზაინერებს წვრილმან, პატარა–პატარა რჩევებს ვაძლევთ და ითვალისწინებენ.
– ყოველდღიურად როგორ სტილში იცვამთ?
– ყველანაირი სტილი მიყვარს. ვგიჟდები მრავალფეროვნებაზე. დახეული ჯინსებიც მაცვია და კლასიკური სამოსიც მიყვარს. ამოჩემებული სტილი არ მაქვს. ყოველდღიურად ის მაცვია, რაშიც თავს მოხერხებულად ვგრძნობ.
– საყიდლებზე სიარული, სამოსის არჩევაც გიყვართ?
– ჩემთვის შოპინგი დამღლელი პროცედურაა. იმდენი დროც არ მაქვს, რომ ტანსაცმლის მაღაზიებში საათობით ვიარო. ერთხელ რომ წავალ, დიდი ხნის მარაგით ვბრუნდები. როცა კარგად მაცვია, მსიამოვნებს და დიდი იმედი მაქვს, კარგად ჩაცმა გამომდის. შევედი, ვნახე, მომეწონა, ვიყიდე, წამოვედი – ეს არის ჩემი პრინციპი. ამას მთელი დღე რაში სჭირდება?! შოპინგზე მარტო არ დავდივარ. სანდო ადამიანები მიმყავს და ისინიც მეხმარებიან არჩევაში.
– ეს სანდო ადამიანები ოჯახის წევრები არიან, ძმაკაცები თუ მეგობარი გოგონები?
– ზოგჯერ ოჯახის წევრები, ზოგჯერ მეგობრები, დაქალები, ძმაკაცები. ყველა ის ადამიანი დამყვება, ვინც ჩემთან ახლოსაა და ვისი აზრიც ჩემთვის მნიშვნელოვანია.
– გარეგნობაზეც ისევე ზრუნავთ, როგორც ჩაცმულობაზე?
– ჩემს თავს განსაკუთრებულ ყურადღებას ნამდვილად ვაქცევ, მაგრამ ვერ ვიტყვი, რომ დილა–საღამოს სილამაზის სალონში ვარ სხვადასხვა პროცედურების ჩასატარებლად. ვარცხნილობას სახლში მე ვიკეთებ, სულ რაღაც ორწუთიანი პროცედურაა. "დამუღამებული" მაქვს, როგორ მიხდება და უცებ ვიკეთებ. მიყვარს, როცა კარგად მაცვია, კარგად გამოვიყურები. პირველ რიგში, რა თქმა უნდა, სისუფთავე მიყვარს.
– ძირითადად რა ფერებში იცვამთ?
– ძალიან მიყვარს ჭრელი სამოსიც და მუქი ფერებიც. დილით როგორ ხასითზეც ვიღვიძებ, ზუსტად იმ სტილს და იმ ფერის სამოსს ვიცვამ. პრეტენზიული არ ვარ და არ არსებობს ფერი, რომელსაც არ ვხმარობ. ცისარტყელასავით არ ვჭრელდები, მაგრამ ფერების თამამად შეხამება ნამდვილად მიყვარს. სამოსს რომ ვიცვამ და სარკეში ვიხედები, თუ საკუთარი თავი მომწონს, ე.ი. პრობლემა აღარაა.
– გოგონებზე როგორი ჩაცმულობა მოგწონთ?
– როგორიც უხდება. კარგია, როცა მაღალქუსლიანი ფეხსაცმელი აცვია, მაგრამ ყოველდღიურად რომ ასე დადიოდეს და უყურებდე, როგორ დაიგრიხება, არა მგონია, სასიამოვნო იყოს. გოგომ რატომ არ უნდა ჩაიცვას კედები ან ბოტასები?! პირველ რიგში, სიტუაციას გააჩნია, სად მიდის. თუ საღამოზე მიდის და კედები აცვია, ჩემი აზრით, მისაღები არ არის. ყველა გამოპრანჭული რომ არის, შენც მაღალქუსლიანი ფეხსაცმლით და კარგი კაბით უნდა მიხვიდე. ამ დროს ქალი ძალიან მიმზიდველია. ყოველდღიურად ერთ სტილში გამოწყობილი გოგოს ყურება მოგბეზრდება. მიყვარს, როცა გოგო მოვლილია და იხდენს იმას, რაც აცვია. ასეთ შემთხვევაში ჩემს კომპლიმენტს აუცილებლად დაიმსახურებს.
