გიგა კუხიანიძე: "ცოლთან შეცდომებს ხშირად ვუშვებ"

მუსიკალური პროდიუსერი და პოპულარული კომპოზიციების ავტორი გიგა კუხიანიძე ამბობს, რომ ქალი კაცზე ჭკვიანია. რამდენჯერაც ცოლს, მომღერალ ნინო ძოწენიძეს დაუჯერა, იმდენჯერ მოგებული დარჩა და სანანებელი გაუხდა ყველა ის საქციელი, როცა მის რჩევას ყური არ ათხოვა. აღიარებს, რომ ზოგჯერ ცოლთან ურთიერთობისას შეცდომებსაც უშვებს, მაგრამ მისი გულისკენ გზას ყოველთვის პოულობს და საყვარელ ქალს ადვილად ირიგებს. გიგას და ნინოს ერთი ვაჟი ჰყავთ – ცხრა წლის სანდრო.
– გიგა, ბოლო დროს ხშირად ამბობენ, რომ ახალი თაობა განსაკუთრებული სილამაზით გამოირჩევა. რას ფიქრობთ ამაზე? თქვენ ხომ ყოველდღიური ურთიერთობა გაქვთ მათთან.
– ფანტასტიკური ახალგაზრდობა მოდის. სულ სხვანაირი სახეები წამოვიდა და ძალიან მსიამოვნებს. ძირითადად ბავშვებთან მაქვს შეხება და მიხარია, ერთად ამდენ სილამაზეს რომ ვუყურებ. ლამაზი ერი ვართ. საქართველოში ბევრი მშვენიერი ქალი დადის და საერთოდ, ვთვლი, რომ სხვა ქვეყნებთან შედარებით ჩვენი მანდილოსნები სილამაზით გამოირჩევიან.
– ხელოვანი ქალები თუ გამოირჩევიან სხვებისგან?
– მგონია, რომ ჩვეულებრივები არიან, ყოველ შემთხვევაში, მე ასე ვფიქრობ. ჩემთვის არაჩვეულებრივი სხვა პროფესიის ადამიანი უფროა. ქალი, ვისთვისაც სულ ერთია, რა მუსიკას მოასმენინებ, ჩემთვის უკვე არაჩვეულებრივია. ქალი ღრმა, საინტერესო უნდა იყოს.
– როგორია თქვენთვის საინტერესო ქალი?
– სერიოზული. მაგალითად, კაცთან რომ ძალიან აქტიურობს, ეს ჩემთვის მიუღებელია. ასეთების მიმართ ინტერესი არასოდეს მიჩნდება... ვერ მოგატყუებთ, რომ ქალების თვალიერებით ვარ დაკავებული. ღვთის წყალობით, ჩემი პირადი ცხოვრება მოწესრიგებულია.
– თქვენ ირგვლივ ბევრია აქტიური ქალი?
– სანამ დავქორწინდებოდი, ჩემ გარშემო ასეთები ბევრნი იყვნენ, მაგრამ მათკენ არასოდეს გამიხედავს. ნინო საერთოდ არ იყო აქტიური და ზუსტად ამან "შემაბა". ვთქვი, რომ ეს ის ქალი იყო, რომელიც მე მინდოდა.
– სად შეხვდით მომავალ მეუღლეს?
– ერთმანეთი რომ გავიცანით, ძალიან პატარები ვიყავით. მის მიმართ გრძნობა ძალიან ადრე გამიჩნდა. ჩვენი ურთიერთობის დალაგებას კი დიდი დრო დასჭირდა. ნინოსგან დადებით პასუხს დიდხანს ველოდი. მისი სიყვარულის მოპოვებას წლები მოვანდომე. ყველაფერი გავაკეთე, რომ ჩემს სიყვარულში დამერწმუნებინა. ალბათ ბევრი შედარება გააკეთა და არჩევანი ჩემზე შეაჩერა.
– როგორ დაუმტკიცეთ, რომ ნამდვილად გიყვარდათ?
– პირადი საკითხების აფიშირება არასოდეს მჩვევია. ეს ჩემთვის ძალიან ინტიმური, ფაქიზი თემაა. არასოდეს ვიწერდი უბის წიგნაკში, ნინოს გულის მოსაგებად რას ვაკეთებდი.
– გასაგებია, რომ აქტიური ქალები არ მოგწონთ. კიდევ რა თვისება არ არის თქვენთვის მისაღები?
– ქალი თავშეკავებული უნდა იყოს და არა ცანცარა. არ მიყვარს გოგონები, რომლებმაც არ იციან, რა უნდათ. დღეს შეიძლება ერთი მოსწონდეთ და ხვალ – მეორე. ასეთებს ვერ ვიტან. როცა ქალი კაცთან ურთიერთობას აპირებს, სერიოზული უნდა იყოს და პასუხისმგებლობა იგრძნოს. არ არის ლამაზი, ქალმა ყოველდღიურად ახალი კაცი ეძებოს. ჩვენს დროში ადამიანებს შორის პატივისცემა დაიკარგა და არც ცოლ–ქმარია გამონაკლისი. იდეალური ურთიერთობების დეფიციტი არსებობს. იმდენად დაძაბულია ცხოვრება, რომ ურთიერთობების გასაფრთხილებლად აღარავის სცალია. ამ საკითხში მეც ბევრი რამე მეშლება.
