როგორ შეხვდებიან ჰოლივუდელები ახალ წელს

ახალი წელი ყველაზე ზღაპრულ დღესასწაულად მიიჩნევა, რომელსაც რაღაც ჯადოსნური მუხტი შემოაქვს ცხოვრებაში. თანაც, ნათქვამია, როგორც შეხვდები, ისე გაატარებ მთელ წელსო. ალბათ საინტერესოა, როგორ გადაწყვიტეს წელს ეს საკითხი ჰოლივუდის ვარსკვლავებმა.

მიუხედავად იმისა, რომ სამყაროს აღსასრულის აქტიური პროპაგანდა მიმდინარეობდა, ჰოლივუდელები მაინც იმედიანად იყვნენ და არ დავიწყებიათ საახალწლო გეგმების დასახვა. მაგალითად, მსახიობი და ფოტომოდელი კიმ კარდაშიანი ნიუ-იორკის საუკეთესო კლუბში აპირებს 2013 წლის შეხვედრას. მასთან ერთად იქნებიან დედამისი კრის ჯენერი და მისი მეგობრები - ჯენი მაკარტი და კეტი პერი.

ჰოლივუდის ერთ-ერთმა სექსუალურმა ვარსკვლავმა მი­ლა კუნისმა გამოაცხადა, რომ ახალ წელს ეშტონ კატჩერთან ერთად შეხვდება.

წყვილი გაემგზავრება ქალაქში, რომელიც მსოფლიოს ყველაზე დიდ გასართობ ადგილად მიიჩნევა - ლას-ვეგასში. სავარაუდოდ, ასევე ლას-ვეგასს მიაშურებს ლინდსი ლოჰანი, თუ ბოლო წუთს არ შეცვალა გეგმები და თუ კიდევ არ დაიჭირეს.
ანჯელინა ჯოლისა და ბრედ პიტის ვარსკვლავური წყვილი დღესასწაულს ოჯახურ გარემოში შეხვდება. ახალი წელი მათ ოჯახურ ზეიმად მიაჩნიათ. თუმცა კონკრეტულ ადგილს ჟურნალისტებს არ უმხელენ, გასაგები მიზეზების გამო.

ასევე ოჯახურ წრეში შეეგებებიან ახალ წელს სხვა "მეოჯახე" ვარსკვლავები - მერაია კერი და ჰაიდი კლუმი.
ლოს-ანჯელესის ელიტურ წვეულებებსაც ბევრი ცნობილი ადამიანი ეწვევა. მათ შორის იქნებიან ტეილორ სვიფტი და ჯასტინ ბიბერი, ასევე დაუქორწინებელი ჯორჯ კლუნი.

კეიტ მოსი კვლავ ტაილანდში აპირებს გამგზავრებას, იქ, სადაც ზეიმის სიმბოლო - გველი, ყველგან არის, საითაც გაიხედავ. იმედი აქვს, რომ ეს იღბალს მოუტანს.

პერის ჰილტონი გეგმავს, ახალ წელს ჰილტონების საგვარეულო სასტუმროში ოჯახთან ერთად შეეგებოს, მერე კი რომელიმე ვარსკვლავურ წვეულებას შეუერთდეს.

ლედი გაგამ შარშან მთელი სადღესასწაულო დღეები მიკროფონჩახუტებულმა გაატარა და ვერც დაისვენა. წლევანდელი გეგმები კი ჯერ არ გაუმხელია.

ჟურნალი "რეიტინგი"
(გამოდის ორშაბათობით)