ლელო ჩქარეული:"მე და ლევან ხურციას რომანი არ გვაქვს!"

სამეჯლისო მოცეკვავეები, როგორც წესი, მშობლების კვალს მიჰყვებიან, ოჯახურ ტრადიციებს აგრძელებენ, 25 წლის მოცეკვავე ლელო ჩქარეულის შემთხვევაში კი პირიქით მოხდა – ის ჯერ თვითონ გახდა მოცეკვავე, მერე კი ამ პროფესიის სიყვარული იურისტ მამას გადასდო და საქმე იქამდე მივიდა, რომ ბოლოს მისი მშობელი საერთაშორისო კატეგორიის მსაჯიც კი გახდა.
ლელო ფართო საზოგადოებამ პროექტიდან "ცეკვავენ ვარსკვლავები" გაიცნო. მის მეწყვილედ უფროსი თაობის ცნობილი კოლორიტი, გივი სიხარულიძე იყო შერჩეული და თავიდან ეს ამბავი ლელოს თურმე ცოტა ანერვიულებდა კიდეც. მერე კი ყველაფერი კარგად აეწყო, თუმცა მათი წყვილი საბოლოოდ პროექტს მაინც გამოეთიშა. ბატონი გივი სიხარულიძის ფაქტორის გარდა, მომხიბვლელი ლელა სხვა მხრივაც დამაინტრიგებელი ფიგურა გახდა მაყურებლისთვის – ხმა გავრცელდა, რომ მას და პროექტის ერთ–ერთ წამყვანს, მსახიობ ლევან ხურციას, მეგობრობაზე უფრო მჭიდრო ურთიერთობა აკავშირებთ ერთმანეთთან... ერთი სიტყვით, საინტერესო კითხვები დაგროვდა და ლელას ინტერვიუსთვის ვეწვიეთ.
– ლელო, როდის შემოვიდა თქვენს ცხოვრებაში ცეკვა?
– მე მსახიობობა მინდოდა. ერთი პერიოდი მოსკოვში ვცხოვრობდით. იქ ერთ–ერთ არხზე სამეჯლისო ცეკვა ვნახე. ძალიან ლამაზი გოგო ცეკვავდა და მეც მომინდა. თბილისში რომ დავბრუნდით, ცეკვის სტუდიაში შემიყვანეს. მაშინ 9 წლის ვიყავი.
– მშობლებმა მხარი დაგიჭირეს, როცა უკვე სერიოზულად გადაწყვიტეთ, სამეჯლისო მოცეკვავე გამხდარიყავით?
– მამა იურისტია, დედა – რუსული ენისა და ლიტერატურის მასწავლებელი. დედისერთა ვარ. მართალია, ჩემს ოჯახში ხელოვნებას არავინ ემსახურება, მაგრამ ძალიან უყვართ. საკმაოდ მკაცრი მამა მყავს. მას ქართულ ცეკვებზე პრობლემა არ ჰქონდა, მაგრამ სამეჯლისო ცეკვების კოსტიუმები არ მოსწონდა. იმან გადამარჩინა, რომ სამეჯლისო ცეკვები არამარტო ხელოვნება, სპორტიცაა. მამამ ეს რომ გაიგო, ესიამოვნა. იმის მერე სულ გვერდით მიდგას. იმდენად დაინტერესდა ამ ცეკვებით, რომ საერთაშორისო კატეგორიის მსაჯიც კი გახდა. როცა სამსახურიდან დრო ჰქონდა, რამდენიმე ტურნირი იმსაჯა კიდეც.
– პროექტში "ცეკვავენ ვარსკვლავები" თქვენი ინიციატივათ მიხვედით თუ მიგიწვიეს?
– პირველ სეზონში მონაწილეობა არ მიმიღია, რადგან კასტინგი სწრაფ ტემპში ჩატარდა და მე იმ დროს თბილისში არ ვიყავი. ამ სეზონზე კასტინგზე გავედი და ამიყვანეს. საქართველოს სპორტული ცეკვების ეროვნული ფედერაციის პრეზიდიუმის წევრი ვარ. რამდენიმე წელია, როგორც სპორტსმენი მოცეკვავე, ისე აღარ ვმუშაობ. მსაჯი და ქორეოგრაფი ვარ. გამიხარდა, რომ ფართო საზოგადოებას ჩემი ოსტატობა კიდევ ერთხელ ვაჩვენე.