– მაინც რა გეშლებათ?
– ჩემი საქმიანობის გამო იმდენად დაძაბული ვარ, ზოგჯერ მავიწყდება, ნინო რომ ჩემი ცოლია. შეიძლება ძალიან მნიშვნელოვან რაღაცაზე რეაქცია არ მქონდეს და ნინოს ვაწყენინო. ეს ყოველივე კი იმიტომ ხდება, რომ ყოველდღიური პრობლემების გამო კაცები ხშირად ვკარგავთ ნამუსს...
– განაწყენებული ცოლის შერიგებას როგორ ახერხებთ?
– ნინოს შერიგება ადვილად გამომდის, რადგან ჩემი ძალიან კარგად ესმის. იმასაც ხვდება, ასეთი შეცდომები რატომ მომდის და, რაც მთავარია, გულში ჩადება არ სჩვევია. ისეთი არ არის, რომ დაიბოღმოს და მერე საქმე გამირჩიოს. გარკვეული პერიოდი შეიძლება ცუდ ხასიათზე ან გულნატკენი იყოს, მაგრამ წყენას ივიწყებს ხოლმე. ნინო ბევრ რამეში ძალიან კარგად მიგებს. ფანტასტიკური მეუღლე და მეგობარია. ჩემს საქმეს ძალიან დიდ დროს ვუთმობ, ნინოც ხელოვანია და იცის, რას ნიშნავს სტუდიაში მუშაობა, ამიტომ პრობლემას არ ვქმნით. სახლი სტუდიის გვერდით გვაქვს და ისე არ არის, რომ ერთმანეთის ნახვის დეფიციტი გვქონდეს.
– ბავშვების "ევროვიზიაზე" რომ მიდიხართ, მოგყვებათ ხოლმე?
– არა. ახლაც ვეხვეწები, რომ წამოვიდეს. მან იცის, ამ დროს როგორია ჩემი განცდები. ჩემი წარმატება ყოველთვის დიდი ნერვების ფასად მიჯდება. ყოველ "ევროვიზიაზე" ალბათ 10 წლის სიცოცხლეს ვკარგავ. ნინო კი ჩემს ასეთ განწყობას ვერ უძლებს და ამ ზეიმზე არასდროს მომყვება.
– ქალებს შორის იდეალი თუ გყავთ?
– ასეთი ძალიან ბევრია, მაგრამ ლიკა ქავჟარაძე ბავშვობიდან საოცრად მომწონდა. ჰოლივუდში რომ ყოფილიყო, მსგავსი სილამაზე არ ეყოლებოდათ. ყოველთვის ვამაყობ იმითაც, რომ ჩვენს კინოში ლია ელიავა არსებობდა.
– როგორც ჩანს, თქვენი მოსაწონი ქალი მაღალ სტანდარტებს უნდა აკმაყოფილებდეს.
– გარეგნობას დიდი მნიშვნელობა აქვს. ძალიან გამხდარი, გაძვალტყავებული ქალები არ მომწონს. დღე და ღამე რომ შიმშილობენ, სახეზე ფერი არ ადევთ და გული მისდით, ეს ძალიან სასაცილოა. უმჯობესია, ქალი ჯანმრთელი იყოს, კარგად იკვებოს და მამაკაცისთვის მეტი ენერგია ჰქონდეს, ვიდრე იშიმშილოს. შიმშილით სილამაზეს კი არა, სიმახინჯეს უფრო აღწევენ. პირველ რიგში, მკერდი უპატარავდებათ, რაც ჩემთვის აუტანელია. ქალს ცოტა ხორცი უნდა ჰქონდეს და, რომ იტყვიან, შესახედად გემრიელი უნდა იყოს.
– რა სჭირდება ქალს სრულყოფილი სილამაზისთვის?
– პირველ რიგში, თავის მოვლაა საჭირო. მოუვლელი ქალი ჩემთვის ლამაზი და მიმზიდველი ვერასდროს იქნება. უამრავი საშუალება არსებობს, ქალი რომ მუდმივად ფორმაში იყოს. თუ თავს არ მოუვლის, მაშინ არც იმის პრეტენზია უნდა ჰქონდეს, რომ კაცებს მოსწონდეთ. ყველას ვურჩევ, ეცადოს, იმაზე ლამაზად გამოიყურებოდეს, ვიდრე სინამდვილეშია. ამას კი იმ შემთხვევაში მიაღწევენ, თუ თავს მოუვლიან. კაცისთვის მუდამ სასურველი რომ იყოს, მიმზიდველობა და სექსუალურობაა საჭირო. ამ დროს კაცი სხვა ქალისკენ ნაკლებად გაიხედავს და მისით ყოველთვის იამაყებს.
