ქმარმა პრეზერვატივის გამო მცემა

18 წლის გავთხოვდი და პირველივე თვეს დავფეხმძიმდი. ტოქსიკოზის გამო უნივერსიტეტში ლექციებს ხშირად ვაცდენდი და გამოცდებიც ვერ ჩავაბარე. საბოლოოდ ნანატრ პროფესიას დავემშვიდობე, რადგან გამომრიცხეს.

ლელის დაბადების შემდეგ რამდენიმე თვეში ისევ ფეხმძიმედ დავრჩი და მეორე შვილიც მივაყოლე, შემდეგ მესამე და ასე გავხდი 23 წლის ასაკში სამი შვილის დედა. მეუღლე დისტრიბუტორად მუშაობს. ცუდი ოჯახი არ გვაქვს, მაგრამ მთელი დღე სამი ბავშვის მოვლამ გამაგიჟა.

თავის დასაცავად სპირალის ჩადგმა გადავწყვიტე, მაგრამ დედამთილმა თავი გაიგიჟა, მაგან მოკლა ჩემი მეზობელი ნუნუ, სპირალი არ გამაგონოო. ბოლოს ქმარი პრეზერვატივის გამოყენებაზე დავითანხმე. მეორე დღესვე გავიქეცი და აფთიაქში სამი კოლოფი პრეზერვატივი ვიყიდე.

საღამოს სახლში დაბრუნებული ოთახში შევიყვანე და გახარებულმა ვაჩვენე. თავიდან სახე შეეცვალა, შემდეგ მშვიდად მკითხა, საიდან გაქვსო. რომ გაიგო, იქვე მეზობლად აფთიაქში ვიყიდე, ცხოვრებაში პირველად სახეში გამარტყა და ბოზი და ქუჩის ქალი მეძახა.

ჩემი ცოლი დღისით, მზისით პრეზერვატივს არ უნდა ყიდულობდესო. მერე გავიდა და დედამისს მოუყვა. სირცხვილით ოთახიდან ვერ გავდიოდი, მაგრამ როდემდე ვიჯდებოდი, ბავშვებისთვის ხომ უნდა მიმეხედა. მე და ნუკრი ორ დღეში შევრიგდით, მაგრამ დედამთილი მას შემდეგ როგორც დამნაშავეს, ისე მიყურებს.


ჟურნალი "რეიტინგი"