– შეყვარებული გყავთ?
– ამ კითხვას ბევრი მისვამს. ფორმალურად შეყვარებული არ მყავს, მაგრამ არსებობს გოგო, რომელთანაც მაქვს ურთიერთობა.
– აძლევთ საკუთარ თავს იმის უფლებას, რომ მისი ჩაცმის სტილში ჩაერიოთ?
– რა თქმა უნდა. ჯერ ერთი, თავადაც მეკითხება და მისთვის მნიშვნელოვანია ჩემი აზრი. რჩევებს ვაძლევ და მის ჩაცმულობაში, გარდერობის შევსებაში ჩემი წვლილი შემაქვს. ასევე მასაც შეაქვს ჩემს ჩაცმულობაში კორექტივები. ერთმანეთის აზრს ვითვალისწინებთ და ვეხმარებით იმაში, რომ ყოველთვის კარგად გამოვიყურებოდეთ.
– თქვენი თაობის ბიჭების ჩაცმის სტილი მოგწონთ?
– ვისთანაც შეხება მაქვს, ყველა კარგად გამოიყურება და შემიძლია ვთქვა, რომ ქართველების უმრავლესობას კარგი გემოვნება აქვს.
– აქსესუარები მამაკაცებისთვისაც ისეთივე აქტუალური გახდა, როგორც ქალებისთვის. თქვენ იკეთებთ სამკაულებს და სხვა "მოსართავებს"?
– ყელსაბამებსაც ვხმარობ, სამაჯურებსაც, საათებსაც, ქამრებსაც... მხოლოდ ბეჭდებს ვერ ვიკეთებ. კასანდრასავით ასხმული არ დავდივარ, მაგრამ რომელი აქსესუარიც ჩემს სამოსს უხდება, ყოველთვის მიკეთია. ბიჭს რომ კარგი საათი და სამაჯური უკეთია, მომწონს.
– სამოსის გაჩუქება მარტივად შეგიძლიათ?
– კი, რატომაც არა? ბევრ რამეს ვჩუქნი ჩემს ახლობლებს. თხოვება ცოტა ცუდი თემაა, მაგრამ ჩუქებით ჩემი გარდერობიდან ვისაც რა უნდა, წაიღოს, რა პრობლემაა! ძალიან მიყვარს, როდესაც სხვას ვახარებ. ამ დროს მეც ბედნიერი ვარ, მაგრამ ისეთი ტანსაცმლის გაჩუქებისგან თავს ვიკავებ, რომელიც მეც ძალიან მიყვარს და ვგიჟდები, ისე მომწონს.
– რომელზე "გიჟდებით"?
– რაც ჩემს გარდერობშია, აბსოლუტურად ყველაფერი მიყვარს, ცეკვის ტანსაცმლიდან დაწყებული აბაზანის ხალათით დამთავრებული.
– დაახლოებით რამდენი საცეკვაო კოსტიუმი გექნებათ?
– 6 წლიდან ვცეკვავ და ბევრი დამიგროვდა. უმეტესობას არც ვხმარობ, მაგრამ ხომ არ გადავაგდებ? ზოგჯერ არის შემთხვევები, როცა დაპატარავებულ ან ისეთ კოსტიუმებს, რომლებსაც აღარ ვიცვამ, ვყიდი. მაქვს განსაკუთრებულად საყვარელი კოსტიუმები, რომლებშიც რაც უნდა გადამიხადონ, არ გავყიდი, რადგან მათთან კარგი მოგონებები მაკავშირებს. როგორ შეიძლება ის კოსტიუმები გავყიდო, რომლებიც ჩემს გამარჯვებებს მახსენებს?
– თქვენ და ჯულიანა ბარ–გნარი საქართველოს თასის კონკურსში აპირებდით მონაწილეობას. ჩატარდა ეს კონკურსი?
– საქართველოს თასი ჩატარდა, რისთვისაც მე და ჯულიანა ვემზადებოდით, მაგრამ, სამწუხაროდ, ჯულიანას და გარდაიცვალა და ამიტომ კონკურსზე გასვლა ვერ შევძელით. ტრაგიკული შემთხვევა მოხდა და ვიზიარებ მათ მწუხარებას. იმედი გვაქვს, რომ ჯულიანა ნელ–ნელა ფორმაში ჩადგება და ასპარეზზე აუცილებლად გამოვალთ.
ქეთი დინოშვილი