– მშვენიერი სქესის გამოცნობა ადვილად გამოგდით?
– ერთი შეხედვით შემიძლია თავიდან ბოლომდე დავახასიათო და არც არასდროს შევმცდარვარ. საკმარისია, თუნდაც ერთსაათიანი ურთიერთობა მქონდეს და მის თვალებში შევძლებ ამოკითხვას, ვინ არის. ქალებთან ურთიერთობაში ყოველთვის ფხიზელი ვიყავი, რადგან დაოჯახებამდე ეს ჩემი პირადი ინტერესი იყო. თამამად შემიძლია ვთქვა, რომ ქალისგან მოტყუებული არასოდეს დავრჩენილვარ. თუმცა ისიც უნდა ითქვას, რომ ქალთან მიმართებაში თუ საოცრად კარგი ინტუიცია მაქვს, ჩვეულებრივ, ადამიანურ ურთიერთობებში ჩემი ეს თვისება ზოგჯერ არ ამართლებს. მგონია, რომ ვინც ჩემ მიმართ კარგად არის განწყობილი, ვუყვარვარ და მაფასებს. მისთვის შეიძლება ბევრი რაღაც გავაკეთო, მაგრამ შემდეგ აღმოჩნდეს, რომ მასში შევცდი...
– ქალის და მამაკაცის როლი ოჯახში როგორ უნდა იყოს განაწილებული, დაბალანსებული?
– ჩემთვის უინტერესოა ქალი, რომელიც სახლში ზის და სიტყვა არაფერში ეთქმის. თუმცა მხოლოდ დედობისა და სამზარეულოსთვის დაბადებული ქალებიც არსებობენ, რომლებიც თავს ძალიან ბედნიერად გრძნობენ. სახლში გაკეთებული საჭმელების ჭამა ძალიან მიყვარს, მაგრამ ჩემი ცოლი 24 საათი სამზარეულოში ნამდვილად არ ზის და ამის გამო არც პრობლემას ვქმნი. ხანდახან მეც ვამზადებ სადილს და ნინოს ვახვედრებ. მივესალმები ქალს, რომელსაც თავისი სიტყვის სჯერა, საკუთარი თავის ფასი იცის და კარიერაზე ზრუნავს. ქალს ცხოვრების წარმართვა ნებისმიერ დროს უნდა შეეძლოს. ვგიჟდები ჭკვიან ქალებზე!
– თქვენ ირგვლივ ბევრი ჭკვიანი ქალია?
– მე მყავს მეგობარი, ნატა თოფურია (ქეთა თოფურიას დედა. ავტ.), რომელსაც ნებისმიერ საკითხზე შემიძლია რჩევა ვკითხო, ჭკუით ვერც კაცი აჯობებს და ვერც ქალი. მისგან ბევრი რამ ვისწავლე. ჩემი ცოლიც საკმაოდ ჭკვიანია. ბევრი რაღაც არ დამიჯერებია და შემდეგ ძალიან მინანია. ნინოსთვის ბევრჯერ რომ დამეჯერებინა, ბევრჯერ გამიმართლებდა. კაცებს ეს კომპლექსი გვაქვს, რომ ქალის სიტყვას არ უნდა დავუჯეროთ. ხშირად მსმენია, ქალმა კაცი თავის ჭკუაზე არ უნდა ატაროსო, მაგრამ ეს გამოთქმა მოძველებულია და სწორად არ მიმაჩნია. ამ ბოლო დროს მივხვდი, რომ მათ უფრო აქვთ განვითარებული ინტუიცია და მამაკაცებზე ჭკვიანები არიან. ჭკვიანი ქალი ჭკვიან შვილს გაზრდის. ბედნიერი ვარ, რომ ჩემმა ცოლმა იცის, როგორ აღზარდოს ჩვენი შვილი, სანდრო.
– თქვენს მეუღლეს სექსუალური იმიჯი რომ აქვს, ეს თქვენი დამსახურება ხომ არ არის?
– ნინო ძალიან ლამაზი და სექსუალური ქალია. რაც უნდა ჩაიცვას და როგორც უნდა გადაიღოს, მაინც ასეთი გამოჩნდება. ასე რომ, არ ვიბრძვი და არ ვცდილობ, სექსუალური გამოჩნდეს, უბრალოდ ასეთია. ძალიან მიხარია, რომ ნინო ბუნებრივად არის ასეთი და ეს იმიჯი მიკერებული არ აქვს არც ვიდეოკლიპებში და არც ყოველდღიურ ცხოვრებაში. ნინოსთვის ჩაცმა დიდ ფასეულობას არ წარმოადგენს. მე კი პირიქით, მიყვარს, როცა საინტერესოდ იცვამს და ყოველთვის ვურჩევ, რამე ახალი იყიდოს. ზედმეტი გადაპრანჭვა არასდროს ჰყვარებია. ასეთი გარეგნობა ღმერთმა უბოძა. ნინო, როგორც ქალი, ჩემთვის ულამაზესია.
სოფიო ბოჭორიძე