ქართველმა მეთოჯინემ პოპულარული ადამიანების ორეულები შექმნა

პიარსააგენტო "პროფილმა" კლუბ "ვივენდოში" ორიგინალური გამოფენა მოაწყო, სახელწოდებით – "თოჯინები იცინიან". სალონური გარემო, სასიამოვნო მუსიკა და ორიგინალური თოჯინები ჰარმონიულად ერწყმოდა ერთმანეთს და ძალზე სახალისო განწყობას ქმნიდა.
დიზაინერმა თეა გუნთიაშვილმა ცნობილი სახეების ორეული თოჯინები გამოფინა. ვის არ იხილავდით აქ – ფუფალადან დაწყებული თიკო სადუნიშვილით დამთავრებული. ყველა თოჯინას მისი პროტოტიპის დამახასიათებელი ჩაცმულობა და შტრიხები ჰქონდა. გამოფენა თოჯინების პროტოტიპებმა დაათვალიერეს და ძალიან იხალისეს. თავად პიარსააგენტო "პროფილის" ხელმძღვანელის, მანანა გეგიძის თოჯინას ხელში ქართული ბრენდის ჯილდო ეჭირა, რომელსაც მალე, დეკემბრის ბოლოს, წარმატებულ ქართულ ბრენდებს დაურიგებს. დიზაინერ თამარ ნადირაძის "ორეული" კი თავის პროტოტიპს თმის ფერით და ვარცხნილობით ჰგავდა.
თეა გუნთიაშვილმა თოჯინების კეთება რამდენიმე წლის წინ დაიწყო, უფრო კონკრეტულად კი მაშინ, როცა საყვარელი ადამიანი დაკარგა – ბებია გარდაეცვალა. პირველი თოჯინა სწორედ მისი პროტოტიპი იყო. ბებიების ტიპის თოჯინები კოლექციაში დიდი რაოდენობით იყო წარმოდგენილი. დიზაინერმა თითქმის ყველა ცნობილი ბებია შექმნა, მათ შორის – "კათარზისის" მომღერალი ბებიები.
გამოფენის სახელწოდებაც "თოჯინები იცინიან" დიზაინერს შემთხვევით არ შეურჩევია. სწორედ მის პაპას ეკუთვნის ამავე სახელწოდების ცნობილი ფილმის აფიშის შექმნა, ისე როგორც სხვა ცნობილი ფილმების.