კბილის ექიმმა გაუპატიურება დამიპირა

ბავშვობიდან პრობლემური კბილები მქონდა და მთელი სტუდენტობა ყვითელი და გაშავებული კბილებით გავატარე. ამიტომ, როგორც კი მუშაობა დავიწყე, ბანკიდან სესხი გამოვიტანე და თანამშრომლის რჩევით, ერთ-ერთ კერძო კლინიკას ვესტუმრე.
შუა ასაკის სტომატოლოგმა მამაკაცმა, რომელიც ჩემი თანამშრომლის ბიძა გახლდათ, ფული წინასწარ გადამახდევინა და დამპირდა, რომ ერთ თვეში ჰოლივუდის ღიმილი მექნებოდა. სტომატოლოგთან კვირაში სამჯერ მივდიოდი, მაგრამ ერთ დღეს გამომიცხადა, ვერ ვასწრებ, რადგან დღისით ბევრი ხალხი მყავს და საღამოობით მოდი, ექვსი საათის მერე, რომ მალე მოვრჩეთო.

სიმართლე რომ გითხრათ, მეც ძალიან გამიხარდა, რადგან სამსახურში თითო საათით დათხოვნა ძალიან მიჭირდა. პირველმა ორმა ვიზიტმა მშვიდად ჩაიარა. კლინიკა ჩემთან ერთად დაკეტა და მანქანით სახლამდე მიმიყვანა. ერთ საღამოს სახლში რომ მივყავდი, მოულოდნელად მანქანით სადღაც ბნელ ქუჩაზე გადაუხვია, გააჩერა და გიჟივით მეცა.

არანორმალურივით მკოცნიდა და თან ქურთუკის გახსნას ცდილობდა. ჩემი წინააღმდეგობის მიუხედავად, თავს არ მანებებდა და ათას სისულელეს მეჩურჩულებოდა. ახლაც მიჭირს იმის გახსენება. ბოლოს რომ ნახა, დანებებას არ ვაპირებდი, თავი დამანება, შემაგინა და მანქანიდან გადმომაგდო.

სახლამდე ძლივს მივაღწიე. ორი დღე სამსახურში არ წავსულვარ და ბოლოს მაინც წავედი, როდემდე დავიმალებოდი. მის ნათესავს თვალს ვერ ვუსწორებ. რა ვუთხრა, არ ვიცი. იქნებ გიჟად ჩამთვალოს. ან ამ კბილებს რა მოვუხერხო, იმდენი ფული გადავიხადე და ნახევარი პირის ღრუ გასაკეთებელი მაქვს.

ჟურნალი "რეიტინგი"