– როცა გაიგეთ, თქვენი მეწყვილე გივი სიხარულიძე იქნებოდა, რა რეაქცია გქონდათ?
– ამას პროდიუსერი ალინა არველაძე წყვეტდა. მოცეკვავეებმა არ ვიცოდით, ვისთან ვიცეკვებდით. ერთ–ერთ შეკრებაზე გავიგე, რომ ბატონი გივი იქნებოდა ჩემი მეწყვილე. თავიდან ცოტა ვინერვიულე, რადგან ჩვენ შორის ასაკობრივი სხვაობა დიდია, მაგრამ მერე დავმშვიდდი.
– როგორ შეაფასებთ იმ დროს, რაც პროექტში გაატარეთ?
– ჩემთვის ეს იყო წინგადადგმული ნაბიჯი არამარტო კარიერაში, არამედ პირად ურთიერთობებშიც, რადგან ძალიან კარგი ადამიანები გავიცანი. მეორე სეზონზე ვინც მუშაობს, აღნიშნავენ, რომ პირველი სეზონის მონაწილეები უფრო კონკურენტებად აღიქვამდნენ ერთმანეთს, ვიდრე მეგობრებად. ჩვენ კი ძალიან კარგი ურთიერთობა ჩამოგვიყალიბდა. ერთმანეთს ხშირად ვეპატიჟებით სხვადასხვა ადგილას. პროექტს რომ გამოვეთიშე, ბევრი რამ დამაკლდა. სიამოვნებით მივიღებდი ამ შოუში ისევ მონაწილეობას.
– თქვენს პირად ცხოვრებაზე თითქმის არაფერი ვიცით.
– პირად ცხოვრებაზე საუბარი არ მიყვარს. ზედაპირულად შემიძლია გითხრათ, რომ მყავდა ქმარი, რომელსაც 5 წლის წინ გავშორდი. ისე აეწყო, რომ დღეს კარიერით ვარ დაკავებული. მოკლედ, პირად საკითხებში სიფრთხილეს ვიჩენ. შეიძლება რაღაც გამოცდილება რომ მივიღე ცხოვრებაში, ამიტომაც გავხდი ფრთხილი.
– ბოლო პერიოდში თქვენზე ჭორი გავრცელდა – მსახიობ ლევან ხურციასთან დაგაწყვილეს, რომელიც ემ სეზონზე პროექტის წამყვანია. ეს სიმართლეა?
– ტყუილია! მე და ლევანი ამ შოუმდეც ვიცნობდით ერთმანეთს. ფილმში "მოსკოვი–თბილისი" ეპიზოდურ როლს ვთამაშობ, ლევანი კი მთავარ გმირს ასახიერებს. ერთმანეთს იმ პერიოდიდან ვიცნობთ. ძალიან კომუნიკაბელური ვარ და ურთიერთობები მიყვარს. ხელოვან ადამიანებს ვაფასებ, მომწონს მათთან ურთიერთობა, რადგან მეც ამ სფეროს წარმომადგენელი ვარ. ასე რომ, მე და ლევანი ვმეგობრობთ და ჩვენ შორის, მეგობრობის გარდა, არაფერი ხდება.
– მოცეკვავისთვის აუცილებელია ფიზიკურად საუკეთესო ფორმაში იყოს, ეს მისი პროფესიული მოვალეობაც კი არის. თქვენ რა მეთოდებს მიმართავთ ამისთვის, თავს როგორ უვლით?
– მიმაჩნია, რომ ქალი ყოველთვის მოვლილი უნდა იყოს. შეიძლება ძალიან ლამაზი არ იყოს, მაგრამ მოუვლელობა არ ეპატიება. რაც შეეხება მოცეკვავეებს, სამეჯლისო ცეკვა განსხვავდება თუნდაც "ქართულისგან" და ჩვენთვის არ არის აუცილებელი სიგამხდრე. სამეჯლისო ცეკვებისთვის სასურველია ქალი ცოტა ხორციანი იყოს, ამაში სიმსუქნეს კი არ ვგულისხმობ, უბრალოდ სხეულის ფორმები უნდა იყოს გამოკვეთილი.
– როგორ იკვებებით, დიეტის დაცვა გჭირდებათ?
– არა. მოცეკვავეები იმდენს ვმუშაობთ, რომ კალორიებს მუდმივად ვწვავთ. სწორი კვება აუცილებელია. ქალი ცხიმიან საჭმელებს უნდა მოერიდოს და რაც შეიძლება მეტი ბოსტნეული მიიღოს. სამოდელო სააგენტოშიც ვმუშაობ, როგორც ქორეოგრაფი. მოდელებიდან თუ ვინმეს ისეთი წონა აქვს, რომ აუცილებლად უნდა დაიკლოს, დიეტოლოგთან ვაგზავნით. ექიმი კი მათ სისხლის ჯგუფის მიხედვით სპეციალურ რაციონს ურჩევს. ყველასთვის ერთნაირად მისაღები დიეტა არ არსებობს. ინდივიდუალურად უნდა განისაზღვროს კვების რეჟიმი და მისი რაციონი. ბევრი პურზე უარს ამბობს, რაც არ შეიძლება. პურის მიღება აუცილებელია, ოღონდ მცირე რაოდენობით.
– თქვენ საკუთარ გარეგნობაში ყველაზე დიდ ყურადღებას რას უთმობთ?
– ძალიან დიდ მნიშვნელობას ვანიჭებ ხელებს, ფრჩხილებს. ამბობენ, რომ თვალები სულის სარკეა, მაგრამ მე ადამიანს ხელებითაც ვაფასებ. ქალის ხელები ძალიან მეტყველია. თმასაც დიდ ყურადღებას ვუთმობ.
– ცეკვაში ყველაზე მნიშვნელოვანი რა არის გარეგნული კუთხით, აქცენტს რაზე აკეთებთ?
– თვალებზე. ჩვენს პროფესიაში თვალებს დიდი ყურადღება ექცევა. შეიძლება მოცეკვავე ტექნიკურად კარგად ცეკვავდეს, მაგრამ კონკურენტმა იმით აჯობოს, რომ უფრო მეტყველი თვალები ჰქონდეს.
– სახის კანს როგორ უვლით?
– გენეტიკურად კარგი კანი მაქვს, რუსი ბებია მყავდა და ალბათ მისი გენი გამომყვა. კანის პრობლემა არასდროს მქონია, მაგრამ, იმის გამო, რომ ბავშვობიდან მაკიაჟთან მუდმივი შეხება მაქვს, გარკვეულ კრემებს ვიყენებ.
– რუსი ბებიისგან რა რჩევები გახსოვთ?
– სულ მესმოდა, რომ აუცილებელი იყო წვნიანების მიღება. ბებია შინაურ რეცეპტებს მიმართავდა, მაგრამ, სამწუხაროდ, არ მახსოვს, მათ როგორ ამზადებდა.
– როგორც მოცეკვავე, რას ურჩევთ მათ, ვინც სპორტულად ცხოვრებას ვერ ახერხებს?
– გარკვეული ასაკის მერე ქალის სხეულს პრობლემები ექმნება. დღეში 15 წუთი ვარჯიშიც საკმარისია სხეულის ტონუსში მოსაყვანად. ძალიან კარგია ლახტით ხტუნაობა, რაც სახლის ან სამსახურის პირობებშიც შეიძლება გააკეთოთ.
– არის რაიმე, რაც არ მოგწონთ თქვენს გარეგნობაში?
– წინა კბილს გავისწორებდი. ხუთჯერ დავიწყე ამის გაკეთება, მაგრამ ბოლოს მაინც გადავაგდე ბრეკეტები.
მანანა ნოდია